*** ฮักอ้ายที่ใจ ***

[NONGNAN]

น้องบ่ถือ เอาฐานะ มาเป็นใหญ่
บ่ร่ำรวย บ่สนใจ ดอกอ้ายจ๋า
เพียงฮักน้อง ซื่อตรง คงเส้นวา
คือแต่ก่อน ที่เป็นมา ค่าเพียงพอ

เฮือนหลังน้อย เก่าเก่า เช่าเขาอยู่
บ่งามสู้ ผู้อื่น ก็บ่ท้อ
ขอมีเพียง อ้ายกับน้อง สองคนพอ
บ่คิดขอ สิ่งมากมาย ให้อ้ายจม

สองแขนคู่ สู้งาน บ่ย่านหนัก
เอาควมฮัก ปักหลัก เป็นคู่สม
เช็ดเหงื่ออ้าย ให้เหนื่อยหาย คลายเศร้าตรม
อยู่เคียงชม ทั้งทุกข์สุข ทุกคืนวัน

อย่าฟ้าวท้อ รอมื้อหน้า ว่ากันใหม่
วันนี้อ้าย ช่วยทลาย เอาใจกั้น
สองมือกุม ให้แรงใจ กันและกัน
บ่เคยหวั่น หยันน้ำหน้า คำว่า ?จน?

[ทองคำ]

หล่าเอย แม่นอ้ายทุกข์ยากฮ้าย ปากก่ำกินมันหมก
บ่อเคยตกกะเทินถอย ให้หมู่คนเพิ่นหัวซ้ำ
ผิวหากดำก่ำแหล่ ปากแปไปจักหน่อย
หากเจ้าฮักเจ้าคอย อ้ายบ่อถอยสิขันสู้ ซูขึ้นอย่างแน่นอน หล่าเอย
คันมีเจ้าแม่นสิฮ้อน อ้ายสิจ่มดอกว่าหนาว
ฟ้าขาวๆอ้ายสิพือ ห่มกายแทนผ้า
คันวาจานางหมั่น พันทะนังเจ้าตั้งเที่ยง
ว่าบ่อเกี่ยงทุกข์ฮ้าย โตอ้ายสิค่อยเพียร
รับรองใจบ่อให้เปี้ยน มีอื่นเข้ามาแกม
สิแนมเอาตั้งแต่นาง มาป็นยาให้ใจนี่ หล่านางเอย

[yuttakan]

ป้าดดดดดด มายาวคักแท้ผญาแหมซั่วสิอ่านจบว่าแม่นกลอนลำตี้ซั้นด อก อิๆ ม้วนครับ

[ศรีสะท้าน]

ดีแล้วหล่ะอาว ยาวๆไว้คือสายเซือกว่าว บาดฮ่าลมย่าวต้องสยองขึ้นสู่นภา ...

[NONGNAN]

กะ หนูคิดฮอดแฮงเนาะ เลย ยาว

[โป้ยก่าย]

อ้ายฑิตครีให้ผมขอเว้านำแน่เด้อผญานี่แมะ คันบ่เป็นท่ากะแก้ผมแน่ อิอิ ย้อนอยากเว้า

คิดฮอดน้องกินข้าวเหมิดคาบละกล่อง นอนกะหลับอิ่มแท้ ใจอ้ายกะซ่วงเย็น นางเอ้ย
บ่ได้เห็นแต่ละมือคือมาซ่างสะบายดี มีแต่ความสุขขัง นั่งนอนกะสุขล้น หล้าเอยนางเอ้ย คนผู้งามของผู้อื่นเอ้ย..

ป.ล. คันบ่ถืกแก้ให้ผมแน่เด้ออ้ายฑิต อิอิ..

[ศรีสะท้าน]

อ้ายฑิตครีให้ผมขอเว้านำแน่เด้อผญานี่แมะ คันบ่เป็นท่ากะแก้ผมแน่ อิอิ ย้อนอยากเว้า

คิดฮอดน้องกินข้าวเหมิดคาบละกล่อง นอนกะหลับอิ่มแท้ ใจอ้ายกะซ่วงเย็น นางเอ้ย
บ่ได้เห็นแต่ละมือคือมาซ่างสะบายดี มีแต่ความสุขขัง นั่งนอนกะสุขล้น หล้าเอยนางเอ้ย คนผู้งามของผู้อื่นเอ้ย..

ป.ล. คันบ่ถืกแก้ให้ผมแน่เด้ออ้ายฑิต อิอิ..
กะพอได้แล้วเด้หล่ะ มีแก้แหน่นิดหนึ่งเด้อ วรรคที่สองหน่ะ ควรสิให้มีคำที่คล้องจ่องกับคำว่ากล่องเด้อ และกะวรรคสุดท้ายที่สิลง บ่อควรให้ลงด้วยเสียงสูง โท ตรี มันสิค้างเจ่เด่
คิดฮอดน้องกินข้าวเหมิดคาบละกล่อง นอนกะหลับอิ่มท้อง ใจอ้ายกะซ่วงเย็น นางเอ้ย
บ่ได้เห็นแต่ละมือคือมาซ่างสสุขะบาย มาคือมีแฮงหลาย นั่งนอนกะสุขล้น
คนผู้งามของผู้อื่นเอ้ย อ้ายเฉยเฉยบ่อฮ้อนดาก กินแล้วฮากใส่พร้อม ตาน้อยฮอดบ่อเหลียว นั้นแหลว ฯฯฯ (ตัวอย่างเด้อ อย่าไปฮากใส่ขะเจ้าอิหลีเด้หล่ะ ขี่เดียด)

[โป้ยก่าย]

ฮ้า ฮ้า บ่ฮากดอกอ้ายฑิตคันบ่เมาคักอี่หลี

ขอบคุณเด้อครับอ้ายฑิตศรีที่ให้คำแนะนำ ผมกะสิพยายามอ่านเบิ่งไปเรื่อยๆ แต่ว่ากะสิหยอดนำเทื่อละนิดละน่อยอยู่ดอกหวา อิอิ

[ศรีสะท้าน]

@บ่อเป็นหยังดอกท่าน เชิญเจ้าอ่านตามสบาย
คำผญาทั้งหลาย หากม่วนยินเหลือล้น
มีหลายคนผู้เพิ่นเก่งทางบทบั้น คำประพันธ์กลอนแต่ง
จั่งค่อยแยงหล่ำสิ่ง อิงอ้าง แต่งตาม นั้นแหลววว ฯฯฯ

[NONGNAN]

น้องสาวหล่า มาวอนเว้า จาผญาเบิ่งสาก่อน
อ้ายทิดสีเพิ่นมาวอน พี่แก้มกะพ่องนั้น
เพิ่นจาต้านเว้าม่วนหลาย
มื้อนี้น้องจั่งได้เชิญมิตรใหม่ไทอิสาน
สืบตำนาน คำกลอนพ่อแม่สอนหมู่เฮาไว้
อย่าสิลืมไลล้างวางไปให้สูญปล่าว
เชิญหมู่สาวน้องอ้าย มาเว้าจ่าย ผญา..

[ศรีสะท้าน]

@ เชิญเด้อพวกพี่น้อง มาเปิดป่องกลอนผญา น้องสาวแนนเลาจา เอ่ยซวนซุมเจ้า
ขอจงหันมาเข่าซุมแซม แนวม่วน ทิดคำศรีขอเชิญชวน สาวผู้ดีเพิ่นรับต้อน ให่มาถ่อน กล่าวผญา นั้นแหลว ฯฯฯ

[โป้ยก่าย]

อยากเว้านำบ่แพ้แหล่วแนวบ่เก่งทางผญา แต่กะอยากมาจาฮ่วมผยาทางพี่
มาเต็มทีแต่ทางข้อยคำผญาซ่างว่ายาก ย่อนอยากปากอยากเว้าจั้งเดาด้นว่าบ่เป็น พีน้องเอ่ย

[maxlinee]

หล่านางเอ่ย ขั้นแม่นเจ้าฮักอ้ายให้เจ้าเตรียมห่อผ้าหนีไปนำกันสา อ้ายสิเบิงอ้ายสิเลี้ยง

[ทองคำ]

ท่านเอย ผมนี่หากบ่อขีนผู้ได๋แหล่ว แนวคิดมักอยู่คือกัน
ใจกระสันต์อยากสิเห็น ฮอดเฮือนผู้ชวนซ้ำ
อ้ายศรีเอ้ย คันแม่นผิดให้ซ่อยย้ำ ซ่ำตื่มทางบทกลอน ให้แหน่เด้อ
ให้สะออนฤาชา ทั่วดินแดนด้าว
สาวผู้ดี แนน เจ้า เอาคำออกเผยแผ่
อ้ายทองคำสิแต่งแก้ มาเบิ่งแม้สิต่อความ หล่าเอย

[kwan1989]

ขอบคุณมากคับ

[kajoy]

เฮ็ดจังได๋น๋อ ข้าน้อยจังสิเว้าเป็นละครับ

[kajoy]

อยากเว้าเป็นนำหมู่เพิ่นเด้พี่น้องเอ้ย ข้าน้อยสิเฮ็ดจังได๋จังสิเว้าเป็นน้อครับ

[sompoi]

อ่านดุๆ แล่วกะที่สำคัญหัดแต่งนำเด้อจ้า เป็นกำลังใจให้ เจ้าของกะบ่เคยมาก่อนคือกัน อาศัยอ่านดุๆ จ้า..ลองเบิ่งเด้อ..ใจมักอยู่แล้วบ่ยากดอก..

[ศรีสะท้าน]

อ่านดู๋ดู๋แล้วจำไว้ คันสนใจมันบ่อยาก ว่าติส้ม แม่นคือปากเจ้าว่าไว้ เข้าใจแล้วคะรับผม
ข้อยสิตั้งหน่าก้ม งมใส่ในผญา บ่อไปเสียเวลาหาหยอกไผพอดี้
คันให่ดีลองมาเว้า เอาผญามาเติมต่อ พอให่มันม่วนแม้ง มะโนแจ้งแจ่มใส เบ่งดู๋ อิ อิ อิ

[sompoi]

นางบ่ได่สอนเจ้า อย่ามาเว่าใส่หลาย เพียงแค่แนะน้องใหม่ บ่ไหลใส่อ้ายสำครู..ดอกอ้าย
คึดใส่น้องกะดาย อยากจ่ายได่คือญาพี อ่านผญาเพิ่นเข้าที คือม่วนดีหวานจ้อย ..ซั่นดอก
บ่อาจจาว่าต้าน ปรมาจารย์ศรีปราชญ์ น้องยังด้อยสามารถ อ้ายดอกผุคาดลาด...แงงเบิ่งน้องแน่ะเด้อ...อิอิ..

[โป้ยก่าย]

อ้ายฑิตศรีขอรับเอ้ยยยย
ข้อยอยากมาวารต้านขอปรึกษานำเจ้าแน่ ใจข้อยมาซ่างแพ้ปานมวยแหย่เข้าใส่ใส่มุม
ข้อยสังมากลัดกลุ้มปานสุมไฟใส่เตาถ่าน ซ้ำนักโทษถืกประหารทรมานคักแท้หาทางแก้กะบ่เห็น
เป็นนำใจของข้อยไปหลงไหลแฟนผู้อื่น บ่ว่าค่ำบ่ว่าคืนได้แต่ยืนล่ำจ้องหาน้องผู้อื่นเขา
บาดฮู้โตว่าเพินมีอยู่แล้วปานแหลมทั้งตำหัวใจ ปานว่าไฟลามลุกซ้ำสิวายชีวาม้าง
เหมิดหนทางแล้วหละข้อยอ้ายฑิตศรีให้ข้อยขอปรึกษาแน่ ฮ้ามันมีหม่องแก้ให้ใจข้อยซ้วงเย็น อ้ายฑิตศรีคนผู้ไคเติบเอ้ยอออ

[Tid Sri]

เป็นตาหลูโตนอ้ายโป้ยก่ายแท้ เฮ็ดจั่งใด๋บาดอ้ายคำศรี

[Tid Sri]

หลูโตนนำคำเว้ามักเมียเขน้อโป้ย ก่าย มันเจ็บปวดส่ำใด๋ไผ่กะฮู้แนวเขานั่นบ่หล่ำมอง
หมองอุราหม่นเศร้ามักเขาบ่กล้าเอ่ย อยากสิเผยกะบ่กล้า คิดนำหล่าเจ้าผุเดียว
เหลียวเห็นเขาควงซ้อนซู้เพิ่นเดินกาย พออยากตายเด้นาง บ่อยากเห็นฮั่งมาพ้อ

[โป้ยก่าย]

บ่าวเมืองยโสธรเอ้ยยยย
อย่ามาซาผญาข้อยมันหากเป็นไปทั้ว ข้อยกะเว้ามั้วมั้วพอเป็นเรื่องให้แต่งไป
ฮ้าลางเทื่อหากสิได้ความฮู้ใหม่จากอ้ายศรี ผู้เลามีปัญาหลายเพิ่นจ่ายคำผญาแจ้ง
หาหม่องแทงใจเลาเล่นพอได้เป็นโตอย่าง ให้เลาแนะแนวทางหากสิได้เก่งกล้าปัญเหลี้ยมซ้ำเลา
คันแม่นเจ้าอยากเว้าเป็นเก่งทางผญา ให้เจ้าหาคำเติมแต่งมาให้เป็นเรือง สั้น ดอกผู้บ่าวเมืองยศเอ้ยยยย

[Tid Sri]

โอ้ย...นออ้ายโป้ยก่ายเอ้ย ข่อยนี่เพียงเว้าหเจ้าอย่าคิดหยังหลาย
กลอนผญามันพาไป อย่าถือเอาควมน้อง
ขอฝากโตนำเด้ออ้ายผิดไปให้เว้าว่า เรื่องผญายังบ่คล่อง ให้อภัย

[โป้ยก่าย]

บ่เป็นหยังดอกท่านให้มาม้วนนำกัน ข้อยกะหาสิมาหัดแอบเอาในกระทู้นี้หละ
พอปูปูปาปาเว้าด้นเดาไปนำเพิ่น เซิญเจ้ามาเป็นหมู่ข้อยเฮียนฮู้ฮีดคลอง
ข้อยกะยังบ่คล่องหาป่องบ่ทันเห็น ย้อนว่าความอยากเป็นจั้งมาจาอ่านนำตามกระทู้ สั้นดอก บ่าวเมืองยศ เอ้ย

[เซียงข่อล่อ]

อยากสิขอเอยอ้างทางเว้ากล่าวผญา เอาภาษาอีสานให้ม่วนขานคำเว้า
เชิญมาฟังหมู่เจ้าซุมเฮาบ้านมหา ทั้งคุณลุงคุณป้า พ่อใหญ่ตาเขามาแหว มันหากม่วนแท้ๆ เซิญแก้ เอยขาน ซั่นแหลว