@ ผญาสอนสาว @

[ศรีสะท้าน]

@ นางเอ้ย...อ้ายสิสอนสั่งไว้ในบอร์ดคำผญา เป็นปัญญาควรคิดพิศศะดูให้ดีแท้
เจ้าอย่าแววังเวิ้งบ่อเห็นเปิงอย่าฟ้าวฮ่วม เอาแต่ความหยอกเหล่นสิเหม็นฮ้ายหน่ายหลัง
อันสัจจังคนเฮานี้คันดีอ้ายบ่อว่า ย้านสัจจาบ่อเที่ยงหมั่นสำคัญแท้ให้แน่ใจ
ปากจั่งได๋ใจจั่งซั้นให้คิดหมั่นตริตรอง นางเอ้ยย อย่าไปเอาใจฮองเพิ่นผู้ได๋เต็งค้าง
ยามเขาวางโตเจ้าสิคือเงาหนังบักป้อด เหมิดออดหลอดแล้วซ้ำบ่อจำจ้อยเล่าลืม...นั้นแหลว ฯฯฯ

[Tid Sri]

สาวนมโต้นลงโพนอย่าสิแหล่น บาดเจ้าคาดลาดล้ม นมสิโต้นแต่หลัง ::)

[หนุ่มนาจาน]

อันวาเป็นหญิงนี้ ทำเนียมให้มันเคียม
ตีนผมให้ล่ำเกี้ยง ตีนสิ่นให้ล่ำเพียง ซั้นแหล่วนางเอ้ย

[ศรีสะท้าน]

@ หล่านางเอ้ย อย่าสะเด๋อเดิดดิ้นบินให้เคี่ยมอย่าเทียมหงส์ แนวเฮาสกุณาดงอย่าวาดวงบินกว้าง
ป่าดงหลวงมันไกลเยิ้นเกินแฮงสิข่วมฝ่า นางเอ๋ย ค่อยถลาปีกผ่ายบินย้ายแล้วพักเซา
อย่าไปเทียมอาสน์เจ้าเสมอเพิ่นผู้มีบุญ เอาแต่พระกรุณาคุณสิแผ่ผายยายซ้วน
เอาแต่ควรผลายู้ซูนำพอก้ำเกิ่ง อย่าไปซาวก่องเนิ้งอันสูงล้ำมาพ่ำตน นั้นแหลว ฯฯฯ

[ไก่น้อย]

อ้ายเอ้ย
ขอบคุณหลายเด้ออ้าย คำชายมาจาบอก
นอกจากเจ้าท่อนี้ ใจน้องสิเชื่อฟัง
บ่ไห้พังเพม้าง โบราณกาลสิสานต่อ
ถึงบ่ไพเราะพริ้ง คะนิงน้องค่อยเฮดนำ
คำวาจายาอ้ายคำชายให้นางเคี่ยม
อาจบ่อเทียมคำอ้าง อินางหล่าสิค่อยจำ ....เด้ออ้ายเอ้ย

[หนุ่มนาจาน]

หล่านางเอ้ยอันวาเป็นหญิงนี้ยิงดีๆยิงแนไคนซิยิงแท้ๆ แนแล้วจั่งค่อยยิงซั้นแหล่วนางเอ้ย..

[หมูหวาน]

อ้ายเอ่ย อั่นคำสอนนี้ จะจือหนอจดจำ คั่นแมนเป็นคำดังเว้า นางนี้จะเชื่อฟัง
อั่นที่ว่าเล่นๆนางนี้ยังมักม่วน สั้นแล้วหละอ้ายเอ้ย::)::)

พอได้บ่หนอ หาหม่องลงบ่ได้ อิอิ เว้าบ่เป็นอยากเว้าสั้นแล้ว ::)::)

[NONGNAN]

อ้ายเอ๊ย เพิ่นผู้ศรีสะท้าน ต้านเก่งคำผญา
คำที่อ้ายสอนมา นางยังจำบ่ลืมได้
บ่เคยไปเที่ยวเล่น เต้นบาร์หาแซวบ่าว
ยังคิดฮอดถึงคราวคำสอนพ่อ - แม่เว้า
ทั้งสองเฒ่าเพิ่นสั่งมา การศึกษานางยังหน่อย
น้องสิค่อยเพียรหา คันแม่นถึงเวลาสิแลนมาหาเจ้า
ให้อดเอาเด้ออ้าย ยากงานหลายบ่ได้แหว่
ยังคิดถึงแท้ ๆ ซุมพี่น้อง บ้านมหา...

[panda_saon]

อันวาเป็นหญิงนี้ ทำเนียมให้มันเคียม
ตีนผมให้ล่ำเกี้ยง ตีนสิ่นกะซ่างมัน .........................

[น้ำตาล]

อย่ามาติแถลงลิ้น แถลงกินแกงไก่
ฝนตกยังฮู้เอี้ยน กบกินเดือนยังฮู้อิ่ม
เคือบุ่นเกี้ยว เคือบุ่นซ้ำผัดมาย
เคือหวายเกี้ยว เคือหวายซ้ำผัดเน่า
ใผซิเล็งเห็นได้ ภายในบ้องไม้ซอด
ย้านแต่มอดลักดั้น ในหั่นหมื่นโต
ใผซิเล็งเห็นได้ ภายในบ้องไม้ใผ่
มอดหากมาลักซี แมงอีหากมาลักดั้น
ในหั่นส้องบ่เห็น

เด้ออ้ายเด้อ...เป็นได่ใหย่ศรีเป็นตาเว้าแข่งกับใหย่ ศรีได่บ่...::)::)

[ศรีสะท้าน]

เป็นญิงนี้สัจจังมีให้แหน่นเที่ยง
อย่าได้เอนพาดเพี้ยงให้เพียงก้ำพร่ำเสมอ
อย่าได้เผลอตั๋วล่อสอพลอเว้าหล่าย
ปากเว้ากลายหลื่นบ้านให้คนย้านข่มแข็ง
ศรีแสดงพอเป็นข่อยอมาวาจากล่าว
บอกแก่สาวหนุ่มน้องคะนองท้าวบ่าวนาง
จักขอวางผญาต้อยตอยคำธรรมประเสริฐ
ขอบังเกิดแก่ท่านหลานหล่าซู่คน นั้นแหลว

[sompoi]

ม่วนจ้า มักอ่าน เอามาลงหลายๆเด้อจ้า 8)8)

[บ๊อบดนตรีสยาม]

สิเอาไปบอกผู้ได๋ดีน๊อบ่มีผู้สาวครับ

[สาวออมน้อย]

อันวาเป็นหญิงนี้ ทำเนียมให้มันเคียม
ตีนผมให้ล่ำเกี้ยง ตีนสิ่นกะซ่างมัน .........................
:gคักคักตีนสิ่นกะสางมันพะนะ อ้ายเอ๋ย::)

[สาวออมน้อย]

อันคำผญานี่สาวออมกะอยากวา
คำที่อ้ายสอนมา
บอเคยลืมเลืยนเล่า
น้องสาวเจ้า สิจือจำ
อันวาเป็นผุหญิงนี่กะบอดีเบิดสุยาง
อันวาตีนสิ่นบอเอานั่น.. อ้ายยาเพิ่งไลหนี เด้ออ้ายทิดเอ๋ย::)

[ศรีสะท้าน]

ออมเอ๊ย ที่เพิ่นว่าให้ญิงเอาตีนสิ่นผืนแพรที่เนานุ่ง
หมายประสงค์มาดมุ่งให้งามแท้แก่สตรี
คันแม่นซูมื้อนี้กะหมายว่ากางเกงนำ
บ่อให้ทำเกาะแกะกวนยั่วยวนชายท้าว
ให้เป็นสาวสมเพี้ยงเสมอเพียงพร้อมพร่ำ
สมกับคำเพิ่นเว้าโบราณท้วงกล่าวสอน นั้นแหลว ฯ