ชุมชนบ้านมหา > อาหารการกิน > ครัวบ้านมหา ชวนชิม > อาหารอีสาน

 
คำสั่งเพิ่มเติม เรียบเรียงคำตอบ
01-15-2010, 02:50 PM   #1 (permalink)
ดูแลตรวจสอบเนื้อหา
 
 
ลาบปลาค้าว



เมนูนี้กะต้องอาศัยว่าเมือบ้านเฮาหว่างหั่นหละคับ ยามแลงกะไปย่างตลาดชุมชนตลาดน้อย เพิ่นสิมีของมาขายหลายอย่างหลายแนว ส่วนมากสิเป็นของแนวกินอีสานบ้านเฮา มื้อนั้นโชคดีไปพ้อปลาค้าว ขะเจ้าเอามาแต่น้ำซี เลยซื้อมาโตหนึ่ง เอามาลาบสู่อี่พ่อกิน
เชิญชมและเชิญชิมได้เลยคับ





เฮากะจัดการเลาะเนื้อ เถือหนังปลาออกมาเลย เว้าปานหนังจีนเด้เดียวเนี่ย อิอิ ตอนเลาะเนื้อออกมาบ่มีรูป เพราะมือบ่ว่างคับ เอาเนื้อไว้ต่างหากรอการเถือหนังออก



ส่วนนี้เป็นหัวกับส่วนอื่นที่สับไว้ถ่าต้มส้ม กินกับลาบอีกต่างหาก หนังที่เฮาเอาเนื้อออกกะมาต้มนำกันเลย ขวดเขียวๆแดงๆทางเทิงนั้นกะเป๊กไปนำ เฮ็ดไปนำ มันจั่งเพลินดีตั้ว



ต้มไว้ก่อนเลยเนาะคับ จั่งไปเฮ็ดลาบ คือลาบแล้วๆกะตักออกไปกินได้เลยหั่นหนา ลาบเฮ็ดใหม่ๆจั่งแซบตั้วเนาะ เว้ายืดยาว ค้างหม้อเลย สังเกตเบิ่งหม้อแล้ว หม้อหน่วยนี้บ่แม่นแต่ผมเข้า ป.1 พุ้นได๋บุ๊ อิอิ ฝานั้นกะบ่แม่นฝามันดอก โชว์สื่อๆ แต่ว่าบ่ฮั่วเด้ ต้มแกงได้สบายเนาะ อย่าคิดหยังหลาย สับหัวข่า หัวขิงไคใส่ลงไป ผมบ่ใส่ใบบักกรูดดอก เฮ็ดแบบบ้านๆ ระหว่างที่รอหม้อฟดกะแล่นไปเด็ดบักขามดิบมาจักสี่ห้าหน่วย เอามีดทุบพอแตกกะถิ่มใส่หม้อเลย อย่าลืมเกลือหยุมหนึ่งถิ่มไปนำ ขออภัยบ่มีภาพ เฮ็ดผู้เดียว แล่นหาอั่นนั้นอั่นนี้ เลยบ่ได้ถ่ายฮูปกะยังว่า รอให้หม้อฟดอย่างแฮงซะก่อนเนาะ

น้ำฟดลั้วะๆดีแล้ว กะเอาปลาลงหม้อเลย ตามสูตรเนาะ อย่าคน เอาไว้จั่งซั้นหละ รอให้ปลาสุกซะก่อน

ปลาสุกแล้ว กะปรุง ซิมเบิ่งก่อน ส้มบ่ เค็มบ่ จั่งปรุงเพิ่ม น้ำปลา ผงชูรส ให้กลมกล่อม บ่ต้องจัดหลาย เพราะว่าสิไปซดตอนกินลาบพุ้นเด้ แม่นบ่คับ แล้วกะอย่าลืมเอาพริกแห้งเสียบไม้จี่ไว้พร้อมคับ คั่วกะได้ ให้ไหม้ๆจักหน่อยจั่งหอมเนาะ ปรุงพอใจแล้วกะหักพริกจี่โฮยลงไป ผักซีหอม (ผักหอมป้อม) โฮยหน้าลงไป ปิดไฟได้เลยคับ


เนื้อซุมหว่างหั่นหละคับ เถือหนังออกเอาแต่เนื้อ สับให้แหลก บีบบักนาวจักสองหน่วย ใส่เกลือจักหน่อย คั้นคักๆ แล้วกะปั้นน้ำออก ได้จั่งซี้หละ


ใส่พริก ข้าวคั่ว ที่เห็นขาวๆนั้นเกลือเด้อบ่แม่นผงชูรส ชูรสบ่ได้ใส่ขั้นตอนนี้ดอก อิอิ แล้วกะคนเลยคับ หรือว่ามือคั้นเอากะได้ แต่ว่าผมเอาทัพพีคนเอา ย้านลาบมันสิเค็มโพด

ใส่เครื่องปรุงลงไป น้ำปลา ผงชูรสหน่อยเดียว เพราะว่าเนื้อปลามันสิออกนัวๆในโตมันอยู่แล้วเนาะ (คึดว่า) ตอนปรุงผมบ่ได้ใส่บักนาว แต่ว่าใส่บักกอกแทนคับ เฮ็ดไปนำ ซิมไปนำ จนคึดว่าแซบพุ้นหละ

จั่งใส่ผักเป็นรายการสุดท้าย ผมกะใส่ต้นหอมซอย ผักซี (อยู่บ้านเอิ้นผักหอมป้อม) แล้วกะหัวข่าซอยละเอียดจักหยุมหนึ่ง คนให้เข้ากันอีกเทื่อหนึ่ง กะเป็นอันเสร็จคับ


แล้วเหมิดทุกอย่าง พร้อมที่สิตักออกไปกินได้แล้วคับ


กินกับผักแพว ผักกะเดา ผักหอม ผักซีหมู่นั้นหละ อี่พ่อบอกว่าแซบหลายว่าซั้น ผมบ่ได้บังคับเลาว่าเด้ เลาว่าเอง อิอิ อย่าลืมเอาไปคั่วไว้ให้อี่แม่นำเด้อ เด็กน้อยหมู่นั้นหละ แบ่งไปคั่วนำ สองถ้วยนั้นเป็นลาบดิบ กับลาบคั่วเด้อ


แน่ เกือบลืมตั้วบาดได๋ ก่อนกินกะเอาจักหน่อย จักสองขวดเด้อ มันจั่งกินข้าวแซบ สิ่งที่นำเสนอกะคงสิเป็นประโยชน์บ่หน่อยกะหลายเนาะคับ ขอบคุณที่ติดตามรับชมคับผม:heart::heart::heart:
 
37 ท่าน ที่ขอบคุณ แหลวแดง
Blommor, GROOPPY, isdy, pcalibration, Shadow007, thedon, กำพร้าผีน้อย, ข้าวปาด, ข้าวเหนียวกะหมูปิ้ง, คน ตจว., คนตระการ..., คนบ้านเดียวกัน, คนไกลบ้าน2009, ชิงช้าชาลี, ญา ทิวาราช, ตรี ศรีเมืองใหม่, ติ๋ม เปอร์โย, บักขามป้อม, บ่าวกุดชุม, บ่าวจัย, บ่าวน้อยยโส, บ่าวผู้ดี, บ่าวหาร, บ่าวเคน, บ่าวเมืองขอนแก่น, ร้อยหมื่นพันไมล์ไกลบ้าน, ลาวดีน้อย, ลูกหินกอง, สาวเมืองชล, หนุ่มเกษตรกล, หนุ่มเหงาคนไกลบ้าน, หนุ่มแก่นนคร, เขมราฐ, เซียนเมา, เถิกถิ่นหนองคาย, เเมงสะดิ้ง, แหล่โสตาย
01-15-2010, 03:12 PM   #2 (permalink)
ผู้ช่วยผู้ใหญ่บ้านมหา
Mr.Reception

โอ้ยยยยย อยากซดฮ้อนๆ จ้ำลาบไปนำ ผักกับหลายๆ คือสิคักเนาะ.....
 
01-15-2010, 03:42 PM   #3 (permalink)
ดีเจ นักจัดรายการ

ลาบปลาดิบบ่กล้ากินนำดอกจ้า กินลาบคั่วสุกฮ่วมพากับเด็กน้อยดีกั่ว 55+ อยากซดน้ำต้มปลาฮ้อนๆ เด้เนาะคือสิแซบ ที่สำคัญคึดฮอดบรรยากาศกินข้าวฮ่วมพาพร้อมหน้าพร้อมตาครอบครัวจ้า ความแซบมันอยู่หม่องหั่นล่ะ
 
01-15-2010, 03:49 PM   #4 (permalink)
tiwan
Guest

น้ำลายใหลเลยครับ
 
01-15-2010, 04:32 PM   #5 (permalink)
ฝ่ายบริหารระดับสูง

บ่อเคยกินแต่ว่าเป็นตาแซบคัก... ใส่กับบักสองซาว คือสิเข้ากันดีเน๊าะ
 
01-15-2010, 04:42 PM   #6 (permalink)
เจ้าหน้าที่ประชาสัมพันธ์

ป๊าดดดดดดอ้ายดุลไปทางได๋น้อบาดนี้มาเด้อ แนวเจ้ามักมาแล้ว
เบิ่ดละบ้ออ้าย ตักมาทางคุ้มสามเสนแนครับจักหม้อใหญ่ๆเด้อพี่น้องหลายครับ
ได้ผักหนอกของบ่าวจัยไปเก็บมากินกับคือสิแซบคักผมว่าอ้ายแหลวแดงฮึว่าจั่งได๋ฮ่าๆๆๆ
 
01-15-2010, 04:54 PM   #7 (permalink)
แบ่งปันความรู้และประสบการณ์

เป็นตาแซ่บจ้า ถ้าเป็นลาบสุกคือสิคักกว่านี้อยู่
 
01-15-2010, 07:33 PM   #8 (permalink)
ดูแลตรวจสอบเนื้อหา

โอ๊ยยยยยน้ำลายใหลเด่น้ออ้ายอยากิยข้าวนำเด่น้อครับต้มดูกปลาหัวปลาเเฮงเเซบหลายเด่น้ออ้าย
 
01-15-2010, 08:31 PM   #9 (permalink)
ร่วมกิจกรรมนำความรู้

ฮ่วย!บ่ต้องลวกเลยบ้อท่าน จั่งซี่มันต้องฟาดกับ บักสองซาวคือว่าฮั่นหละเนาะ
แล้วกะซดต้มฮ้อนๆล่องคอไปนำ กรึ๊บ อีกจักเถื่อ เหวยสุดยอดเบิ๊ดคำสิเว้าถ่อนั่นแหล่ว พะยะ่ค่ะ


แก้ไขครั้งสุดท้ายโดย เซียนเมา; 01-15-2010 เมื่อ 08:33 PM
 
01-15-2010, 08:49 PM   #10 (permalink)
ศิลปิน นักแต่งเพลง

ขอบคุณสำหรับเมนูอาหารบ้านเฮาครับ อยากคุ้ยนำเด้จักคำ คือสิแซบคัก
 
01-15-2010, 09:13 PM   #11 (permalink)
แบ่งปันความรู้และประสบการณ์

ซดฮ้อนๆจักคำเด้หนอ......อยากคุ้ยลาบปลา
 
01-15-2010, 09:17 PM   #12 (permalink)
ร่วมถ่ายทอดความรู้สู่สังคม

น้ำลายไหลเลย...เป็นตาแซบแท้
 
01-15-2010, 11:41 PM   #13 (permalink)
แบ่งปันความรู้และประสบการณ์

แซบบบ ผักสะเดาน๊าาาา อยากเด๊ ยุหนี่มีแต่แช่แข็งมาขาย บ่แซบ
 
01-16-2010, 10:25 AM   #14 (permalink)
ร่วมถ่ายทอดความรู้สู่สังคม

คือบ่ลวกก่อนจ้า ฮ๋าๆ กินดิบๆ แชบบ่อน้อจ้า...อิอิ แกงเป็นตาแชบอยู่จ้า กินน้ำร้อนๆ ตอนเป็นหวัดคือสิดีเนาะจ้า
 
01-17-2010, 04:39 PM   #15 (permalink)
Administrative

เมนูนี่เปลืองบักสองซาวคักแท้เด๋หนี่เนาะท่านแหลวแดง...บ่ผ่านไฟแหม๋ บ่เคยได้กิน เบิ่งแล้วเป็นตาแซบคัก...
 
ชุมชนบ้านมหา > อาหารการกิน > ครัวบ้านมหา ชวนชิม > อาหารอีสาน


ป้ายกำกับ
ปลาค้าว, ลาบปลา, ลาบปลาค้าว, ลาบปลาค้าวน้ำชี

คำสั่งเพิ่มเติม
เรียบเรียงคำตอบ
แบบตามยาว แบบตามยาว


หัวข้อที่คล้ายกัน
หัวข้อ ผู้เริ่มหัวข้อ ฟอรั่ม ตอบกลับ กระทู้ล่าสุด
ลาบปลาค้าว ทางกาสิน ไก่น้อย อาหารอีสาน 20 11-02-2009 02:42 PM


Custom Search


เวลาทั้งหมดอยู่ในเขตเวลา GMT +7 และเวลาในขณะนี้คือ 07:52 PM


Powered by vBulletin รุ่น 3.8.7 Copyright ©2000-2014, Jelsoft Enterprises Ltd.
Content Relevant URLs by vBSEO
© บ้านมหา.com เว็บไซต์ส่งเสริมการศึกษา ศิลปวัฒนธรรม