ชุมชนบ้านมหา > ภาษาศิลปะวัฒนธรรมและภูมิปัญญาท้องถิ่น > คำผญา สุภาษิต


ตอบกลับ
 
คำสั่งเพิ่มเติม เรียบเรียงคำตอบ
01-31-2010, 07:06 AM   #1 (permalink)
เจ้าหน้าที่ประชาสัมพันธ์
 
 
มาตรฐาน เจ็บแป๋ตาย...อ้ายกะยอมทน

หล่านางเอ๋ย... พอได้ยินคำน้องบอก ว่าจบกันสิได้บ่

บอกว่าพ้อคนใหม่แล้ว เขาคนนั้นเท่คักหลาย

ขอแยกทากฮักกับอ้าย ขอให้ชายหลีกได้บ่

สิไปกับคนที่พ้อ ส่วนโตอ้ายแล้วแต่กรรม

การกระทำที่เคยสร้าง หรือหนทางที่เคยเกี่ยว

เหลือคนเดียวแค่โตอ้าย คนฮักพ่ายต้องอยู่ทน

หากเขาดีกว่ามากล้น อ้ายยอมทนให้เจ้าหุ่ง

อ้ายบ่ขอเขาไปยุ้ง ขอให้รุ้งไปดั่งฝัน

มื้อได๋เจ็บบ่อาจกลั้น ให้ฟ่าวหันทางนี้ก่อน

มื้อได๋นอนน้ำตาร่วง อ้ายคนนี้สิรับคืน.....

มือใหม่ครับ....บืนบกบืนบากไปนำเผิ่นช่อยกันชี้แนะน้องนุ้งแหน่เด้อครับสิไปพัฒนามาใหม่ครับ
 
01-31-2010, 07:15 AM   #2 (permalink)
แบ่งปันความรู้และประสบการณ์
มาตรฐาน

ผุได๋น้อเฮ็ดให้น้องชายหล้าเอื้อยเจ็บมาเป็นตาซังแท้
 
01-31-2010, 07:23 AM   #3 (permalink)
ศิลปิน นักแต่งผญา
มาตรฐาน

ฟังควมซายอ้ายวัตย์เว้า
บอกว่าสาวขอลาก่อน
นางออนซอนใจอ้าย
มาดีแท้หลื่นคน...แท้น้อ
ฮักเคยรอฮ่วมสร้าง
สาวมาพังเป็นแนวใหม่
แต่จั่งได๋อ้ายผุนี้
กะรอเจ้ายุซุยาม...พะนะ
ออนซอนนำเจ้าเด้
อ้ายเอิกเพเขาบ่ห่วง
อ้ายทนเหงาเขาสุขล่วง
คนห่วงอ้ายกะคึดนำ...ยุเด้อจ้า
อ้ายบ่าวเอ๊ย
 
01-31-2010, 08:01 AM   #4 (permalink)
แบ่งปันความรู้และประสบการณ์
มาตรฐาน

อ่านผญาซึ้งตรึงใจผู้ได้อ่าน อ่านผญาเศร้าเหงาใจผู้จอบฟังซั่นแล้ว พี่น้องเอย
 
02-03-2010, 04:46 PM   #5 (permalink)
แบ่งปันความรู้และประสบการณ์
มาตรฐาน

มาเป็นกำลังใจให้จ๊า...ได้การยุเดะล่ะอ้าย...สู้ ๆ จ้า
 
02-03-2010, 05:01 PM   #6 (permalink)
ร่วมถ่ายทอดความรู้สู่สังคม
มาตรฐาน

อ้ายชายเอ่ย อย่าสิคิดนำเขาหลาย
บ่ได้มีแต่เขาคนเดียว สาวอื่นอ้ายกะเหลียวเบิ่งเนเด้อจ้า..

มาเที่ยวนี้เศร้าแท้น้อจ้า สู้ๆๆ แต่งม่วนดีจ้า..
 
02-06-2010, 03:06 AM   #7 (permalink)
แบ่งปันความรู้และประสบการณ์
มาตรฐาน

มาสงสารแท้หล่ะอ้าย เฮาผู้ซายถืกถิ่มถ่ม
หลงคารมสาวผู้นั่น(จั้กผู้ได๋)สาวผมสั้นหรือผมยาว
หรือเป็นสาวมักเว้า ลมลวงเอาป้อนเข้าใส่
หรือเป็นสาวทรงใบ้ เทียวใซ้แต่สายตา
หรือว่าเป็นคนแถวนี้ แม่นซิมีอยู่บ้อหว่า
หรือเป็นสาวบ้านมหา ผู้มาลวงหลอกต้มให้ซายล้มลุกบ่ไหว
เจ็บคือกันน้ออ้าย สาวบ้านได่กะตามสร่าง
ถึงเป็นสาวแม่ฮ้าง กะเจ็บย้อนบ่ต่างกัน
อดสาเอาเด้ออ้ายมโนนัยอย่าอุกอั่ง
กัดเทิงแข่ว เทิงฟัน กัดจนดังก้อดก้อด น้ำตาเจ้าอย่าให้เห็น อ้ายเอ้ย
เขาซิสมน้ำหน้าเฮา หลูโตนอ้ายข่อยคัก
 
02-06-2010, 06:43 AM   #8 (permalink)
ศิลปิน นักแต่งผญา
มาตรฐาน

ฟังอ้ายรอย สอนอ้ายวัตย์ มาซงเป็นตะเส้นเลือดแตกในสมองแท้จ้า กัดแข่ว ทนเอาพะนะ...อิอิ
 
02-06-2010, 07:01 AM   #9 (permalink)
เจ้าหน้าที่ประชาสัมพันธ์
มาตรฐาน

ขอบใจอ้ายรอยเด้อที่มาบอกน้องนุ่งให้อดทนฟังแล้วถืกใจคัก ปะอ้ายเฮาไป ว.4ทางน้ำแก้ความเจ็บจัก 2กลมกะหนาเถือลืมเขาได้ฟ่าวๆเด้ออ้ายน้องสิอาบน้ำถ่า
 
02-06-2010, 07:02 AM   #10 (permalink)
ศิลปินแดนไกล
มาตรฐาน

แมนเจ็บหลายปานได๋อ้าย เจ็บแป๋ตายมาซ่างว่า
คือสิเจ็บเอาหนักหนา มาเป็นตาหลูโตนแท้
คือสิแย้แท้อาการ แมนสาวได๋คนผู้นั่น
คงสำคัญสำหรับพี่ คั่นเจ็บหลายเอาซ่ำนี่
บอมีได้สิซ่อยไหว เจ็บร่างกายยังพอเว้า
เอายาใส่กะยังหาย แต่เจ็บใจไผ๋สิฮู้ว่ายานั่น
มันอยู่ไส อิอิอิอิ เซาเจ็บสาเถาะจ้า เมื่อยนำอิอิอิ
 
02-07-2010, 02:54 AM   #11 (permalink)
แบ่งปันความรู้และประสบการณ์
มาตรฐาน

โอย อ้ายวัฒน์บ่สันทัดดอกทางน้ำ ทางนี้หน่ำแต่ทางกับ
เคยได้ยินบ่น้อครับ เสือขยับกับแกล้มพินาศ พุ้นแหล่ว
 
02-07-2010, 03:33 AM   #12 (permalink)
Maximum learning
ศิลปิน นักเขียน
มาตรฐาน

เข้ามาอ่านแล้ว มีแต่ม่วนๆๆ ทั้งนั้นเลยเน๊าะ

คือเป็นตาหลูตน แท้ ชอบมากเลยค่ะ
 
02-07-2010, 12:37 PM   #13 (permalink)
ศิลปิน นักแต่งผญา
มาตรฐาน

จากใจหม่นของคนพ่าย ขอระบายพอได้ส่วง
มันอุกอั่งอยู่ในทรวง ตั้งแต่ดอกดอกไม้ เจ้าถิ่มอ้ายไปแต่งเขา
กะดีใจนำคะเจ้า แม่นว่าเฮาสิหมองหม่น
เจ็บแป๋ตายกะสิทน ถึงเป็นคนแพ้พ่าย สิฮ้องไห้อยู่ผุเดียว
หนทางเทียวอันอ้างว้าง อ้ายสิย่างคนเดียวดาย
ถึงสิตายซ้ำสา อย่าหัวซาเถาะเนาะน้อง
ตำแหน่งครองความช้ำ กะยังนำอยู่คือเก่า
เป็นตำแหน่งของเฮา บ่อยากเอาแต่กะได้ แชมป์ความพ่ายพ่วงท้ายความผิดหวัง
บ่เป็นหยังดอกน้องหล่า เสียน้ำตากะตามพี่
บ่มีค่าสำหรับเจ้า เพียงอยากเว้าว่า "คิดถึง"
จากมุมหนึ่งของโลกนี้ ให้คนดีที่อ้ายฮัก
แม่นสิเจ็บปวดคัก ปานเข็มปักหัวใจพี่ สิกัดแข่วทนเอา...ดอก นางเอย..
 
02-07-2010, 03:40 PM   #14 (permalink)
Super Moderator
มาตรฐาน

เข้าอ่านเห็นชื่อกระทู้ครั้งแรกตกใจเบิดเลย
ว่าแม่นไผ๋เป็นหยัง..?
เขียนผญาม่วนๆๆจ้า
อ่านบางครั้งบางตอนจิตนาการไปนำกะเห็นภาพเลย
เกี่ยวเรื่องราวที่เขียน...ให้กำลังใจคนที่กำลังเขียนใหม่เด้อจ้า
ชื่นชมกับเอื่อย อ้ายผู้เป็นเซียนผญาทุกคน
คนหล่าสิแวะมาหลอยอ่านเรื่อยๆๆเอาดอก..อิอิอิอิ
 
02-08-2010, 01:39 AM   #15 (permalink)
แบ่งปันความรู้และประสบการณ์
มาตรฐาน

บ่ทันเก่งดอกหล่า แนวผญาพวมออกหน่อ
บ่ทันได้เคิ่งท่อ อีพ่อศรีสะท้าน ครูบาบ้านต่อผญา เลาซั่นแล้ว
ขออนุญาตบาดคำอ้างอาจารย์ศรีแน่เด้อครับ ขะน้อย
 
ชุมชนบ้านมหา > ภาษาศิลปะวัฒนธรรมและภูมิปัญญาท้องถิ่น > คำผญา สุภาษิต

ตอบกลับ

ป้ายกำกับ
ผญา

คำสั่งเพิ่มเติม
เรียบเรียงคำตอบ
แบบตามยาว แบบตามยาว




เวลาทั้งหมดอยู่ในเขตเวลา GMT +7 และเวลาในขณะนี้คือ 10:22 PM


Powered by vBulletin รุ่น 3.8.7 Copyright ©2000-2014, Jelsoft Enterprises Ltd.
Content Relevant URLs by vBSEO
© บ้านมหา.com เว็บไซต์ส่งเสริมการศึกษา ศิลปวัฒนธรรม