ตั้งแต่กี้แต่ก่อนเพิ่นใช้ม้าแทนรถ เต้นขึ้นขี่หลังยศแล้วกะแล่นซำซำ
สิไปร้องไปลำบ้านนั้นบ้านนี้ บ่มีรถสิขี่มีแต่ม้ากับเกวียน
กลับคืนมาฮอดเฮือนจนดากแดงอ่งต่ง ม้ามันพาข่วมท่งข้ามโคกข้ามดอน
จักว่ายอกหรือคอนอีมะแล๋แถแถด จนหำแปหำแป้ดดากด้านปานลิง
ส่วนว่าดากผุญิงกะหากเป็นตาหน่าย หยังกะแดงจ่ายว่ายถ้าผุขี่ไกล ไกล
ไปอาบน้ำเทื่อได๋กะแสบจนหลงเต้น กะโนนก้นสะเม่นปานถืกเกลือทา
สมัยนี้ต่อมากะยังไคหลายเติบ ดากบ่ได้แตกเขิบคือแต่โบราณ
เพราะมีรถโดยสารเถิงกันสุบ่อน ม้าแต่กี้แต่ก่อนผั่นกินหญ้ากินฮำ
ม้าเฮาขี่ประจำเดี๋ยวนี้คุณแม่ มันหากกินตั้งแต่โซล่าเบนซิน
บาดสิกินแล่นเข้าหาแต่ปั๊ม มีท่อใด๋กะหย่ำจนว่าตดเป็นควัน
บ่ได้กินแล้วรวนยืนอยู่กับที่ แม่นสิป้ายขึ้นขี่กะบ่วิ่งบ่เดิน
คันเจ้าของจกเงินซื้อให้ยัดหย่อ เบิ่งเพิ่นวิ่งเพิ่นห้อแหมไปสุดทาง
ขึ้นถนนลาดยางผั่นพอปานมีปีก คันผุใด๋บ่หลีกให้ระวังคางเหลือง
แท้แม่นอยู่ในเมืองม้าสมัยใหม่ จักผุน้อยผุใหญ่ขี่กันแซวแซว
ลางเทื่อตำบักแอวกันลงเอดเลด เกิดอุบัติเหตุตายเอ้าตายเอา
เขาขี่ม้าป่งเขาทำจากญี่ปุ่น ขี่ไปแหน่กะมุ่นได้ซ่อมได้แซม
ฟังเสียงแหมกะบ่คือม้าแกลบ ดังจนว่ามันแสบแก้วหู รู...
จักแม่นพวกโก๋กี๋หรือวัยสะรุ่น ได้ขี่ม้าญี่ปุ่นแล้ววางมาดอาจอง
ทำตัวปานเฉินหลงนั่งอุจจาระ บาดเพิ่นสิก่างก๊ะป้ายขึ้นป้ายกวม
ถ่ากางเกงหลวมหลวมกะยังไคจักนิด ถ่ากางเกงฟิตฟิตป้ายขึ้นยามใด๋
เพิ่นผุอยู่ทางในผั่นเลี้ยวซ้ายหล่างง่าง ส่วนผุญิงหยังกะโกนจ่างป่างถ้ำพระยาทอน
ข้าวต้มผัดสองลอนล่ะเทิงเปเทิงเป้ด เบี้ยวปาน...ผีเผดย่างข่วมคันแท
หมอแคนเห็นแล้วแลจนว่าตาเหลือก กลืนน้ำลายลงเอื้อก เสียงจ่มพุมพุม กูอยากเอามือหยุมเบิ่งเด้จักเทื่อ5555 (เอ้าสอยแมะ555)
ว่าบ่เซื่อกะถามข่อยเบิ่งตี้ สายตาดีกะแม่นหมอแคนใหญ่
ว่าแต่เห็นเขาใส่กระปอกกระโปง สิก้าวขึ้นก้าวลงล่ะสะเวิบสะวาบ
เห็นขาขาวมาบมาบขี่มอเตอร์ไซด์ ฮอดบ่อยากไปไสจ้องปานยิงนก
ซ้ำบ่หนำมีดพกกะวางมาดอาจเส็ง ตุงออกเป้ากางเกงพอปานจุดสามแปด
คอบเพิ่นแนเพิ่นแพดใส่แต่กกขาขาว ลุโตนเด้น้ออาวอึดกินอึดอยู่
แนมตั้งแต่ของหมู่ซามเหมิดงานลำ วาสนาของหำเจ้ากะพอปานนี้
ซ่างมันเถาะคุณพี่อย่าไปคิดมันหลาย บ่ได้กินกะบ่ตายดอกข้าวหนมแหนบ
มันบ่นัวบ่แซบคือต้มคือแกง ซ้ำบ่หนำเหมิดแฮงตีนซาขาหล่อย
เห็นบ่ข่อยจนจ่อยกะสิหาทางเซา เดี๋ยวนี้ขี่แต่ม้าป่งเขาไปหาลำหาร้อง
บ่ได้ไปเกี่ยวข้องกับม้าขาเงิง ส่วนผุท้ายฮาวเขิงผั่นมักขี่ม้าโยก
บ่แม่นขี่ข้ามโคกข้ามท่งข้ามดอน ขี่ตั้งแต่ยามนอนป้ายขึ้นแล้วควบ
หยังกะดังจ๊วบจ๊วบปานหมูกินฮำ บาดนี้ ไปทางบ้านหมอลำสกลก้นกลาก
เขาผั่นขี่วิบากหนุ่มห่าวสาววอง ไปกันสองต่อสองติดแอวอ้อนต้อน
คันผุสาวนั่งซ้อนไอ้หนุ่มกลัดมัน ผั่นหากแล่นเบิดหันเบรกดังอ้วดเอี้ยด
ผุสาวโย้มาเบียดนมตุ๊ทางหลัง เนิ้งใส่กันจังจังว่าเบาเบาแหน่พี่พะนะ
ทีแรกนั้นกะขี่ท่าธรรมดา บาดขี่ไปขี่มาผั่นกอดแอวอุ้มลุ้ม
ซิ้นทางเทิงทางลุ่ม ซิ้นโค้น ซิ้นสัน เบียดเข้าไปหากันกะเลยเกิดซู่ซ่า
หน๋อยกะแวเข้าป่า ถิ่มฮอดขี่ม้าป่งเขา ไปขี่ม้าสีเทาแผงดำกื่อจื่อ
ขี่บ่ขี่ซื่อซื่อผั่นโยกไปโยกมา จักว่าแขนว่าขาพันกันอูดหลูด
เสียงถั่งดังกู้ดกู้ดคือสิแซบสินัว คันว่าหน้าลาวตั๋วไปถามเฒ่ายาวเบิ่ง 55555 ฮิ้วๆๆ สอย ๆ เอ้าสอยบาดที่นี่55555
Bookmarks