ชุมชนบ้านมหา > อาหารการกิน > ครัวบ้านมหา ชวนชิม > อาหารอีสาน


 
คำสั่งเพิ่มเติม เรียบเรียงคำตอบ
12-21-2011, 10:02 PM   #1 (permalink)
ดีเจ นักจัดรายการ
 
รูปส่วนตัว นู๋น้อย
 
แกงปลาค่อใส่ผักแก่นขม


แกงปลาค่อใส่ผักแก่นขม

:l- สำบายดีจ้าพี่น้องชาวบ้านมหา มื้อนี้มีเมนูอาหารพื้นบ้านทางอิสานบ้านเฮามาฝากคือเก่าจ้า
บ่สาธยายหลายควมเริ่มเข้าครัวกันเลยหลังจากที่ไป หย่างตลาดยามแลงๆมาได้ปลาค่อ(ปลาช่อนนา)กิโลละ 150 บาท
กับ ผักแก่นขม แก่นส้ม พระเอกของงานขีดละ 5 บาทหรือกิโลละ 50 บาทกะถือว่าบ่แพงถ้าบวกค่าขนส่ง


แกงปลาค่อใส่ผักแก่นขม

ล้างน้ำทำความสะอาดเด็ดเอาตะยอดอ่อน เลือกบ่ถืกว่าอั่นได๋แก่นขม อั่นได๋แก่นส้ม อิอิ หยุ๋มใส่กันเบิ้ดเลยละนางกะดาย
ย้อนว่าจื่อบ่ได้ตะน้อยๆแม่ใช้ไปหาผักแก่นขมมาใส่ต้มปลาแหน่นาง เผิ่นว่า เอาตะผักแก่นขมเด้อ
นางกะบ่ฮู้แล่วว่าแนวได๋คือผักแก่นขม นางกะโสก แซะมาเบิ้ดเลยว่าแต่ต้นคือๆกัน เป็นว่าใช้ได้
(นาติดบ้านหย่างลงท่งไปห้านาทีกะฮอดแล้วจ้า ริมฝั่งสระน้อยหม่องนอนเวน กะหาโสกเอาแถวๆฝั่งสระน้ำนั้นละ)

ภาษาอิสานมื้อละคือ โสก = เป็นคำกริยา ความหมายคือ แซะ ถาก ถาง แต่จะใช้กับอุปกรณ์น้อยๆ
อย่างเช่นว่า อิแม่ใช้ไปโสกหญ่าในป่ามอน กะหมายถึง แม่ใช้ไปแซะหญ่าในป่ามอน เป็นต้น...



ซื้อมา 2 ขีด เด็ดยอดเลือกหญ้าออกแล้วเหลือท่อนี้ละจ้า

แกงปลาค่อใส่ผักแก่นขม

ลัดขั้นตอนการคัวปลาค่อ(เพื่อความสบายใจของคนที่รักษาศีลห้า)นางขออภัยและขอบคุณเผิ่นแล้วละน้องปลา แกงปลาค่อใส่ผักแก่นขม

แกงปลาค่อใส่ผักแก่นขม

ผักหอมและเครื่องปรุง จ้า (ผักกะแยง ตะไคร้ ข่าอ่อน)

แกงปลาค่อใส่ผักแก่นขม


ตั้งหม้อใส่น้ำพอเอ๊าะเจ๊าะ เพื่อซดน้ำแล้วก็ ทุบตะไคร้ ฝานข่าอ่อนเป็นแว่นๆ โยนลงใส่หม้อ
พร้อมๆกับเกลือปรุงรสเพื่อความกลมกล่อม และที่ขาดบ่ได้กะคือ น้ำนัวของอร่อยนั้นก็คือ...น้ำปลาร้า ใส่ลงไปทัพพีน้อยหนึ่ง

แกงปลาค่อใส่ผักแก่นขม

รอจักครู่ หม้อน้ำแกงเดือด ก็เชิญน้องปลาลงเล่นน้ำ อิอิแล้วก็ปรุงรสด้วย ผงนัว(ผงชูรส) ใส่ข้าวคั่วเพื่อเพิ่มกลิ่นหอมของน้ำแกง

แกงปลาค่อใส่ผักแก่นขม

แล้วก็ปิดฝาหม้อจักครู่ หม้อเดือดแล้วหยุ๋มผักแก่นขม แก่นส้ม ลงไปปิดฝาหม้ออีกรอบ นับ 1-10 ในใจ

แกงปลาค่อใส่ผักแก่นขม

แล้วก็เปิดฝาหม้อใช้ทัพพีคนไปคนมา สองรอบกะพอย้านปลาเละบ่สวยงาม ซิมรสชาตเบื้องต้นก่อนว่าขมหรือส้ม
ปรากฏว่าออกรสขมมากกว่าส้ม นางกะเลยหาวิธีแก้ไขและแล้วก็คึดพ้อว่ามีบักกอกในตู้เย้น
แต่...บักกอกบัดสุกเละเบิ้ดเหลือบักกอกกำพร้าหน่วยเดียวกะเลยใส่ท่อนั้นละ เสี่ยงดวงเอาว่าบักกอกจะส่อยชูรสชาตของแกงให้แซบได้บ่

แกงปลาค่อใส่ผักแก่นขม

ผลที่ได้จากการทดลอง ปรากฏว่าแซบ จ้า แกงปลาค่อใส่ผักแก่นขม ขมอ่ำล่ำ ส้มบักกอกนิดๆ เริ้ดไปเลย
ใส่ผักกะแยงกับต้นหอมปิดท้ายความอร่อย และเย๊าะน้ำปลาใส่อีกนิดหนึ่งก็เป็นอันเรียบร้อย จ้า

แกงปลาค่อใส่ผักแก่นขม

ตักใส่ถ้วยเสริ์ฟทันที เพราะหิวข้าวจนตาลาย มื้อนี้ตะลอนทัวร์ไปทำธุระในเมืองจนบ่ได้กินข้าวเที่ยง

จะกินกะพอกะเทินรวบยอดไปเป็นอาหารแลง พานะ :l-

แกงปลาค่อใส่ผักแก่นขม

กินของคาวแล้วกะบ่ลืมจัดเมนูล้างปากจักหน่อย จ้า อิอิ

แกงปลาค่อใส่ผักแก่นขม


สุดท้ายนี้ :*- Baanmaha.com
และ ขออภัยอย่างสูงหากเมนูนี้ไปทำร้ายจิตใจหลายๆคนที่บ่ได้กินแกงปลาใส่ผักแก่นขมมาเป็นเวลาหลายปีแล้ว
นางอยากบอกว่า มันแซ๊บ แซบ จ้า แกงปลาค่อใส่ผักแก่นขมแกงปลาค่อใส่ผักแก่นขม จากใจจริง

แก้ไขครั้งสุดท้ายโดย นู๋น้อย; 05-29-2012 เมื่อ 11:40 PM
 

12-22-2011, 05:49 AM   #2 (permalink)
ศึกษาหาความรู้
มากินเข่าแลงนำนู๋น้อยหนิได่หลายอย่างแท่อิ่มท้อง,แล่วกะได่
เฮียนภาษาอิสานนำดีแท่ๆ แตงค์กิ้วเด้อหล่า
 
12-22-2011, 06:42 AM   #3 (permalink)
ดูแลตรวจสอบเนื้อหา
ขอบคุณนะ ดีเจนู๋ซด..ฮ้อนฮ้อนเบิ่งเด้..ห้ามเป่านะ
เดี๋ยวบ้องหู..5555:b-b:b-b
อั่นปลาโตใหย่ใหญ่จั่งซี่อั่นจัดการเอง
หือใช้แม้ค้าหละหล่า."ปุ๊หัว".อะ๊หยืยส์เสียวว้อย..

:l-:l-:l-:l-
 
12-22-2011, 06:46 AM   #4 (permalink)
ร่วมถ่ายทอดความรู้สู่สังคม
เป็นเมนูที่บ่เคยเฮ็ดกินสิได่ไปลองเบิ่งแล้ว สุเทื่อไส่ผักไซขี้นก คับขมอ่ำล่ำคือกัน
 
12-22-2011, 06:47 AM   #5 (permalink)
เจ้าหน้าที่ประชาสัมพันธ์
ช่างภาพอิสระ
นึกว่าแมนลักเมือบ้านไปเก็บผักขมยูทางสีเกดเอามาแกงใส่ปลาค่อแมะ เห็นใส่(พุง)ปลาค่อแล้วมีคนจองยัง แนวมักหลายเด็กน้อยกะห่ามกินคือกันใส่ปลาค่อ ผิดแท้ๆ ผิดใจผูเฒ่า....



เอาต้มปลาหลาดมาแซมพาเข่านำ เอามากินเป็นหมู่แกงปลาค่อใส่ผักขมเบิ่งกะน้าคือสิแซบคัก กินนำกันหลายๆฅน มาๆลุงใหย่พายติบเข่าเหนียวมานำเด้อ.....

 
12-22-2011, 07:01 AM   #6 (permalink)
ที่ปรึกษาด้านกฎหมาย
เมื่อตอนเป็นเด็กน้อย ไส้และหัวปลา+ตับไก่ไตไก่ เป็นของต้องห้ามสำหรับเด็ก..ห้ามแตะต้องเด็ดขาด..ลุงใหญ่ อธิบายให้ฟังแหน่ เป็นหยังเขาคือห้ามกิน..
 
12-22-2011, 07:27 AM   #7 (permalink)
ดีเจ นักจัดรายการ
อ้ายพี แบบว่าตอนแรกกะยังบ่สลบดอกจ้าปลาค่อ กะดาย แต่ว่ากั่วจะหย่างฮอดบ้าน ได้ยินแต่มันดิ้นสองสามเทื่อแล้วกะเงียบไป มาฮอดบ้านน้องปลาเทอร์สวอยไปแล้วจ้า บ่ต้องออกแฮงปุ๊หัาปลาเลย อิอิ

ลุงใหย่ พายติบข้าวมาเลยจ้าลุง

อ้ายทางโคราช ณ กะสิน แบบว่าเมือสีเกดจั่งกินอีกเทื่อ นี้รอบ่ไหวอยากกินแฮง ฮ่าๆๆ มาๆจ้าอ้าย เห็นข้าวใหม่ตาแซบแท้

ตอบอ้ายเสริฐ น้องกะบ่รู้จ้าว่าเผิ่นห้ามเพราะหยัง แต่ทุกเทื่อที่ได้กินแกงไก่กับต้มปลาค่อใหย่ อิพ่อใหย่หนวดกะสิว่า เด็กน้อยอย่ากินเด้อ มันจะเว้ายากแล้วกะดื้อกะมึน แต่น้องบ่เชื่อดอกจ้า แนวแซบผุถ่าวจะกินเองติ น้องกะเลยยาดกินนำสุเทื่อคือกัน เพื่อทดสอบว่าแม่นควมจริงบ่ ปรากฏว่า ดื้อและมึนอิหลี คือสุมื้อนี้ละ ฮ่าๆๆๆ
 
12-22-2011, 07:36 AM   #8 (permalink)
ศึกษาหาความรู้
บ้านนี่บ่เฮ็ดการเฮ็ดงานติหาตะแนวกินมาอ้างกันเวอยๆๆๆจักถ้วยแหน่
 
12-22-2011, 07:39 AM   #9 (permalink)
ฝ่ายกิจการพิเศษ
คักแท่ว่าเมนูนี่ สุดยอด บ่ได้กินดนแล้วแต่กะยังบ่ลืมดอก ทางบ้านอ้ายเอิ้น ผักส้ม/ ผักขม...คล้ายๆกันทั้ง2 อย่างหละ เห็นแม่ค้าเอามาขายหละมีแต่ผักขม หลอยเด็ด
มาชิมเบิ่ง..กะเลยยังบ่ทันได้กิน ถ่าให้มีผักส้มผุ้นหละจั่งสิแล้ว....
 
12-22-2011, 08:33 AM   #10 (permalink)
ร่วมกิจกรรมนำความรู้
ตาแซบเนาะต้มปลาค่อ เปิดมาพ้อยามเซ่าหิวเข่าเลยครับ
ว่าแต่ ผักแก่นขม ทางบ่อนผมอยู่คือบ่เคยเห็นมี แล้วกะบ่เคยได้ยินเลย ผุได๋ฮู้ซ่อยบอกแหน่ครับ บัดลางฮ่าได้ลองกินเบิ่ง
 
ชุมชนบ้านมหา > อาหารการกิน > ครัวบ้านมหา ชวนชิม > อาหารอีสาน


ป้ายกำกับ
แกงปลาใส่ผักแก่นขม

คำสั่งเพิ่มเติม
เรียบเรียงคำตอบ
แบบตามยาว แบบตามยาว


Custom Search
วันไหลพัทยา 2558, ตั้งสายกีต้าร์ ผลสอบ มสธ, ซื้อโทรศัพท์รุ่นไหนดี, ฟังเพลงลูกทุ่งออนไลน์, การเพาะเห็ดฟาง, อาหารอีสาน, สงกรานต์เที่ยวไหนดี

เวลาทั้งหมดอยู่ในเขตเวลา GMT +7 และเวลาในขณะนี้คือ 11:53 AM


Powered by vBulletin รุ่น 3.8.7 Copyright ©2000-2015, Jelsoft Enterprises Ltd.
Content Relevant URLs by vBSEO
© บ้านมหา.com เว็บไซต์ส่งเสริมการศึกษา ศิลปวัฒนธรรม