แนวยูแนวกิน อิสานบ้านเฮา

[ฅนภูค่าว]

มีโอกาสได่เมือบ้านอาทิตย์ที่ผ่านมา ๕-๖ พ.ค. ๕๕ วันเสาร์เลยไปตลาดแลงในโตอำเภอสหัสขันธ์ เลยเก็บภาพแนวยูแนวกินของบ้านเฮากะตามฤดูกาลบ้านเฮามาให่เบิ่งกัน คึดฮอดไทพีน้องเฮาที่ไปทำมาหากินยูต่างบ้านต่างเมือง....

ประเภทปลา ปลาแดดเดียว ปลาย่าง ปลาเขื่อนลำปาว ไทบ้านส่วนหนึ่งที่ยูใกล้น้ำเขื่อนกะยึดอาชีพหาปลามาขาย มีกินยูเหมิดปี



ราคากะพอซื้อกินได่ ปลาย่างกองละ ๕๐บาทกะมีหกเจ็ดโต แกงใส่หัวปลียุสวนกะของกะสิบ่แล้วแลงยูบ้อ






หน่อไม่กะเริ่มออกแล้ว หน่อฮวก ไผ่เลี้ยงน้อง เอามาแกงใส่อีลอก กะสิบ่แซบยูบ้อแนวมันถึกกัน





เห็ดไคกะเอามาจี่แล้วกะป่น กินกับผักบ้านเฮา บ๊ะกะว่าแมนคักเติบยูดิหละ

เห็ดไคกะทงละ ๕๐บาทเด้อครับตอนนี่ สมัยแต่กี้เข่าป่าเก็บเห็ดได่ โซนออกมาหลายคัก แบ่งไทพีน้องกินกันซือๆ สมัยนี่ไปเก็บมากะขายให่กันในราคามิตรภาพ กะทงละ ๓๐บาท

เห็ดแนวอื่นกะเริ่มออกแล้วคือกัน แต่เห็ดขอนขาวกับเห็ดบด ฯลฯ มีกินยูเหมิดปี สามารถเพาะเลี้ยงได่

ส่วนแมงแคงจิก หน่านี่หละครับ พากันเข่าโคกหาสั่นเอานำต้นจิก กะบ่ผิดหวังแค่สิกินแลง ฮอดได่ป่นไปจังหันพร้อมพุนหละ ยุในตลาดกะขายกองละ ๒๐บาท สามกองกะได่ยู ๕๐บาท

มาเด้อพี่น้องมากินป่นแมงแคงจิกนำกานนนนนน.....

ไผมักแนวได่กะเฮ้ดกินเอา สูตรไผสูตรมัน แซบไผแซบมัน อิ่มไผอิ่มมัน ขอให่ไทพี่น้องบ้านมหาเฮา มีควมสุขกับการกินแนวยูแนวกินอิสานบ้านเฮาเด้อครับเด้อ....

ขอขอบคุณพื้นที่บ้านมหาดอทคอม ที่ให่นำเสนอ "แนวยูแนวกิน อิสานบ้านเฮา"

[ณัฐ ภูไท]

โอ้ยเบิ่งแล้วกะมีตะของแซ่บๆๆเนาะไล่มาตั้งแต่ปลาแดดเดียว เห็ด หน่อไม้ สุดยอดกะคือแมงแคนจิกอันนี้ของมักหลายสั่นหละแมงแคนโจ้นมันๆๆๆเนาะกินกับข้าวเหนียวคักหลายขั่วแมงแคนขอบคุณหลายเด้อคนภูคร่าวที่เอาฮูปมาแบ่งปัน

[pcalibration]

โอ้ยเนาะท่านฯกะดาย..ขอบคุณขอบคุณเบิ่งแต่ฮูปกะเอา
จักสิให้กินนำแนวได๋เบิ่งได้แต่ฮูปน้ำลายไหลโจ้กโจ้ก
อยากไปหาเลาะให้แมงแคงเหงี่ยวใส่ตาเบิ่งเด้

[lungyai1123]

มันกะสิแซบอีหลีหละเน๊าะเหมิ่งแตฮูปกะพอแฮงแล่ว
หึ่ยหละมีต่าเอามาล่อ

[เปี๊ยกครับ]

มีแต่แนวเป็นตาแซบ

[เซียงสีผีเป้า]

เฮ็ดบาปพุอยู่ กทม แท้น้อครับ อยากกินป่นแมงแคง คือสิแซบคัก

[นู๋น้อย]

อิรอก เห็ด ..หน่อไม้ ขอเบิ้ดดด ของโปรด

[พ่อบักเสก]

แจ่วแมงแคงจิกคือเป็นตาแซ่บแท่.....น้ำลายไหล

[คนบ้านยาง]

เห็ดไค แม้อ้ายเอาจี่แล้วตำแจ่วพริกดิบ สุดยอด กินกับคั่วแมงแคงจิก แมงแคงค้อ แซ่บบบบบบบบบบบ อย่างคักเด้ออ้าย กินเผื่อแน้เด้อครับ

[หล้า]

มีแต่แนวอยากเด้อบัดทีนี้แต่ขอยกเว็นแมงแคงเด้อจ้าบ่เคยกิน. หน่อไม้เป็นตาต้มกินกับน้ำพริกกะปิเผ็ดๆออยน้ำลายไหล

[หนุ่มน้อยศรีสะเกษ]

เอาเห็ดไคมาป่น ทอดปลาแห้ง ป่นแมงแคง โอ้ยแซบๆๆๆ

[หนุ่มสารคาม]

เบิ่งยามใดน้ำลายไหลยามนั่น

[หนุ่มเซกา]

เห็นแล้วกะคึดฮอดบ้านตุ้มผาขี่ บ้านตีผาเงียว บ้านไผ่เขียวสุมเขตเวียงจันทร์ เมืองแสนพันธ์บ้านพีเมืองน้อง บ้านน้ำต้องท่าบ่น้ออาว

[พล พระยาแล]

แมงแคงจิก ทางบ้านผมบ่มีแมะครับอ้าย มีแต่แมงแคงแนวขิว ๆ โตดำ ๆ หล่นใส่ถ้วยป่นนั่นแมะครับ

ทางภาคกลางเอิ้น แมงกะแท้ ซั่นครับ ขอบคุณครับอ้ายสำหรับแนวอยู่แนวกินบ้านเฮาครับ

[กำพร้าผีน้อย]

..คักๆอ้าย..อุดมสมบูรณ์..แมงแคงจิกบ่เคยเห็นดนแล้ว..เพราะที่บ้านหาต้นจิกสิบ่ผ้อแล้ว

ป่าโคกถืกถางเป็นไฮ่-นาเบิดแล้ว..

..อยากเห็นภาพท่าปลาบ้านนาสีนวลแหมะอ้าย..ตอนเพิ่นเอาปลาขึ้นมาจากเขื่อนใหม่ๆ..จัดมาให้เบิ่งแน...ผมเคยไปซื้อปลา เพิ่นให้เลือกเอาเลย..ประทับใจหลาย.....