มีเมนูอาหารป่ามาฝากพี่น้องบ้านมหาครับ นั่นกะคือ "อ่อมเอี่ยน" เฮ็ดกินอยู่เฮือนพ่อเถ่าตอนกลับบ้านปีใหม่ เพินใส่บั้งลันได้มาขังไว้ถ่าลูกหลาน
เมือยามบ้านเที่ยวนี้เฒ่าพ่อเพินย้ายเครื่องครัวแนวแต่งอยากแต่งกินมาไว้เพิงยุในสวนข้างเฮือน เอิ้นว่ากินข้าวท่ามกลางบรรยากาศในสวนกะว่าได้
นี่ล่ะครับเพิง หรือเถียงนาน้อยที่ว่า เปิดป้ายเป็นสำนักงานกลองยาวของหมู่บ้านพร้อม
เครื่องครัว แนวแต่งอยากแต่งกินครับ
สถานที่ในสวน เฮ็ดเป็นหม่องนั่งกินข้าว ผิงไฟแก้หนาว เว่านัวหัวม่วนกันยามเช้า ได้ยินแต่พ่อเถ่าเพินเว่ากับหมู่ว่ามื่ออื่น (31 ธ.ค.56) สิเอาหมูกี้มาย่าง
ให้บักทิด (ผมเอง) เอาเครื่องเสียงมาเปิดงันปีใหม่วาซั่น
ทางเข้าสวนกะเอามัดเฟืองเฮ็ดซุ้มประตูพร้อมเด้
มาครับ เว่าเถิงเมนูอ่อมเอี่ยนเฮาบาดทีหนิ หลายท่านอาจสิคุ้นเคยกันดี ย่อนผมเอาเมนูนี้ลงหลายเทือแล้ว แต่คนละบรรยากาศ คนละช่วงเวลาซือๆน้อ
เตรียมวัตถุดิบกับเครื่องปรุงครับ
- เอี่ยน พริกแห้ง พริกสดสำหรับเฮ็ดลูกโดด กระเทียม หอมแดง หัวซิงไค ต้นหอม ใบกระเพา ยอดผักใส่(ยอดมะระขี้นก)
- เกลือ น้ำปลา น้ำปลาแดก ผงนัว
ขั้นแรกกะคัวเอี่ยนแล้วล้างเอี่ยนให้สะอาดใส่ในหม้อ (ถ้าขังไว้หลายมื่อบ่คัวกะได้ อ่อมเบิดโตเลย มื่อนี้ผมกะบ่คัว)
จากนั้นกะตำเครื่องแกง มีพริกแห้ง กระเทียม หอมแดง หัวซิงไค เกลือนิดนึง ตักใส่ในหม้อพร้อมกับลูกโดด
ปรุงรสด้วยน้ำปลา น้ำปลาแดก ผงนัว แล้วยกขึ้นตั้งไฟโดยที่ยังบ่ต้องหยอดน้ำ (ถ้าใส่น้ำตอนนี้สิเฮ็ดให้น้ำแกงคาวครับ)
ผักที่จะใส่อ่อมครับ เก็บจากสวนข้างบ้าน ยอดผักใส่กำลังงาม เด็ดแล้วล้างให้สะอาด เตรียมไว้
คั่วเอี่ยนไปซักพัก จนเกือบใหม้หม้อ เนื้อเอี่ยนเกือบสุกจั่งหยอดน้ำลงไป กะว่าพอดีซด อย่าใส่หลายมันสิล่วงน้ำ
แล้วปิดฝาปล่อยให้เดือดจนเอี่ยนเปื่อย
ระหว่างรอเอี่ยนเปื่อยกะหันมาหมักหมูย่าง ไว้กินกับซุปบักเขือตื่มกันครับ
ผ่านไปจักคาวกะว่าเอี่ยนเปื่อยดีแล้วเฮากะใส่ผักลงไป ปิดฝาหม้อให้ผักยุบ ซิมเบิ่งรสชาด แซบแล้วกะเสิร์ฟได้เลยครับ
หมูย่างกะสุกแล้ว ซุปบักเขือกะแล้วๆ
มาครับ หาพาข้าวออกสู่กันกิน กินเหล้า โอ๊ะ กินข้าวงายผิงแดดอ่อนๆยามเช้าจั่งแม่นมันแซบหลาย
ลากันด้วยภาพนี้เลยน้อครับ จั่งพ้อกันอีกกระทู้หน้าเด้อ
Bookmarks