คิดฮอดกะสิอดเอา

[โป้ยก่าย]

บ่เป็นหยังดอกเด้อหล้าอย่ามาซาคนต้อยต่ำ
ไปตามกรรมซาติเชื้อคนต้อยต่ำตระกูล
บ่มีทุนเงินล้านเฮือนซานหลังบ่ใหญ่
เฮ็ดไฮ่สวนพอสืบมื้อบ่รวยแบงค์ค่าสูง
ขอให้นางมาดมุ่งอนาคตยังสดใส
ให้เจ้ารวยสินทรัพย์นับเงินจนเหลือใซ้
อ้ายเต็มใจบ่ขัดข้องแม่นมัวหมองสิอดอยู่
บุญบ่ควรคู่น้องแม่นหมองเศร้ากะซ่างตาม
บ่ได้คิดหวงห้ามย่อนว่าฮักนางหลาย
แม่นเสียดายท่อชีวีอ้ายบ่มีขวางกั้น
เหมาะสมกันแล้วเด้อน้องผู้เพิ่นคองถ้าเจ้าอยู่
ผู้เพิ่นรวยลื่นล้นมีเงินใช้ให้จ่ายเกิน หล้าเอ้ย

ไปสาหล้าแม่นน้ำตาสิย้อยปกๆกะสิอดเอาดอก

[sompoi]

ปร้าดดดดดด แม่นฟิวส์ด๋ายน้ออ้ายขะน้อย ..ซึ้งๆอ้าย..:g

[ศรีสะท้าน]

คึดฮอดน้องนอนกระดานไม้แป้นปีก
จีกปลาแดกบ่ายเข่าแลงเซ้าได้จ่มหา
ยากะยาใบตองกล้วยแนวคนซวยทุกข์ยาก
ปากแฮงหลายกะบ่อได้ไทบ้านเพิ่นสิหยัน
อดสาดันอดสาสู่หากะปูหมากหอยจูบ
ฮูปกะแสนฮ่างฮ้ายอยากอายเว้าย้านเพิ่นซัง
แนวภูมิหลังโตมันด้อยบ่อหวังคอยได้เว้าเพิ่น
เขานั้นแม่นหงส์เหิร โตกะเทินต่ำเตี้ยเฟียขึ้นกะบ่สูง
...คึดฮอดกะสิอดเอาดอก อึ๊ฮึ๊..ลงมันหม่องนี้หล่ะ บ่อลงยากคือลงส่างฮ้างดอก อิ อิ..

[sompoi]

ปร้าดดด สองปรมาจารย์แม่ะ..:g เพิ่นกำลังพากันมีควมลับ เอ้ย รัก เด่ะนิ ..บ่แม่นไวๆนิบ้อ ลาบวัวแม่ะไก่น้อย..ทางหนองคาย หือ ได๋น้ออ้ายเอ้ย..(t

[บ่าวดอนโบม]

คิดฮอดหลายจนอ้ายนอนสะเดิด
ฝันไปเลยเถิดว่ารักเกิดปัญหา
ฝันว่าผู้สาวเจ้าควงชายใหม่มา
ตกใจผวาจนว่าคอตกหมอน

[ศรีสะท้าน]

บุพพกรรมกาลใดน้อโอนอมาจำจ่อง
อ้ายได้จากอีน้องนางหล่าค่าควร
คะนิงหวนเห็นหน้าโสกาเกินสิกล่าว
น้ำตาไหลหลั่งย้าวซาวข้างนั่งซง
ไกลฮ้อยคดฮ้อยโค้งอ้ายยังส่งกะใจจิต
สืบสัมพันธะไมมิตรห่วงหาบ่ลาฮ้าง
เห็นหนทางเฮือนนางน้องผองสถานบ้านเจ้าอยู่
แสนอดสูคึดฮอดแท้บ่แปรปี้นเปลี่ยนผัน นั้นแหลว

[น้ำตาล]

555555555+.มาอ่านจ้า..แต่งบ่เป็นผญา...อิอิ..ขอเป็นผุอ่านดอก:g:g..สุดยอดเลยค่ะ 2 จารย์8)8)

[ต่าย]

ท่านอาจารย์ยังสุดยอดคือเก่า....8)8)
เสียอย่างเดียวงานบ้านมหา คาแต่หวงเกิบ ( เห็นในฮูปดอกเด้อมันฟ้องแม๋)
ส่วนพี่โป้ย...กะเศร้าอยู่บ่เซาจั๊กสิปลอบจั้งใด๋แล้ว...::)

[โป้ยก่าย]

หล้าต่ายนางเอ้ย
จักแม่นเป็นจั้งใด๋หล้ายามอ้ายนอนหลับตาฝันเห็นแต่น้องต่าย
แม่นเจ้าคิดฮอดอ้ายคืออ้ายคิดฮอดน้องเสมอด้ามดังกันบ่น้อ
แนวโดนโดนจั้งได้พ้อบ่ได้ต่อเติมคำหวานเลยบ่บานทางใจคิดนำแต่นางน้อง
อันความหมองความเศร้าบ่เบาบางความคิดฮอด
เคยได้ออดแอ่วเว้าบ่เห็นเจ้าอ้ายห่วงหา นางเอ้ย

[ต่าย]

อ้ายเอ้ย....
ขนาดว่าเป็นเพียงน้องสาว....ยังคึดฮอดพอปานนี้
อยากฮู้เด้คนดี..ผู้สาวอ้ายสิปานใด๋
คือสิคึดฮอดเพิ้นแฮงหลาย...จนพี่ชายได้แต่เพ้อ
นอนละเมอซูแลงเซ้า....เก็บเอาเขาไปเข้าฝัน
สิรำพันหาผู้ใด๋...น้องสาวอ้ายบ่เคยว่า
อย่าสิหลงลืมวาจา....พามาให้ฮู้จักแน่...เด้ออ้ายยยย::);d