ป่นเห็ดไค (เห็ดตะไคร)

เห็ดไค มีลักษณะ คล้ายเห็ดก่อ ดอกสิใหญ่แข็งและกรอบ มีสีขาวปนเทา เวลาย่างสิมีกลิ่นหอมฮ่วยฮวย ชอบขึ้นตามจอมปลวก เห็ดไคส่วนหลายมักสิเอามาป่นบ่นิยมเอามาแกง ทางเหนือเอิ้นเห็ดหล่ม ทางภาคกลางเอิ้นเห็ดตะไคร ส่วนเรื่องราคากะรองจากเห็ดปลวก ปัจจุบันประมาณ กก.ละ300-350 มาเบิ่งป่นเห็นไคสูตรฅนภูไทกันเลยครับ

ป่นเห็ดไค (เห็ดตะไคร)

หน้าตาเห็ดไคกะเป็นจั่งซี้หละ ก่อนเอาไปย่างต้องทำความสะอาดให้คักๆ บ่ซั่นมันสิแหย๋ขี้ดิน

ป่นเห็ดไค (เห็ดตะไคร)

จัดการติดเตาย่างเลยครับ เวลาย่างสิได้กลิ่นหอมของเห็ดไค หอมไปสามบ้านสี่บ้านพุ่นหละ อย่าหลงชิมดู๊หลายเด้อมันสิบ่พอป่น ป่นเห็ดไค (เห็ดตะไคร)


ป่นเห็ดไค (เห็ดตะไคร)

ทีนี้เฮากะมาป่นกันเลย ตำบักพริกกระเทียมหัวผักบั๋วให้ละเอียด แล้วใส่เห็ดลงไปตำให้ละเอียดอีกที แกะเนื้อปลาใส่ลงไป ตำให้เข้ากัน


ป่นเห็ดไค (เห็ดตะไคร)

มาถึงขั้นตอนนี้เฮากะใส่ต่อนปลาแดก ต้นหอมผักชี ลงไป ตำให้เข้ากันปรุงรสตามใจชอบ

ป่นเห็ดไค (เห็ดตะไคร)

ตักใส่ถ้วยเตรียมยกไปกินได้ ถ้าไผบ่มักแห้งกะใส่น้ำต้มปลาแดกลงไปกะได้เด้อครับ แซบคือกัน

ป่นเห็ดไค (เห็ดตะไคร)

เสริฟพร้อม ผักพราย ผักกาดย่า ข้าวเหนียวฮ้อนๆ (t(t ได้หน่อไม้ต้มนำแฮ่งคัก ::)