คึดฮอดบ้าน...

[engon]

คึดฮอดบ้านยามมื่อแลงนั่งกอดเข่า
บ่มีหมู่จาเว่าดอมต้านผ่านภาษา
ยามตาเว็นค่ำคล้อยตาลอยคึดฮอดหมู่
อยู่นี่สุขกายมั่นแต่ใจนั้นฮำคะนึง

โรคโฮมซิคไกลบ้านเคยได้ยินแต่เขาว่า
เจอจังจังแล้วจ้าเป็นตาย่านคักอีหลี
เงินทองมีพอใช้แต่ใจมันบ่อยู่
สีเลยสู้ซึมเศร้าปวงบ้าอยู่ผู้เดียว

เฮ็ดเวียกเฮียนเหมิดแล้วนั่งเล่นคอมกะบ่ค่ำ
คึดอำลำนำเจ้าข้าวเหนียวพุ่นฮาได้กิน
ป่นปลาเข็งโตน้อยน้อยส้มผักเสี้ยนยังเหลือบ่
อีกเทิงหมกกบพร้อมซุปหน่อไม้พำกัน

หาหม่องลงบ่ทันได้ย่อนว่าใจมันคึดต่อ
โอ๊ย!!!ตำแตงตำมั่วตำซั่วอยู่หม่องได๋
ไปอีหลีแล้วละจ้าเข้าครัวหาแนวกินก่อน
แซนด์วิช แฮมฮ้อนๆนางน่อยสิค่อยกินซั่นแล้ว..

..เป็นตาหลูโตนเนาะ..

[sompoi]

ฮ่าๆๆ..เป็นคือกันดอกเนาะจ้า อยู่ทางได๋กะดายเนาะ..เอาใจส่อยเด้อ บ่อไหวกะกลับมาเยี่ยมบ้านเฮาจักเดือนกะได่ตั้วะ..จั่งกลับไปดำเนินชีวิตใหม่เนาะจ้า..

[หนุ่มเมืองบั้งไฟพญานาค]

โตไกล แต่จิตใจคืออีสานแต้ๆ

[นิลมณีหยก]

อันนี้่กะคึดฮอดบ้านคือกันหลงเข้ามาแต่มื้อใด๋บุ๊มาแล้วกะชั่วสิได้เมือยคึดฮอดพี่ฮอดน้อง คึดฮอดแม่คือกันหละ คึดฮอดความอบอุ่น อยากกินหยังกะได้กินสมใจมานี่ คั่นมันแพงหลายกะบ่กล้ากินดอก หมากทุเรียนอยากแต่ว่าอดไว้ถ่าไปกินยามกลับบ้านดีกว่ามันแพงหลายเป็นตาหน่ายเสียดายเงินทอง
เก็บไว้ดีกว่าเนาะ