เมี่ยงบักเดื่อ

**ฅนภูไท** · 11-07-2008, 14:22

เมี่ยงบักเดื่อ

มื้อนี้ฅนภูไทเอาเมี่ยงสมัยโบราณมาฝาก เมี่ยงบักเดื่อฅนภูไทกะหลายปีแล้วที่บ่ได้กิน กลับบ้านเทื่อนี้กะเลยคิดอยากกิน บักเดื่อมีสองชนิดเด้อ ชนิดกินได้กับกินบ่ได้ อย่าหลงเอาบักเดื่อป่องมากินหละ

ต้นบักเดื่อ หาเลือกเอาหน่วยน้อยๆมันเอาเด้อ

อันนี้ที่ฅนภูไทไปขึ้นมา พอเฮาได้มาเฮากะเอาไปล้างให้สะอาดระวังยางมันอย่าให้ถืกเสื้อเฮาเด้อ

ที่นี้เฮากะมาจัดการตำบักพริกใส่ตะไคร้ ให้ละเอียด แล้วกะใส่มดแดงลงไปปรุงรสด้วยปลาแดก

ตักใส่จาน เสริฟพร้อมบักเดื่อ เวลาเฮากินกะขบบักเดื่อให้แตกออกมาเป็นสองบิ้ง แล้วกะจัดการเอามาคุ้ยเมี่ยงในจาน 8)8) อันนี้เป็นเมี่ยงของเผ่าภูไทสมัยโบราณเด้อครับ ผมบ่รู้ว่าที่อื่นมีกินคือจั่งบ้านผมบ่ ไผยังบ่เคยกินกะลองเฮ็ดกินเบิ่งครับ

**ข้าวปาด** · 11-07-2008, 16:19

เอ้า มักเดือ่กินได้ติ แม่อยุ่เฮียนเพิ่นคือ บักตายเบื่อ ::)

**sompoi** · 11-07-2008, 17:32

จักกินเป็นหือบ่เป็นลูซี่ เอื้อยเห็นกะส้มปากแหล่ว ฮ่าๆๆๆ..จักคำเด้เนาะ..

**ศรีสะท้าน** · 11-07-2008, 18:12

เอื้อกกก...ใส่จักเป๊กแล้วกะคุยเหมี่ยงหมากเดื่อ ปูสาดเสื่อยามมื้อแลงเนาะ เข้าบรรยากาศแท้ๆ

**ไก่น้อย** · 11-07-2008, 18:33

ป้าดด ตาซิมเบิ่งยุเดะหละเนาะ กาสินเพิ่นบ่พากินแมะแนวนิ ..ขอบคุณสาระความรู้ดีๆจ้า

**ศรีสะท้าน** · 11-07-2008, 18:45

บ๋า.หาเว้าบ่พากินจั่งได๋ แม่นแหลวหมู่เจ้าสมัยฮานามิสมัยเลย์แล้วมาสิฮู้จักเหมี่ยง แล้วแต่แต่บางที่อาจสิมีสูตรบ่คือกัน ทางบ้านเฮาเพิ่นกะเอาลำข่านั้นหล่พมาฝานตำใส่ปลาแดกพริกเกลือ ใส่หมากขามเปียก ลางเทื่อกะเอิ้นตำข่า แล้วกะกินกับของฝาดทั้งหลาย เป็นต้นว่าหมากเดื่อ หรือหามหมากมี้ หรือใบเว่อไปซั้นหล่ะ