เมื่อแม่ย่าเผิ่นซัง...........ลูกสะใภ้

[ส.มักม่วน]

เมื่อสาวมักม่วนบ่กินเส้นกะแม่ย่า


อยากปิดตำนานแม่ย่าลูกสะใภ้ให้ได้...แต่นิ่มบ่ฮู้ว่าสิมีมื้อนั้นบ่
อาจสิบ่แม่นเรื่องดีปานได๋ ที่นิ่มเอามาลงไอดารี่บ้านมหา แต่นิ่มฮู้สึกว่าบ้านมหาเป็นหม่องเดียวที่นิ่มสิสามารถบรรยายเรื่องราวที่อัดอั้นตันใจได้...ขออนุญาตเด้อจ้าเวบมาสเตอร์...


ก่อนหน้าที่สิตัดสินใจกะลูกชายของเผิ่น…อ้ายทิด...คนที่นิ่มคิดว่าเลือกแล้ว ก่อนหน้าที่สิมาหมั้น แม่เผิ่นเว้าว่า ลูกชายฮักแม่กะบ่ติดอกนาง กะเลยคิดว่าน่าสิบ่มีหยังดอกนะ ถ้าเผิ่นเว้าแนวนี่

พอแต่งกันแล้วได้ 3 มื้อ คำเว้าที่นิ่มได้ยินเต็ม 2 หู ‘ กูแต่งให้มันย้อนย่านลูกชายกูผูกคอตายสื่อๆดอก ’ ‘เอาลูกใภ้บ่เลือกไทบ้านเว้าพื้นเบิดบ้าน ’ แล้วกะอีกหลายคำที่เฮ็ดให้นิ่มท้อ...ถอย...

แม่นิ่มบอกว่า...แม่เขาบ่ได้อยากได้เฮาเป็นลูกใภ้เด้อลูกหล่า ให้เฮาเจียมโตไว้ ลูกไผๆกะฮัก กะคือแม่ฮักโตนั้นล่ะ....น้ำตาย้อย อยู่เป็นอาทิตย์ หรือว่านิ่มบ่ดีพอที่สิเป็นลูกใภ้เผิ่นอีหลี...

เอื้อยอ้ายบ้านมหาหลายคนถามว่า ปานได๋สิมีลูกให้แม่ย่าอุ้มล่ะน้องหล่า นิ่มกะได้แค่คิดว่า ถ้า...แม่ย่าเผิ่นบอกให้ลูกชายเผิ่นปะนิ่มถิ่มล่ะ แล้วถ้าในตอนนั้นมีลูกนิ่มสิเสียใจส่ำได๋

นิ่มขออยู่แบบนี่ดีกว่า อยู่แบบบ่มีลูก จนแม่ย่ายอมรับ ดีกว่านิ่มมีลูกเผิ่นได้หลาน แล้วเผิ่นไล่นิ่มหนีทีหลัง นั่นคือสิ่งที่นิ่มสิเจ็บกว่าตอนนี้


ขอเว้ามื้อนี่เป็นมื้อสุดท้ายแล้วนิ่มกะสิบ่เอ่ยถึงเรื่องนี้อีกเลย....แล้วสาวมักม่วนคนเก่าสิกลับมา