ต่อจากตอนที่แล้ว
ดินสีอรุณ
(นิทานธรรมบท สำนวนอีสาน)
ฟังกระแสสาธก
เสร็จจากคารวะไหว้ สามหน่วยพระจอมไตร
หันมาจากับคุณยาย ผู้สดับในวันนี้
สุขสวัสดีพร้อมเจริญพรก่อนสิกล่าว
ทั้งแม่ออกเฒ่าแม่ออกสาว พ่อกระโยมกระผองนั้น ฟังฉันเว้าเล่าคดี
มาพบกันมื้อนี่มงคลฤกษ์มหาชัย
ไผกะโมทนาบุญฮ่วมงานบานแม้ง
เจ้าหัวหลานผู้รับบทมาแสดง
นำนิทานมาไขข้อ ขอยอมือชูเกียรติท่าน
สมแล้วน้อ สมแต่งบุญกุศลทานจัดงานกันล่วงหน้า เพียงพร้อมคู่สู่คน
เริ่มแรกต้นกะสร้างก่อทำทาน
จัดอาหารนมเนยยอถวายพระคุณเจ้า
แล้วกะเอาใจตั้งสมาทานเว้นบาป
ศีล ๕ โตบ่ลืนข้อคำเว้าเพิ่นสั่งสอน
เสร็จจากนั้นรวบท้อนสรุปบุญหนุนเข้าใส่
มีจิตใจเลื่อมใสนิมนต์พระมาเทศน์เรื่อง เผดียงเว้าเล่าความ
สาธุเด้อ.. เดชบุญนี้ ขอให้ไปเกิดร่วมสมัยท่านพระศรีอาริย์
เนาว์วิมานแดนสรวงเทพสวรรค์เมืองฟ้า
บุญผลาที่เคยสร้างเป็นเสบียงนำทางบัดยามย้ายจากถิ่น
ทั้งผลทานผลศีลให้พากันสร้างสมไว้ พอได้ใช้ บัดฮ่าซวย ศรัทธาเอ้ย ฯ
ยกอานิสงส์การฟังเทศน์
แล้วบัดนี้ เว้าไปหลายมันสิส่วย ควายเขาเลแสนสิเอ้กะบ่ค่อง
เตินหมู่พวกพี่น้องศรัทธาเจ้าให้แต่งบุญ
ทางจิตใจอย่าว้าวุ่นให้ตั้งต่อธรรมรส
จดจำเอาให้ดีประโยชน์มีผลได้
พระโคดมแสดงให้ศรัทธาไทที่ฟังเทศน์ ได้รับเหตุห้าข้อ สมแท้แก่การ
ข้อหนึ่งนั้นแนวได๋ๆ บ่เคยฮู้บ่เคยฟังตั้งแต่ก่อน
กะได้ฟังคำสอนความรู้ใหม่ประกอบเพิ่มเติมไว้ใส่สมอง
ข้อที่สอง แนวที่เคยฟังแล้วแต่หลงหล่ายมึนงง
ย่อมสิปลงใจชัด แจ่มประเด็นเห็นแจ้ง
ข้อที่สาม แสงพระธรรมสิไขข้อความสงสัยให้กระจ่าง
ข้อที่สี่ ธรรมสิเป็นแนวทาง ปรับความเห็นให้ถูกต้อง บ่ผิดหม่องหว่างแสดง
ข้อที่ห้า จิตสิใสฮุงแจ้งขาวผ่องสีฮองๆ
เฮืองๆ บานปภัสสรแจ่มเทียมประกายฟ้า ฯ
พระสัมมาตรัสไว้ขอให้ศรัทธาไทโยมญาติได้สร้างก่อ
ตั้งใจฟังเด้อโยมพ่อทั้งโยมแม่พี่น้องผลสิได้ห้าประการ
เจ้าหัวหลานผู้ไขขอยอคดีชี้อ่าน
ขอเชิญชวนทุกท่านเอาใจตั้งต่อนิทาน ฯ
Bookmarks