หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 12

ดินสีอรุณ ตอน 6

  1. #1
    แบ่งปันความรู้และประสบการณ์ สัญลักษณ์ของ ศรีเวฬุคามมุนี
    วันที่สมัคร
    Aug 2008
    กระทู้
    64

    ดินสีอรุณ ตอน 6

    ต่อจากตอนที่แล้ว

    ดินสีอรุณ
    นิทานธรรมบท สำนวนอีสาน
    ตอนที่ ๖
    (จำจาก)


    จำจาก


    บัดนี้ มองเห็นฟ้าตั้งก้อนท้อนหมู่เป็นภูผา
    สกุณาแนวนกโบกบินถลาว่อน
    กุดจี่ซอนไซพื้นพระภายภูมิดั้นดินออก
    ผักอีลอกเกิดแล้วผักแพวดั้วป่งใบ

    งามๆ หลายหน่อไม้เพิ่นแกงใส่ยานาง
    ขางข้าวเบือใส่จักคำหมากพริกตำลงพร้อม
    ดอกกะยอมบานแบ้งแสบงใบเขียวหม่น
    งามทั้งดอกและต้นกระโดนเอ้เด่ใบ

    ทุกเขตค่ายกะน่าอยู่ดูงาม
    เป็นลำๆ ต้นตาลเสียดสูงเพียงฟ้า
    มองแล้วอุราชื่นกลมกลืนธรรมชาติ
    ฝนตกหยาดหล่นพื้นภูมิเบื้องซุ่มเย็น

    อันนี้เปรียบดังเช่น ใจหมู่มวลมนุษย์
    สุดสดใสชื่นบาน บัดเมื่อธรรมชโลมล้าง
    ละโมโหโทโสบ้าง พอสิเป็นแนวทางสร้างโลกให้น่าอยู่
    บอกกะโยมได้รับรู้ สาแล้วสิแส่วลง ฯ

    ในตอนนี้ ขออ่วยโค้งมาเว้าบ่อนมูลคดี ก่อนเด้อ..
    ตอนสามีและภรรยาสิจากกันไปคนก้ำ
    จักแม่นกรรมหยังแหล่ว หัวมันแกวสิไลป่า
    ปลาสิลาจากน้ำ หมากขามข้อสิสั่งใบ

    กล่าวถึงคนผู้ทุกข์ไฮ้ ปากก่ำกินมันหมก
    ตกคราวเวรคราวกรรม แล้วละหนอตอนนี้
    ผู้สามีแนมดวงหน้า ทางจอมศรีภรรยากะเฮฮ้องไห้ฮ่ำ
    ทหารวังเพิ่นนำ ราชโองการมาอ่านแล้ว กะใจแป้วหม่นศรี

    “ขอให้ชายชื่อนี้ ละจากถิ่นเคหา
    ฮีบเข้าเฝ้าพระราชา ก่อนสิลงทัณฑ์ท้าว
    ทางเมียสาว ขอให้เตรียมตัวไว้ สวัสดีมีชัย สิมาเอิ้นอีกเทื่อ”


    ฟังแล้วเจ็บใจเหลือ ทำผิดหยังคราวนี้
    จึงจำต้องหว่างทัณฑ์
    หรือว่าข้านี้นั้น มีแฟนจบเกินผู้อื่น
    ได้เมียงามล้นลื่น มีความผิดอยู่ดอกว้า อาชญาเจ้าจึงส่งมา

    จากก่อนเด๋อ น้องหล้าทูนหัวพี่จอมขวัญ
    หากบ่ตายสิหวลคืนมาอยู่ดอมตนเจ้า
    พี่นี้เหงาพี่นี้เศร้า โอ้ว่าสองคนเฮา สังเภท์ม้างแตกมุ่น
    อยู่ดีเด้อแม่คุณ ซ่อยทำบุญบัดอ้ายม้าง กุศลสร้างแต่งตาม

    ให้ตักบาตรหยาดน้ำ ถวยส่งกุศลหา
    หากว่าพระเพิ่นกรูณาสิอ่วยโงคืนบ้าน

    พริกสองงานพี่ปลูกไว้
    กับทั้งหัวขิงไค อยู่โพนน้อยฮดน้ำแน่
    เก็บไว้เด้อผักแค
    พอได้ขายแลกข้าวเหม่า พ่อตาเม้าบ้านป่าตอง

    ยามปวดหัว ให้เอิ้นใส่พี่น้อง
    คุ้มค่วงซ่อยหายา เด้อนางเด้อ..
    ลุงมหาอาจันทร์ ผู้เพิ่นพออาศัยได้

    พี่จำใจจำจากเจ้า
    บ่อยากไปนำเขา ขุนข้าผั่นมาไล่
    ทั้งสองแขนกะถืกใส่ กุญแจขันมัดแน่น
    แสนสิดิ้นกะบ่วาง

    ทั้งหัวใจสิแตกม้างน้ำตาหลั่งโรยริน
    ว่าโอ้น้อ.. ผู้ครองดินบ่ทรงธรรม
    โลดใส่กรรมแต่ชาวบ้าน

    นายทหารเพิ่นกะจับดึงถื้น
    หัวคะมำทั้งยืน สะอื้นไห้ใจสั่น
    โอ้ว่าแถนลงทัณฑ์ ราชภัยต้องเข้าแล้ว
    บ่มีแหล่ว สิส่วงหายนั้น ละน่าศรัทธาเอ้ย ฯ

    แต่นั้น ราชาไท้ จับเอาบาบ่าว
    หวังฆ่าท้าว ตายเมี้ยนมิ่งมรณ์ ฯ

    เผยแผ่ครั้งแรกที่นี่

    ศรีเวฬุคามมุนี
    sriwaylukammunee@hotmail.com
    ๒๙ ส.ค ๒๕๕๑

  2. #2
    ร่วมถ่ายทอดความรู้สู่สังคม สัญลักษณ์ของ หลานพระรถ
    วันที่สมัคร
    Aug 2008
    ที่อยู่
    เมืองพระรถธานี, ชลบุรี
    กระทู้
    376
    "ตายเมี้ยนมิ่งมรณ์" คงจะไม่มีโอกาสฟื้นคืนชีพแล้วกระมังคะ

  3. #3
    มิสบ้านมหา 2008 - 2009 สัญลักษณ์ของ หมูหวาน
    วันที่สมัคร
    Sep 2007
    กระทู้
    1,478
    บล็อก
    5
    พริกสองงานพี่ปลูกไว้
    กับทั้งหัวขิงไค อยู่โพนน้อยฮดน้ำแน่
    เก็บไว้เด้อผักแค
    พอได้ขายแลกข้าวเหม่า พ่อตาเม้าบ้านป่าตอง




    สิหมั่นฮดน้ำให้พริกงาม อิอิ สิรักษาไว้อย่างดี จ้า ::)::)::)


    อ่านแล้ว คิดบรรยายภาพชัดเจน เลยจ้า อยู่โพนน้อย ว่าสั้น ::)::)

    :g:g

  4. #4
    บัดนี้ มองเห็นฟ้าตั้งก้อนท้อนหมู่เป็นภูผา
    สกุณาแนวนกโบกบินถลาว่อน
    กุดจี่ซอนไซพื้นพระภายภูมิดั้นดินออก
    ผักอีลอกเกิดแล้วผักแพวดั้วป่งใบ


    เดือน 5 เดือน 6 กำลังมีฝน มีกุดจี่ มีอีลอก อิอิอิ คิดฮอดบ้านเด้

  5. #5
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,362
    บล็อก
    23
    เศร้าคัก ..ป่านพันท้ายนรสิงห์สั่งลานวลเมียเพิ่น..จากจบเรื่องนี้แล่ว เอาแบบแฮปปี้เอนด์ดิง แน่ะเด๋อทั่นศรีเวฬุคามมุนี ..)แบบว่า บ่มักการจากพราก มันอินแม่ะจ้า..

  6. #6
    แบ่งปันความรู้และประสบการณ์ สัญลักษณ์ของ ทองคำ
    วันที่สมัคร
    Jan 2007
    กระทู้
    140
    ว่าโอน้อ นงคราญหล้า กัลญาชู้พี่
    แม่โฉมยอดนารี พี่สิลาจากเจ้า เข้ารับใช้ฝ่ายวัง
    ขอให้น้องนี้ตั้ว ใจต่อทางซาย
    อย่าได้หมายเอาไผดอก ฮ่วมนอนถนอมตุ้ม
    อันนี้กรรมคราวยุ้ง มุงมาคือเมฆแล่น
    หัวใจพี่แสนคลอนแคลน แม่นสิกลั้นสวาทโอ้ โอน้อน้องกะบ่ไหว
    เหลียวเห็นลิงล่ำไม้ กระแตไต่ตามกัน
    บาดว่าฉันกับเธอ ซ่างมาหนีไกลล้ำ
    จักว่าทำกรรมไว้ แนวใด๋ดอกอี่พ่อ
    สมควรน้อคันบาดนี้ สิไลน้อง หม่อมพะนางนั่นดอกน่า.........

  7. #7
    แบ่งปันความรู้และประสบการณ์ สัญลักษณ์ของ ทองคำ
    วันที่สมัคร
    Jan 2007
    กระทู้
    140
    "ท้าวกะออกจากบ้าน น้ำตาไหลนำทาง แสนสิกลั้นกะบ่อยู่
    มาคิดเห็นแต่หน้าชู้ เมียแก้วมิ่งสมร"
    อันความในตอนนี้มาคือผมแท้นอท่าน
    แสนสิคิดฮอดบ้านคนิงโอ้อ่าวกะสัน
    คนที่ผมฮักนั้นคือไกลกันคนละบ่อน
    คิดแล้วมาออนซอนนิทานนำเพิ่นเด้ครูบาเจ้าได้แต่งมา
    ขอโทษเด้อผู้ข้า หากมันล่วงเกินวิสัย
    แนวว่าความคิดไปยากกะใจเอาเอ้า
    คนเฮาหนุ่มหรือเฒ่ากรรมเก่ากะยังหลาย
    ถึงคราวตายยังบ่เหมิดสิใช้เวรกรรมต้อง
    ความคิดมาเถิงหม่องดองรักบ่สมหวัง
    คนใจพังคือกระผมเลยหลูบโจมเจ้าของไว้
    ขออาศัยพระธรรมแก้วงามใสแวประกายส่อง
    พอเป็นดั่งแสงทองเข้าส่องทางมืดแปดด้าน
    กระผมบ้าง ....ท่านพระคุณ

  8. #8
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,362
    บล็อก
    23
    คักๆ บ่าวทองคำ ..เอาอีกๆแน่ะจ้า..:g
    ปล..อั่น..หลูบโจม..แปลว่าหยังน้อจ้า..อิอิ

  9. #9
    แบ่งปันความรู้และประสบการณ์ สัญลักษณ์ของ ศรีเวฬุคามมุนี
    วันที่สมัคร
    Aug 2008
    กระทู้
    64

    ตอบท่านทองคำจักหน่อย

    พี่เอ้ยพี่..
    ครั้นคิดฮอดกัน ให้เจ้าแนมเบิ่งรุ่ง
    อันใสส่องฮองสี เด้อพี่เด้อ
    ค่ำมามองดาวหมีหมู่ดาวพรานกล้า
    สองสายตาเฮาพานเกี้ยว
    ก่ายเกลียวกันอยู่ดาวไก่
    ครั้นเจ้าเดินทางไกล
    อย่าได้เฮฮนฮ้อง เขาสิฆ่าไล่ตี ฯ

  10. #10
    ดูแลตรวจสอบเนื้อหา สัญลักษณ์ของ โป้ยก่าย
    วันที่สมัคร
    Jun 2007
    กระทู้
    1,619
    บัดนี้บาบ่าวท้าวบาบ่าวบาคานบาคานซายบ่าวบาคานท้าว
    บาคานท้าวเดินดงดั้นป่าเข้าป่าไม้แดนด้าวป่าไพร
    แหงนเบิ่งฟ้าเมฆาไหลล่วงเห็นแต่เมฆตั้งก้อนซอนขึ้นถี่ถัน
    ก้อนหนึ่งนั้นคือขี้โพ้นตาพราหณ์จูงกันหาชาลีพรากมัทรีแต่คราวนั้น
    ก้อนหนึ่งใหลมาขั้นโฮมกันเป็นลั่นคือดังนางมณีจันกับขุนทึงแต่พุ้นเดินด้าวป่าหนา
    เหลียวเบิ่งก้อนขี้ฟ้ามันตัดผ่าวาโยคือจั้งตนโตซายผู้โอ้ลำอยู่เทิงฮ้าน


Tags for this Thread