กำลังแสดงผล 1 ถึง 7 จากทั้งหมด 7

ดินสีอรุณ ตอน 10

  1. #1
    แบ่งปันความรู้และประสบการณ์ สัญลักษณ์ของ ศรีเวฬุคามมุนี
    วันที่สมัคร
    Aug 2008
    กระทู้
    64

    ดินสีอรุณ ตอน 10

    ต่อจากตอนที่แล้ว

    ดินสีอรุณ
    นิทานธรรมบท สำนวนอีสาน
    ตอนที่ ๑๐


    เที่ยวไพรสณฑ์


    บัดนี้ ทำเป็นส่าว สาวบทกลอนจ้อนเข้าข่าย
    เว้าบ่อนชายทุกข์ไฮ้ ได้ไกลบ้านดุ่งเดิน

    ลาวสิเข้าโคกเญิ้น ห้วยฮ่อมและภูผา
    เทียววนาไพรสณฑ์ หม่องสัตว์สาเนาว์ยั้ง

    เล็งใส่วังเวินน้ำ ตามพระยาเพิ่นสั่ง
    หวังดอกบัวอยู่หั่น ตะวันจ้าแล้วย่างเดิน
    ยินทหารเขาเอิ้น ชี้บอกหนทางไกล
    ทั้งหัวใจโทรมทรุด ได้อิดโรยหิ้วล้า

    ชาวประชาลือจ้น เคยเห็นนาคกินคน อยู่วังน้ำบัวใหญ่
    ไผผู้ตกล่วงเข้า หากกินเจ้าบ่เหลือ
    ตายกูตายแล้วบัดนี้ เมียยังหนุ่มสิตายป๋า แลหนอ..

    พระราชาเพิ่นบังคับ ทรงจับคอครั้นขืนดื้อ
    ถือไปตายดาบหน้า มอบชีวาให้ฟ้าเบิ่ง
    เถิ่งบ่อนน้ำบุ้นแล้ว เฮาคงฮู้เรื่องกัน

    บาได้ลงจากชั้น คุ้มข่วงเข้าไพรสัณฑ์
    เห็นภูพันก่ายเกย สอดสลับดงกว้าง

    ฮอดเขาหลวง เห็นหมูกวางฟานเก้ง กระเล็นหมีชะนีบ่าง
    ฝูงลิงค้างโหนห้อย กระแตน้อยผ่อโกน

    ฟังเสียงแตกจ้นๆ หมาจอกไล่กัดกัน
    หางหูซันเห่าหอน ก้องดอนดงไม้

    โตใด๋ใหญ่ผั่นไล่คุมกัดถื้น
    โตน้อยล้มทั้งยืน ครึกครื่นบัดเหลียวส่อง
    บาเบิกตาเมียงมอง มาคือคนแท้ว่า หมาเอ้ย.. กะซ่างเป็น

    คิดไปมาดั่งเช่น ใจหมู่มวลมนุษย์
    ถืกโลโภโทโสฉุด เลยแย่งกันขันท้า
    มีกำลังเลยเข่นฆ่า ผู้ที่ด้อยวาสนา กะเลยแย่ไปทุกด้าน
    อภัยเด้อทุกท่าน บัดหลานน้อยเว้าเปรียบเปรย

    พ้นจากดงแล้วพ้อดอนหินเก้ย กองก่ายเป็นภูผา
    งามๆ ตาศิลาขาว ระยิบพราวแสงต้อง
    เสียงหองๆ อยู่ปลายไม้ แม่นรีดริ่งเรไร ทั้งแมงง่วงฮ้องส่ง

    พ้นจากดงหินซั้น แล้วหันเข้าป่าไทร
    พร้อมกับดงหมากไม้ หมี่มวงพวงผลา
    สกุณาแนวนก จอแจกันเป็นคู่

    จู้จุกกรู.. นกเขาฮ้อง นกขุนทองเว้าออดแอ่ว
    “ไปใสน้อ” นกแก้ว ได้จาเอิ้นข่าวถาม

    “ว่าสิไปหนองน้ำ อยู่ก้ำฝ่ายจ้ายดง พุ้นแหล่ว จุดประสงค์คือบัว..”
    บ่าวบาได้ขานต้าน

    คิดรำพันเห็นดวงหน้า เจ้าผู้ศรีภรรยา สิคอยท่าอยู่บ้านเก่า เด้น้อ..
    คำที่เคยปากเว้า สองเฮาต้านอ่านดู

    เหลียวเห็นนกอีจู้ จิบจาบขาบไซหงอน
    น่าออนซอนสาลิกา ซอยกันหาผลาไม้

    สวยพองาย บายังไปบ่ถึงหม่อง
    เหลียวบ่เห็นฝั่งหนอง อยากโฮฮ้องคอบว่าเหมื่อย
    ย่างกะย่างเรื่อยๆ บ่มีได้พักเซา

    ท้องฮ้องโหยหิวข้าว บาบ่าวลมสิจับ ยายเอ้ย..
    ย้านแต่กลับถึงเมือง ค่ำคืนสิเวรต้อง

    ขาทั้งสองฟ้าวยกบืนไปหน้า ย้อนเวลาบ่ท่าอยู่
    จั่งว่านกเอ้ยหนอ...เจ้าผู้เขาขันคู
    น่าอิดูตนข้า กายาล้าอยากพักเซา
    บาซอกหาปั้นข้าว เมียสาวลาวจัดส่ง โยมเอ้ย..
    ซอกเบิ่งถงเป้ฮ้าง หวังกินข้าวพักแฮง

    ฟ้าเอ้ยน้อ.. ฟ้าฮ้องแล้ง โลดแห้งไงเป็นผง
    บัดเห็นถงข้าวเหนี่ยว ทางน้ำตาพลันไหลย้อย

    จั่งว่าเขียวเอ้ยน้อ.. เจ้าผู้เขียวใบอ้อย
    ข้าได้พลอยพลัดถิ่น ว่าสิกินข้าวปั้น โลดตันอื้อหว่างคอ

    จักแม่นกรรมหยังน้อ.. บ่อยากก่อหากจำสาน เด้น้อ..
    บ่อยากจากนงคราญ พระยามารผั่นมาม้าง

    หรือบ่เคยแปลงสร้าง กุศลทานตั้งแต่ก่อน
    จึงเกิดมาเดือดฮ้อน ฮนไฮ้อยู่บ่เซา

    ตอนนี้ บาสิหยุดกินข้าว เซาเหมื่อยเบิ่งจักหน
    ก่อนสิทนกัดกลืน บืนไปให้ถึงน้ำ

    กินจักคำพอบ่ให้ท้องแห้ง
    กินให้พอมีแฮงบัดเที่ยวดั้นเดินดง

    ขอสรุปเรื่องลง ตอนบ่าวบาเซาพักฮ้อน
    ศรัทธาเจ้า ให้จื่อจำละน่า กะโยมเอ้ย ฯ


    เว้ากับพี่น้อง :-
    เฮียมกำลังเรียนวิธีการเขียน ตามสูตรอาจารย์ศรีสะท้าน แต่ว่าบ่ทันชำนาญ
    สำหรับ ดินสีอรุณ ตอนนี้ เผื่อให้เป็นอันเดียวกันกับตอนอื่นๆ
    (อย่างที่เขาว่าเป็นเอกภาพ)
    จึงขอเขียนไปตามวาทที่เคยเขียนมาแล้ว


    เผยแผ่ครั้งแรกที่นี่
    ศรีเวฬุคามมุนี
    sriwaylukammunee@hotmail.com
    ๑๘ ก.ย ๒๕๕๑

  2. #2
    ผู้ช่วยผู้ใหญ่บ้านมหา
    มิสบ้านมหา 2012
    สัญลักษณ์ของ ติ๊กต็อค
    วันที่สมัคร
    Mar 2007
    กระทู้
    2,197
    บล็อก
    3
    ถ่าตอน 11 จ้า.... ฟ้าวว ๆๆ เด้อค่าอาจารย์ :g :g

  3. #3
    แบ่งปันความรู้และประสบการณ์ สัญลักษณ์ของ ศรีเวฬุคามมุนี
    วันที่สมัคร
    Aug 2008
    กระทู้
    64
    กระทู้ต้นฉบับโดยคุณ ติ๊กต็อค
    ถ่าตอน 11 จ้า.... ฟ้าวว ๆๆ เด้อค่าอาจารย์ :g :g
    สิพยายามเร่ง..ตอนที่ 11 แต่บ่ฮู้สิได้ส่ำได๋

  4. #4
    ผู้ช่วยผู้ใหญ่บ้านมหา
    มิสบ้านมหา 2012
    สัญลักษณ์ของ ติ๊กต็อค
    วันที่สมัคร
    Mar 2007
    กระทู้
    2,197
    บล็อก
    3
    หนูบ่ได้เร่งอาจารย์ เด้อค่า ตามสบายเลยจ้า ถ่าอ่านอย่างเดียวหั่นละหนูกะดาย ----

    --ขอแบบ เศร้าๆ น้ำตาย้อยนำ ท้าว เพิ่นแนะหน๊าค่ะ อาจารย์ (t ----
    (แอบขอแล้วแต่อาจารย์สิกรุณา)

    สิเต้ยโศก จักบาด---- 8) ::)

  5. #5
    ดูแลตรวจสอบเนื้อหา สัญลักษณ์ของ แหลวแดง
    วันที่สมัคร
    Mar 2008
    กระทู้
    2,194
    รอท่าตอนต่อไปด้วยความระทึกในดวงหทัย ครับท่านอาจารย์:g:g:g

  6. #6
    แบ่งปันความรู้และประสบการณ์ สัญลักษณ์ของ ศรีเวฬุคามมุนี
    วันที่สมัคร
    Aug 2008
    กระทู้
    64
    กระทู้ต้นฉบับโดยคุณ แหลวแดง
    รอท่าตอนต่อไปด้วยความระทึกในดวงหทัย ครับท่านอาจารย์:g:g:g

    พักนี้สมองผูก งานเลยช้าจักหน่อย
    กำลังหายาแก้สมองผูกตราควายบิน กินแก้อยู่

  7. #7
    ละครสิเป็นไปแนวได๋โปรดติดตามตอนต่อไป อิอิอิ 8)8):g:g


Tags for this Thread