เนื้อจุ่ม สูตรฅนภูไท
โดนเติบแล้วที่ฅนภูไทบ่ได้เข้าครัวคาแต่ยาก มื้อนี้มีโอกาสกะเลยเฮ็ดเนื้อจุ่มสู่พี่น้องบ้านมหากิน มาเบิ่งกันเลยครับพี่น้อง
อันดับแรกเฮากะต้มน้ำซุปสาก่อน โดยใส่กระดูกงัวหรือควายกะได้ ข่า ตะไคร้ ใบมะกรูด หัวไชเท้า ใส่เกลือลงไปจักหน่อย ต้มโดยใช้ไฟอ่อนๆ
ทีนี้เฮากะมาหั่นเนื้อแล้วกะหมัก เนื้อที่สิใช้เฮ็ดเนื้อจุ่มต้องใช้ เนื้อน่องลาย ท่อนั้นเด้อมันจั่งแซบ จัดการหั่นบางๆ แล้วกะใส่ น้ำมันหอย น้ำมันงา ซีอิ้วขาว เกลือ น้ำปลา ผงชูรส ตามใจชอบ ใส่บีงัวหรือขี้เพี้ยจักหน่อยกะเข้าท่าคือกัน
ส่วนผัก กะแล้วแต่มัก แต่ที่หลักๆต้องใส่กะมี ผักหอมเป (ผักชีฝรั่ง) ใบโหระพา ขึ้นฉ่าย ผักบุ้ง ผักกาดขาว อย่าลืมวุ้นเส้นนำเด้อ
ที่นี้เฮากะมากินกันเลย จัดการเอาน้ำซุปมาใส่กะทะ แล้วกะใส่ผักลงไป
พอน้ำเดือดเฮามากินกันเลย มักสุกส่ำได๋กะลวกเองเด้อครับ
กินอิ่มแล้วกะนั่งฟังเสียงแคน สุดยอดแห่งความสุขครับพี่น้อง
ปล. เนื้อถ้าหมักทิ้มไว้แล้วกะแช่ช่องฟิตจักคืน เนื้อสินุ่มบ่เหนียวเด้อครับ
Bookmarks