แกงไก่ใส่ฟัก
มื้อนี้ฅนภูไทมีเมนูเด็ดมาฝากอีกแล้วครับ เป็นเมนูไก่คือเก่าแต่มื้อนี้ฅนภูไทสิแกงใส่บักฟักสู่กินเด้อ แกงไก่ใส่ฟักกะมีหลายสูตร แต่มื้อนี้ฅนภูไทสิแกงโดยสูตรอีสานบ้านเฮาขนานแท้ รับประกันความแซบมาเบิ่งกันเลยครับ
เครื่องปรุงกะบ่มีหยังหลาย ที่หลักๆกะ บักฟัก ผักอีตู่ ต้นหอม ส่วนไก่กะเฮากะไปจับเอาในเล้า
หลังจากสับไก่ใส่หม้อแล้ว เฮากะตำตะไคร้ พริก ข่า ต้นหอม ให้ละเอียด ใส่ลงหม้อ เยาะน้ำปลาแดกลงไปนำ เพื่อควมนัวควมแซบ
ทีนี้เฮากะเอาไปคั่วให้เครื่องแกงซึมเข้าไปในเนื้อไก่ คั่วจนหอมแล้วกะใส่น้ำลงไป
พอน้ำเดือดกะใส่บักฟักลงไป
พอบักฟักสุกแล้วเฮากะใส่ผักอีตู่ ต้นหอมลงไป ปรุงรสตามใจชอบ
ตักใส่ถ้วยเสริฟกำลังฮ้อนๆ ซดน้ำฮ้อนๆๆ
ลองไปเฮ็ดกินลองเบิ่งเด้อครับ ฅนภูไทรับประกันความแซบ นี่เป็นสูตรของอีสานบ้านเฮา ขนานแท้
Bookmarks