ย่อนความอยากกินส้มผักแบบเฒ่าแม่เฮ็ด กะเลยลงมือเฮ็ดเองเบิ่ง...
เฮ็ดหลายเทือแล้วหละพี่น้อง แต่ที่พึ่งเอามาลงเพราะมีพี่น้องเพิ่นถามมาว่า เฮ็ดจังใด๋?
สูตรกะง่ายๆเนาะจ้า มี กระหล่ำ ต้นหอม ต้นกระเทียมฝรั่ง เกลือ น้ำข้าวหม่า ข้าวเหนียวนึ่ง
จัดการล้างผัก หั่นเป็นท่อน ต้นกระเทียมนั่นผ่าแหน่เด้อพี่น้อง ต้นใหญ่โพด
ตรงขาวๆต้นหอมนั่นกะทุบๆพอแตกจ้า กระหล่ำกะหั่นชิ้นใหญ่เติบโลด คั้นใสเกลือแล้วบ่เหลือหยั๋งเด๋
จัดการใส่กะละมังใส่เกลือ2กำมือพุ้นหละจ้า คั้นสา คั้นโดนเติบเด้อพี่น้อง
จากนั้นกะล้างน้ำทิ้งจัก2น้ำ ที่ล้างน้ำเพราะว่า ต้นหอม+ต้นกระเทียม เวลาคั้นสิเป็นยางจ้า
บ่แซบต้องล้างออกสา...
แล้วเอาผักที่ล้างน้ำแล้วปั้น มาใส่ในกล่อง ชิมเบิ่งว่าเค็มพอบ่ ต้องให้ออกเค็มนิดๆจ้า
เวลาใส่น้ำข้าวหม่าสิบ่ได้จาง...
ติ๋มบ่เค็มได้ใส่เกลืออีก แล้วกะใส่ข้าวเหนียวนึ่งสิได้เน่า โอ๊ะ เป็นส้มไวๆ อิอิ
ไผมักหวานกะใส่น้ำตาลนิดหน่อยเด้อจ้า...จากนั่นกะคั้นทุกอย่างให้เข้ากันอีกเทือจ้า
แล้วเทน้ำข้าวหม่าใส่จนท่วมผัก ข่มผักลงให้แน่นๆโลดจ้า ผักสิได้สีสดๆ น่ากินนะจ้า
กว่าสิคั้นแล้ว เสียน้ำตาไป8คุ แพ้ต้นหอม ต้นกระเทียม เทิงเฮ็ดเทิงไห้ ::)
ถิ่มไว้จัก2-3มื้อกะกินกับป่นปลาได้แล้วจ้า (ถิ่มไว้ในครัวเด้อ บ่แม่นถิ่มเข้าป่าใด๋555++)
Bookmarks