แจ้ง...ผู้บ่าวบ้านมหามาสมัครเป็นการ์ดคุมงาน

...ฝ่ายแม่ญิงบ้านมหา เพิ่นมีการประกาศรับอาสาสมัครรำบายศรี(บ่แม่นรำบายอ้ายศรีฯเด้ พะนะ) ทางฝ่ายซายบ่ประกาศดอก เดี๋ยวสิไปซ้ำหัวข้อเพิ่น เลยขอแจ้งมาเพื่อทราบว่า ตอนนี้ทางแผนกรักษาความปลอดภัยหมู่บ้านเฮา ขาด จนท.หรือการ์ดคุมงานอยู่หลายอัตรา เลยสิขอแจ้งมายังผู้บ่าวบ้านมหา บ่ว่าสิเป็นผู้บ่าวส่ำน้อย ผู้บ่าวส่ำข้อย หรือผู้บ่าวหลายไปกว่าข้อย มาสมัครเป็นการ์ดคุมงานบ้านมหาพาแลง ๒ ซึ่งสิจัดขึ้นอีกบ่จักเดือนนี้ พเราะทางคณะกรรมการหมู่บ้านมาพิจารณาแล้วว่างานนี้เป็นงานใหญ่ คนหลาย อาจสิมีผู้ขี้ดื้อหรือบ่หวังดีมาก่อกวนหมอร้องหมอลำนักเต้น นักดนตรีในงาน เพราะที่แล้วมาขนาดจัดบ่ใหญ่ ผ้าโสร่งหมอแคน ส่งน้อยนางเอก สิ่นหมี่เมียหัวหน้าคณะยังเสีย แถมเกิบผู้ใหญ่บ้านขาดๆยังมีคนลักเอา แล้วยังหาโตผู้ลักบ่ได้เท่าปานนี้...(เสียดายเด้ เว้าพื้นผ้าโสร่งมาแมะ แม่เถ่าอุตส่าห์ต่ำให้..ไหมลืบอย่างดี เมียป้อยอีกต่างหาก..ตายซ้ำเถาะ อยากเอ้เจ้าของหลาย ไปตั้งกวงไกลยังหอบไปนำ พะนะ) เลยเห็นพ้องต้องกันว่า ต้องคุมเข้มแล้ว งานต่อไปนี้ โดยผู้ที่สิมาสมัครต้องมีคุณสมบัติดังนี้

๑. อายุบ่เกิน ๕๐ ปี บริบูรณ์ บ่บริบูรณ์กะซ่าง
๒. ร่างกายกำยำ ล่ำสัน..คือผู้แจ้งนี้หละ
๓. ถ้าบ่ได้ตามข้อ ๒. กะขอให้เป็นคนสูงยาว เข่าดี และตีเข่าเป็นด้วย
๔. ถ้าบ่ได้ตามข้อ ๒ และข้อ ๓ กะขอให้เป็นคนแล่นไว หลบเก่ง ปราดเปรียว...คือข้อยนี้หละ อิ อิ
๕. ถ้าบ่ได้ทั้ง ๔ ข้อ กะไปอยู่แผนกเฝ้าเสื้อผ้าหมอลำหมอร้องฝ่ายญิงซะ อย่ามาสมัคร...บ่รับ


สมัครได้โดยตรงที่พ่อใหญ่ศรี โอ๊ะ อ้ายศรีฯ ค่าสมัคร ร้อยซาวกับเหล้าขาวขวดน้อย งานนี้ เบี้ยเลี้ยงบ่มี แต่กินฟรีตลอด เผลอๆอาจสิได้ต๊อดนั่งข้างหมอลำ

ปล.เงินค่าสมัครกับเหล้าขวดน้อย หลังจากแล้วงาน อย่าคึดว่าสิได้คืน เพราะสิเอาไปใส่คายทำพิธีเฮ็ดผ้ายันต์กันค้อนกันขวด หรือของแข็งที่สิปลิวมาในงาน อิ อิ อิ เฮ็ดกะเฮ็ดให้ จนท.ที่มาสมัครนี้หละ ไว้แขวนคอเพื่อความปลอดภัยเนาะ ฟ้าวมาด่วนเด้อ จองคิวไว้แต่เนิ่นๆ