กำลังแสดงผล 1 ถึง 4 จากทั้งหมด 4

หัวข้อ: จาผญา

  1. #1
    khemajitta
    Guest

    จาผญา

    โสพาทีปฐมต้น จากกมลที่ดูดดื่ม
    หวังแต่ดีให้มีตื่ม บ่ม่ายลืมสิ่งเค้า ผญาเจ้าส่งมา
    หลายแสงเทียนก็แห่งจ้า ผญาแจ่มบ่มีจม
    หลายคนโจม ผญาจา ซ่อยจารก็จึงมั่น
    ฮ้อยเป็นพันจาแจ้วแจ้ว แจววาจาบ่จ้อจั่น
    จาจนงึดอัศจรรย์ ย้อน"ใจ" ขานจาเว้า ผญาเจ้าผู้แจง
    จันทร์เอ้ยจันทร์นับว่าแจ้ง จ้าแจ่มดาราหนุน
    แสงจันทร์จูนกับแสงดาว จั่งค่อยพราวอยู่เทิงฟ้า
    มีดารา จันทร์จั่งแจ้ง ให้แสงงามซ่อยกันส่อง
    นภาบนคนส่อง มองแต่จันทร์บ่แม่นแท้ หากแลซ้อนคู่ดาว
    ขอฮ่วมดี จั่งได้ฟ้าว เป็นดาวหนึ่งพึงกำหนด
    ประเดิมบทแต่งมา บ่เด่นตาอภัยบ้าง
    เป็นดาวหางน้อยน้อย พอห้อยจันทร์แสงริบหรี่
    "จ.เขมจิตต์" ย้องใจคนเฮ็ดเว็ปนี้ ได้มีหม่องป่องแสดง
    หม่องได๋ปิดกะสิได้เปิดแจ้ง เป็นแสงส่องมองให้เถิง...
    นานโดนเหิงแต่เฮาหงอย มาซ่อยกันให้มันจ้า
    ฝากผญาของแต่เค้าโบราณเฮาเว้าความม่วน
    หลายสิ่งอันแต่สมควร ล้วนแต่ดีบัดอ่านแล้ว
    นี้แนวเค้าเพิ่นเฮ็ดมา
    สืบสานไปจนตราบฟ้า ชีวาป่นเป็นผุยผง
    ชีพยังคงสืบผญา ให้ปู่ตายายยิ้ม
    ไผได้ชิมให้หลงฮ้อง คองอีสานสังมาใหญ่
    บุญเหลือหลาย....สมได้เกิดเป็นปั้น ข้าวเหนียวมั่นอย่าเปลี่ยนแปลง....เด้อท่านเอ้ย.
    จ.เขมจิตต์


  2. #2
    khemajitta
    Guest

    Re: จาผญา

    ผู้อ่านเอ้ย....
    ลองเปลี่ยนกันสัมพันธ์เว้า เฮาคนไทยไกลบ้างช่อง
    ฮีตอีสานสืบคอง แผ่นดินทองค่าล้าน มาสานคล้องส่องกวี
    อันผญาว่านี้ ของดีลื่นราคาหลาย
    ประมาณไปเป็นเงิน จั่งแม่นเกินสิตีได้
    ขออภัยเมธีฮู้ ผู้เป็นครูไว้สาก่อน
    ปราชญ์ผู้เก่งอำนวยพร ขอให้กลอนใส่บอร์ดนี้ มีแนวต้อนแต่สิ่งดี ฯ
    ฝากพี่ทิดอีกกลอน...
    จ.เขมจิตต์


  3. #3
    khemajitta
    Guest

    Re: จาผญา

    ผู้อ่านเอ้ย
    สังมาดีใจล้น คนอีสานบ่ลืมถิ่น
    ได้อยู่ไกลบ่ไลดิน ยังถวิลบ่อนเค้า อันเฮาซ้นตั้งแต่หลัง
    ซู้มื้อนี้....นับมื้อไกลหวั่งหวั่ง หัวเฮือห่างถอนสมอ
    หัวขิงไคไกลกอ ฮีตพ่อเฮาคนฮ้าง
    มีหลายทางแต่แนวอ้าง ว่าล้าหลังบ่ทันเพิ่น
    เลยพากันบินเหิน เซิ่นหาแนวว่าโก้ ของโตฮ้างเพิ่นบ่สน
    น่าหลูโตน...แม่นสิพาซอกค้น บ่เห็นผลอันได๋ต่าง
    เอาแต่ภูมิปัญญาช่าง กะยังหาบ่พ้อ สิมาย่อใส่ผู้ใด๋
    เว้าเข้ามาใกล้ใกล้ ได้สิ่นนุ่งทางอีสาน
    คนต้องการผ้าไหม ต่ำขายบ่ทันแล้ว
    อันนี้แนวของเค้า อีสานเฮาตั้งแต่เก่า
    อยู่ใกล้เกลือของเฮา กินด่างเขาอย่าได้พ้อ เถาะน้อท่านหมู่อีสาน...ฯ
    โดย : จ.เขมจิตต์

  4. #4
    แบ่งปันความรู้และประสบการณ์
    วันที่สมัคร
    Jun 2006
    กระทู้
    33

    Re: จาผญา

    มาแว้วครับผม
    หลังจากกลับจากป่า มาจาเว่ากับขะเจ้าแหนจักหน่อย สบายดีบ่อท่านสุขดีบ่อเจ้าเนาเฮือนเป็นจั่งได๋..
    ทุก ๆ ท่านสบายดีบ่อน้อ

Tags for this Thread

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •