ก้อยลิ้น
มื้อวานฅนภูไทไปเอาบุญแอว เจ้าภาพเพิ่นล้มงัวพอดีฅนภูไทไปซ่อยคะเจ้าคัวเลยขอลิ้นงัวคะเจ้ามา ตอนแรกว่าสิย่างกิน แต่ว่าย่างกะกินดู๊แล้ว เลยว่าสิลองย่างก้อยลองเบิ่ง ก้อยลิ้นนี้กะมีหลายสูตร สูตรของฅนภูไทกะเป็นอีกหนึ่งที่เฮ็ดบ่ยากปานได๋ มาเบิ่งกันเลยครับ
มาเบิ่งหน้าตาลิ้นงัวกันเลยครับ
อันดับแรกเฮากะเอาลิ้นงัวมาแล่ แล้วกะเอาไปย่างไฟ ย่างพอสุก อย่าให้สุกจนเกินไปเพราะเนื้อมันสิแห้งและเหนียว
พอสุกแล้วเฮากะเอามาซอยเป็นต่อนน้อยๆบางๆ เพื่อสิให้มันเข้าเครื่องได้ง่าย
ทีนี้เฮากะมาปรุงกันเลย ใส่น้ำบักนาว พริก ข้าวคั่ว น้ำปลา ต้นหอม ผักชี ผักชีฝรั่ง คลุกเคล้าให้เข้ากัน (ใช้มือคั้นเอากะได้เด้อครับ มันจั่งสิเข้าเนื้อเข้าหนัง) ปรุงรสตามใจชอบ
ตักใส่จาน เสริฟเป็นกับแกล้ม หรือเสริฟกับข้าวเหนียวฮ้อนกะแซบ 8)
Bookmarks