... อยากมีเธอเป็นแฟน ...

[บ่าวโจ่โล่]

[wma]jolo/Other/Girlfriend.wma[/wma]

ปราถนาเคียงข้าง พอได้ย่างตางควงแขน ปราถนาเป็นจั่งแฟน มาทดแทนยามเหงาฮ้าย

มีบ่หลายหมายอยากให้ นั่นคือใจไผดวงหนึ่ง ด้ายความฮักลักคิดถึง จารำพึงถึงแต่เจ้า อ้ายหลงเว้าอยู่ผู้เดียว

มื้อได้เหลียวไปมองหน้า มื้อได้จาคำเอื่อนเอ่ย มื้อได้เกยคางเบิ่งเจ้า ย่านความเศร้าแม่นบ่มี

ดอกราตรีผู้หอมเอ้า ดอกคัดเค้าผู้หอมกลุ่น สิซ่ำซูนหอมแก้มเจ้า หยังสิเท่าแน่บ่น้อ

หากสิขอเป็นแฟนอ้าย เฮ็ดหยังหลายอยู่บ้ออุ่น จากผู้เริ่มต้นจากศูนย์ สิค้ำคูนเฮ็ดนำเจ้า บ่กล้าเว้ายิ้มส่งอ้ายแน่เด้อ

::)

[ไก่น้อย]

อ้ายเอ้ย ....คั่นบ่จริงอย่าฟ้าวเว้า คั่นบ่เอาอ้ายอย่าว่า
ย่านตะเป็นลมส่า พัดแต่ใบตองแห้ง ให้หมาน้อยได้แต่มอง......นั่นแหล่ว
ย้อนว่าแนวนางน้อง คือกาดำบ่ห่อนเวิน ..บ่อาจเหินเฮียบข้าง ทางเจ้าเพิ่นผูดี ดอกอ้ายเอ้ยย.......




ปล...สบีดาย สบายดีบ่น้อ เจ้าของกะทู้คือมิดคือบักหอยไข้แทะน่อ... ::)

[หนุ่มเหงาคนไกลบ้าน]

ใจประสงค์มาดแม้นคงใด่ซิเป็นคู่
ฮู้ก้อฮู้ว่าเจ่านั่นมีเจ่าของอยู่แล้ว
ใจนี่อยากใด่น้องมาเป็นแฟนน้อเคียงกาย
ตงซิสมดั่งหมายหางนางน้องนั่ยิมยอม..........พะนางเอ๋ย



มักๆๆๆๆๆอ้ายเพลงนี่นะ

[บ่าวโจ่โล่]

คือมาถามข่าวผ่านบอร์ดจ้อแท้หล่ะน้อไก่น้อย เนาะ อันถามว่าซำบายดีบ่ กะตอบว่า พออยู่ แต่ว่าลางเทื่อกะพอกิน ลางเทื่อกะบ่พอปากน้องเอ๊ย
ฮ่า ๆ ๆ ดิ้นหลายโพดหรือจั้งได๋บุ คิดฮอดท่าน ทุกคนเด้อครับ อันคือว่าอ่ะหล่ะ บอร์ดผญา กะมีคนอ่านบ่หลายปานได๋
เขียนลงดู๋หลาย ไทยบ้านกะสิเอียน หนิหล่ะ ขอโทษขออภัยนำผู้ได๋เอียนแล้วเด้อครับ ฮ่า ๆ ๆ

::) ::) ::)

[sompoi]

บ๋า.. มะส่างว่า..คนอ่านหลายอยู่ตั้วอ้าย.. บ่อเสื่อถามอ้ายศรีเล้าเบิ่ง..แฟนคลับหลายจนแจกลายเซนต์บ่ทัน พะนะ.. ::)

[ไอ้เก่ง คนเลย]

สุดสะแนนงามเหลือฮ้าย.....ไผ๋กะหมาย....อยากเป็นคู่

เขียวเอ๊ยเขียวใบพลู ......ยอดมันสูงกว่าต้น .....ไผ๋เล่าสิโก่งเถิง

เลื้อยไปอยู่เจิ้งเทิง..... โอบรัดดอก....พันหนา

พันวัล บุปผา .........แกมสกุณา...ยอกเย้า

วาสนาของเขาแท้........ คือมาดี.....เอาหลายหนี่

โตอ้ายดำขี้หลี่ ......ขี้ฮ้ายส่ำดอกหญ้า .....ไผ๋น้อจั่งสิสน

แต่กะหนีบ่พ้น .....ทางใจคิด.....อยากเป็นแฟน

อยากสิเดินควงแขน.....ประกาศไป......ให้คนฮู้

นึกอดสู....เอาฮ้าย......คือสิอาย....คนเขาส่า

ย่านเปรียบ.....ไปอ้ายหว่า...ส่ำหมาวัด.....ขี้เฮี้ยน

ได้เคียงคู่ดอกพยอม..........จั่งซั้นหล่ะ นางเอย.........น้องหล่าเอย

[ศรีสะท้าน]

อยากมีเธอเคียงข่าง ศรีสำอางค์เกี้ยวก่าย
นั่งเฮียงเบียดไหล่ซ้าย กายกุ้มกอดกุม
ผ้าแพรปกป่ายตุ้ม เต็งตอบอายหนาว
แนมเบิ่งดาวเคียงเดือน เด่นดวงนภาพื้น
อยากไปยืนแนมฟ้า ดาราใสส่อง
มีแต่อ้ายและน้อง สองก้ำคู่เดียว พู้นแหลวฯ

[สาวหนองหาน]

::) ::) ::) ตะเอง ศรีสำอางค์มาแล้ว

เรียกเขาทำไมเหยอ.........พอดีได้กลิ่นธูปอ่ะ ฮั่นแน่มาบอกว่าอยากได้ศรีสำอางค์ เป็นแฟนจริงอ่ะ ::) ::) ::)

[ศรีสะท้าน]

โอ๊ยยยย..อันคำว่า ศรีสำอางค์ หนะเขาเปรียบเทียบ หมายถึงน้องคนไค น้องคนสวย ซั้นเด้เดียวนี้ หวืยยย แต่ถ้าแม่นหมายถึงผู้โผล่มากะแฮ่งดีหละหวา เอิ๊ก ๆ ๆ ๆ

[น้องแพรจ้า]

ไผเด๊น้อสิพอลุ้น เป็นแดดอุ่นมื้อลมหนาว

เป็นฟ้าขาวถ้าเคียงเดือน มื้อฝนเลือนบ่มีครึ้ม

สิเป็นฟืมสอดเส้นด้าย เป็นแพลายพอตุ้มห่ม

เป็นสายลมมื้อฮ้อน ฮ้อน เป็นหมอนข้างไว้ต่างเหงา

สิเป็นเงาพอเคียงข้าง มื้อน้องย่างอยู่เดียวดาย

เป็นความหมายคำว่าเฮา ใจพักเซาอยู่นำอ้าย ได้บ่น้อ