หลังจากพาพี่พาน้องนั่งรถ VIP 20 ที่นั่ง ติดแอร์อย่างดี ข้างรถเขียนว่า POLICE ล่องมาจนฮอดบ้านฮอดเฮือน กินข้าวกินน้ำ พักผ่อนเอาแฮง มา สิพาย่างเลาะบ้านบาดที่นี้
ตอนเช้า ของวันที่ 9 ก.พ. กะมีบุญข้าวจี่ (บุญเดือน 3) กะไดไปวัดนำเพิ่นเอาข้าวจี่ไปเฮ็ดบุญนำ อีพ่อลุกขึ้นจี่ข้าวให้แต่เดิก
จากนั้นกะได้ไปไหว้อัฐิของคุณแม่ดาวลอย ซึ่งเพิ่นได้เสียชิวิตไปเมื่อปี 2539
จากนั้นแดดร่มลมตกตอนใกล้ค่ำ ไปเบิ่งไฮ่เบิ่งนา ให้หลานปลูกมันปลูกอ้อยเฮ็ดนาไปตามฤดูกาล
สระน้ำขนาดเล็กที่อีพ่อเพิ่นขุดไว้ มาเทื่อหน้าคือสิได้กินปลา
กายไปทางโรงเรียนเก่า มีความเปลี่ยนแปลง ตะก่อนเป็นไม้ บัดนี้เป็นตึกสวยงาม
ต้นหมากเค็งในโรงเรียน ตะสมัยเด็กเคยขึ้นกิน จนครูตีกะยังอยู่คือเก่า
ท่านพ่อครูจำเนียร ภูวิชัย ครูท่านแรกของหนุ่มเมืองกาญจน์ สอนตอนเข้า ป.1 ตอนนี่ท่านเกษียณ แล้ว มีโอกาสได้มาไหว้ท่าน
เลยไปเทิงโคกดินแดง ป่าชุมชน หนองน้ำที่เห็น สมัยก่อนเป็นเด็กน้อย เลี้ยงควายสิเอิ้นว่าโสกแต้วิทยาคม เนื่องจากเป็นที่รวมของเด็กทุกหมู่บ้าน(ที่ไม่มีโอกาสเรียนต่อ)สินำควายมาเลี้ยงที่ป่าแห่งนี้ มีเนื้อที่เป็นหมื่นไร่ และป่านี้สิเป็นที่ทำมาหากินของชาวบ้าน บ่ว่าสิหาของป่า เก็บเห็ดเก็บฟืน หนุ่มเมืองกาญจน์กะใหญ่มากับป่านี้คือกัน เป็นลำห้วยที่กั้นเขตจังหวัดมหาสารคามและกาฬสินธุ์ ฝั่งตรงข้ามคือเขตสารคาม ตอนนี้มีการพัฒนาให้เป็นฝายน้ำล้น
ข่วมโคกมาอีกฟากหนึ่ง สิเป็นอ่างเก็บน้ำขนาดเล็กของกรมชลประทาน เรียกว่า"อ่างเก็บน้ำวังลิ้นฟ้า" เป็นอ่างเก็บน้ำสำหรับการเกษตร และเป็นสถานที่พักผ่อนหย่อนในของคนในตำบล
บรรยากาศมันเป็นใจเนาะ
ใกล้ค่ำยามตะเว็นตกดิน บรรยากาศที่ไม่อาจบรรยายเป็นอักษร แฮ่งทำให้คิดฮอดความหลัง คึดฮอดวันวานบ้านเกิด
ตกเย็นกินข้าวแลง กะมีพี่น้องญาติมายามถามข่าว กินข้าวนำกัน
หลังจากนั้นตอนสายมือต่อมากะต้องเดินทางกลับกาญจนบุรี ขากลับมาแวะที่ วนอุทยานโกสัมพี อ.โสมพิสัย จ.มหาสารคาม มายามญาติว่าซั่น
มาถึงท่าช้าง -กลางดง แวะซื้อของฝากให้ญาติมิตร
คุณน้ำตาล พบรักกับหนุ่มกลางดง
งานเลี้ยงย่อมมีวันเลิกราฉันใด การกลับมายามบ้านครั้งนี้ก็ย่อมต้องหมดเวลาเช่นกัน แต่การต่อสู้ชีวิตของหนุ่มเมืองกาญจน์และพี่น้องชาวอีสานทุกคน ก็ย่อมดำเนินต่อไป เหมือนกับ อาทิตย์ที่กำลังจะลับเหลี่ยมเขา พรุ่งนี้ก็จะกลับมาใหม่ เป็นเช่นนี้จนกว่าชีวิตจะสิ้น (ในภาพดวงอทิตย์กำลังจะลับฟ้าที่กลางดง)
ขอบคุณทุกท่านที่มาส่ง มีโอกาสสิพาพี่พาน้องไปยามบ้าเฮาอีก ( ท่านใดมีเพลงลาบ้านของเฉลิมพล เอามาลงให้แหน่เด้อ)
Bookmarks