มื่อคืนนี่ฮ้อนแฮงค่ะพี่น้อง อาบน้ำ 2 รอบกะแล้ว เปิดพัดลมแฮงสุดกะแล้ว
ยังฮ้อนคือเก่า หน้าแล้งอากาศฮ้อน ๆ แนวนี้คึดพ้อแต่ตอนน้องเขมฯเป็นเด็กน้อย(อีกแล้ว)
หน้าฮ้อนสิมีกิจกรรมคลายฮ้อนก่อนนอนตั่วค่ะ เด็กน้อยแถวบ้านน้องเขมฯ ได้โคม
ไฟผู้ล่ะอันกับถุงผ้าแหง่งเขียวลงท่งหาเก็บเขียดน้อยค่ะ บ้านน้องเขมฯผัดอยู่นอกบ้าน
หน่อยหนึ่ง ผู้ได๋ออกไต้เขียดต้องหย่างผ่านหน้าบ้าน เห็นไผ๋มากะถือโคมไฟแล่นนำเพิ่น
ไปโลดค่ะ บ่ต้องไปชวนไผ๋ หย่างไปจั๊กคราวกะฮอดห้วยเชือกค่ะ สิมีเขียดโตน้อย ๆ เต้น
โค้บ ๆ อยู่ค่ะ เก็บใส่ถุงผ้าแหง่งเลย ผู้บางคนเพิ่นเอาแหง่งใหญ่ที่ซ้อนกุ้งไปนำค่ะ เพิ่นกะ
สิเอาซ้อนเขียดได้ไวบ่ต้องนั่งเก็บ แต่น้องเขมฯมักเก็บเทื่อล่ะโตค่ะ ขี้คร้านหย่างดู๋คือเพิ่น
มีทั้งเขียดน้อย เขียดขาคำ ที่เอิ้นว่าเขียดขาคำ ย้อนว่าหม่องขาโอ้ยมันสิมีเหลือง ๆ ค่ะ
ฮอดหม่องได๋เป็นวังน้ำ ยังซุ่ม ๆ อยู่กะสิมีเขียดหลายแหน่จั๊กหน่อย แยงไฟขึ้นฝั่งห้วยเห็น
ผักติ้วดอกขาวจุ่นพุ่น(คือสิบ่ต้องแปลคำว่าจุ่นพุ่นเน๊อะค่ะ) กะหักหง่ากันติดมือมานำเทื่อ
เฒ่าแม่สิได้ใส่ต้มปลาหรือกินกับป่น ไปบ่พอคราวกะเมือค่ะ ฮอดบ้านเฒ่าพ่อกะมักสิบอก
ว่า"ใสมาเบิ่ง..มื่อนี่มีเขียดตาบอดจั๊กโต" น้องเขมฯกะเคยสงสัยว่าเป็นหยังคือเิิอิ้นเขียด
ตาบอด เฒ่าแม่เพิ่นกะสิฟ้าวอธิบายว่า " เขียดตาบอดมันบ่เห็นหุ่งเต้นหนี น้องเขมฯเลย
จับมันได้" น้องเขมฯกะเคี๊ยดให้เฒ่าพ่อว่าซั่นนี่ค่ะ หาว่าเฮาหาเขียดบ่หมาน อันที่จริงบ้าน
น้ิองเขมฯเพิ่นกะบ่ค่อยมีผู้ได๋มักเขียดน้อยดอกค่ะ เฒ่าพ่อว่ามันโตน้อยต้องกินหลายโต
บังเบียดหลายชีวิตกว่าสิอิ่มว่าซั่น แต่น้องเขมฯหั่งมักไปไต่เขียดน้อย กะหมู่หลายเน๊อะ
ค่ะ ม่วนคักยามไปไต่เขียด พอได้เขียดมาเฒ่าแม่กะสิขังใส่ผ้าแหง่งนั่นล่ะจั๊กคืนหนึ่งให้
มันคายดิน ยามมื่อเช้าเลากะสิหมกใส่หัวสิงไคหลาย ๆ ข้าวคั่ว ผักอิตู่ สุกแล้วกะให้น้อง
เขมฯเอาไปให้บ้านพ่อใหญ่แหน่ บ้านย่าแหน่ อั่นน้องเขมฯมี บ้านพ่อใหญ่แม่ใหญ่ ปู่ย่า
ในหมู่บ้านเดียวกันนั่นล่ะค่ะ มีคนบอกว่าเฒ่าแม่เฮ็ดหมกเขียดแซ่บ เพิ่นกะแฮ่งอยากให้น้อง
เขมฯไปไต่เขียดซู่มือหมกแจกใทบ้านไปทั่ว อั่นมีแม่มักย่องค่ะ ว่างานบ้านมหาสัญจรสิ
ย่องว่าเพิ่นเฮ็ดลาบเป็นแซ่บหลาย ๆๆๆๆๆ เพิ่นสิได้เฮ็ดอย่างสุดฝีมือ....ไปฝากพี่น้อง
บ้านมหา::)::)::)
Bookmarks