คิดฮอดงานพาแลง 2 จังเลยจ้า...
งานพาแลงครั้งนี้เป็นงานพาแลงที่ม่วนกว่าครั้งที่ 1 สมกับการรอคอยมาเป็นปีที่สิได้พ้อพี่น้องจ้า...ได้เฮ็ดอีหยังที่ไม่คิดว่าจะได้เฮ็ด ได้พ้อพี่น้องที่เว้ากันทางอักษรมาเป็นปี ได้กอดคนที่คิดฮอดจัง ได้กอดอ้ายหล่อ ได้กอดอ้ายเต็ม ได้กอดอ้ายบ่าว ได้กอดอ้ายทิดเพิ่ม แล้วที่เหลือไม่ได้กอดเลยนะ เสียดายหลายจ้า เอาไว้ปีหน้าน้อจั่งกอดกันใหม่...
ที่ประทับใจที่สุดคือได้รำบายศรี ซึ่งมาแล้วบ่คิดว่าสิรำได้เลยนะ...มื้อวันพฤหัสบที่ 5 มีนาคม 2552 อ้ายพลโทรไปที่ทำงานบอกว่าฟ้าวกลับบ้านแนะเด้อ ดีเจปุ้ย ดีเจส้มป่อย เอื้อยติ่มสิมาซ้อมรำบายศรีอยู่บ้านสิให้เด็กน้อยรำนำพะนะ เด็กน้อยกะว่ารำบ่เป็นจ้า อ้ายพลบอกว่าถ่าเด็กน้อยบ่รำเอื้อยติ๋มกะสิบ่รำพะนะ พอได้ยินเช่นนั่นไม่ต้องคิดมากเลยจ้า เด็กน้อย รีบตอบอ้ายพลว่าอ้าวรำกะรำสั่นตั้วจ้า ในกะว่ารำให้เบิ่งแล้วเพิ่นกะตัดสินใจเอาว่าสิเอาหรือบ่เอา สำหรับบ้านมหาแล้วจัดให้จ้า...
พอกลับถึงบ้านกะเห็นมี ดีเจส้มป่อย ดีเจปุ้ย น้องสายลม กำลังหัดรำบายศรีกันอยู่จ้าแต่เอื้อยติ๋มนั่งเบิ่งบ่รำเลยนะ เด็กน้อยไปถึงกะกินข้าวบ่ฮึจำบ่ได้แล้ว จากนั่นกะซ้อมนำเพิ่นจ้า แล้วประมาณทุ่มกว่า ๆ น้องแนนลูกยายหนูกะมาสมทบอีกคนจ้า เป็นอันว่า รำ 4 คน ซึ่งตอนแรกว่าจะรำ 6 เอื้อยติ๋มตัดช่องน้อยแต่พอตัว ดีเจส้มป่อยอาจาย์สอนรำบายสีกะบอกว่า รำแค่ 4 คนพอดีแล้วจ้า งั้นว่าใด๋ว่ากันจ้า กะซ้อมกันถึงจักทุ่มจำบ่ได้จ้า กะดึกพอก่อน ต่างแยกย้ายกันกลับนัดซ้อมอีกมื่อ วันศุกร์ที่ 6 มีนาคม 2552 ตอนเที่ยงจ้า และเด็กน้อยกะลางานครึ่งมื่อบ่ายจ้า มาซ้อมนำหมู่ ซ้อมจนดึกแล้วมื้อนั่นหมอลำอ้ายธนิตพร้อมด้วยหมอแคน นางเอก พระเอกหมอลำพากันมารำออกอากาศนำจ้า เป็นบรรยายกาศที่อบอุ่นจัง
และเป็นเรื่องที่น่าเสียดายจ้าภาพเด็กน้อยถ่ายรำบายศรี ออกอากาศพระเอกหมอลำ และภาพที่ถ่ายในงานพาแลงหายไปเกือบเบิดเหลืออยู่ไม่กี่ภาพที่ลงให้พี่น้องเบิ่งไปนั่นล่ะจ้า...เป็นเรื่องที่เด็กน้อยเศร้าใจถึงขณะ เว้ามายามใด๋ คิดยามใด๋แม่นน้ำตาไหลเลยจ้า เสียใจจังเลยจ้า ...นั่นคือส่วนที่เสียใจ เสียดายนะที่บ่ได้เอาภาพประทับใจต่างๆ มาให้พี่น้องได้เบิ่งจ้า แต่นั่นมันผ่านไปแล้วไม่สามารถแก้ไขได้ แต่กะเสียใจมาก ๆๆ จ้า
แต่สรุปแล้วกะมีเรื่องประทับใจพอให้คลายลืมเรื่องรูปไปได้หลาย เพราะความสุขมื้อนั่นม่วนสุด ๆ ได้รำ เป็นครั้งแรกที่เด็กน้อยรำเป็นจ้า เพราะงานพาแลง 1 อิจฉาอ้ายบ่าวคนเดิมเพิ่นรำคู่กะเอื้อยนานา อยากรำแต่รำบ่เป็นตกมาปีนี้ได้รำเป็นถูกใจจ้า ขอบคุณดีเจส้มป่อยอาจารย์ที่รัก ที่สอนศิษย์ให้รำเป็นนะคะ จุ๊บ ๆๆๆ
ประทับใจนางรำบายศรีทั้ง 4 น้องแนน น้องสายลม ดีเจปุ้ย เด็กน้อย อาจารรย์ส้มป่อยผู้ฝึกสอน กองเชียร์เอื้อยติ่ม เพื่อนน้องแนน พอกระเทิน อ้ายพล และมักหล่า ประทับอ้ายทิดศรี อ้ายโป้ยก่าย และพี่น้องที่ไปร่วมงานทุกคนเลยจ้า เสียดายบ่ได้กอดทุกคนแมะ เอาไว้ปีหน้าน้องานพาแลง 3 พ้อกันอีกจ้า...
ว่าแล้วกะคิดฮอดงานพาแลง 2 และกะอยากให้มีงานพาแลง 3 ไว ๆ จ้า....
คิดฮอดจังเลยจ้า...นอนดึกอีกแล้วล่ะ ไปล่ะนะ หลับฝันดีจ้า บายๆๆ จุ๊บ ๆๆๆ
คิดฮอดรูปที่หายไปที่สุดในโลกเลยนะ... ไหนบอกว่ากู้รูปได้ไง บ่เห็นกู้ได้มาเลยน้อ
Bookmarks