ต้มส้มปลาค้อใหญ่ใส่มดแดง



เมนูมื้อนี้ซือวา "ต้มส้มปลาค้อใหญ่ใส่มดแดง"


วัตถุดิบ

1. ปลาค้อใหญ่ จัก 2 โตกะพอแล้ว เดี๋ยวสิกินบ่เหมิด คัวเกล็ด หั่นให้เรียบร้อย

ต้มส้มปลาค้อใหญ่ใส่มดแดง


2. มดแดง กระประมาณบ่ถืก ตอนจับมาบ่สามารถตวงได้ มันไต่หนีหมด
เป็นอันวาประมาณ กำมือใหญ่ๆนึงพู้นหล่ะ ฟ้าวกำฟ้าววางเด้อ เดี๋ยวมันกัดเอา


ต้มส้มปลาค้อใหญ่ใส่มดแดง


วิธีการ
เอามดแดงง่ายๆ คือเอากระสอบปุ๋ยไปล้อมรังมดแดง
แล้วสั่นกิ่งไม้นั้นให้มดแดงตกมาใส่ถุงปุ๋ย จ้า หากแต่ละรังมีไข่หลายกะเอา
ประมาณ 2-3 รัง ก็พอเด้อ มันสิส้มเด๊ะละ


3. หัวสิงไค หรือ ตะไคร้ ทุบหัวแล้วหั่นเป็นท่อนๆ

4. หอมเป หรือ ผักหอมหนาม หรือ ผักชีฝรั่ง มีส่วนให้กลิ่นคาวครับ

5. ใบบักหูด (ใบมะกรูด)

6. ข่า


เครื่องปรุง
1. ปลาแดก น้ำปลา เกลือ
2. พริกแห้ง
3. หอมแดงหั่น
4. ผงชูรส ไผบ่กินกะบ่ต้องใส่


วิธีการปรุง
1. ตั้งหม้อ ตำบักพริกกับเกลือ ใส่ข่า หัวสิงไคที่หั่นเป็นท่อนๆ
หอมแดงหั่น ต้มน้ำให้เดือด
2. ใส่น้ำปลาแดกลงไปตามที่คิดว่ามันบ่เค็ม
3. พอน้ำเดือด ฟดบั๊วๆๆๆ เฮากะเอาเอาปลาค้อที่เฮาหั่นไว้ใส่ลงไปในหม้อ
(วาตะใส่ตอนที่น้ำบ่เดือด ปลามันสิคาวนั่นหนา)
4. ถ่าจักคราวพอปลาเริ่มสุก ตักฟองออก เพื่อให้น้ำใส ใส่มดแดง
ที่เตรียมไว้ลงไป
5. ใส่หอมเป ให้หอม
6. ปรุงรส ตามใจชอบ
7. ยกออกจากเตา สิเห็นมดแดงลอบละล่อง พร้อมรับประทาน

ในฐานะเป็นคนทำก็ขอตักก่อนเด้อจ้า สิจองปลาค้อตัวใหญ่เอาดอกจ้า
และมื้อนี้ก็บ่แมนปอบเด้อ แต่ทำไปน้ำลายไหลไป ไปละครับผม (มือนี้แปลงเพศจักหน่อย)
...อิอิ