ไหว้พระบรมครู โดย จ.เขมจิตต์

[บ่าวโจ่โล่]

ผมคือสิว่า

ขอพนมก้มกราบไว้ เ็ป็นบุญหลายได้ฟังท่าน เสียงหวาน หวาน ได้แต่งแต้ม

ผญาแย้มให้ม่วนหู นับถือครูผู้สรรสร้าง เป็นแนวทางตางสืบส่ง ซ่อยดำรงค์ช่อยกันค้ำ

วัฒนธรรมแน่น แก่นอิสาน เด้อครับ ครูบา อาจารย์ ท่านกะดาย

ขอบคุณผู้เผิ่นป่อง เนาะครับ อาจารย์ศรี และอาจารย์ จ.เขมจิตต์ อาจารย์ทอง เสียงเฒ่า

[thong]

บ่าวโจโลเอ้ย....
วัฒนธรรมบ้าน ถิ่นอีสานเกินขานค่า
ซ่อยกันแหลว..ผู้ละส่วนสรรหา หาแนวนั้นแนวนี้ เติมไว้ส่งเสริม
ฮักกันนี้เป็นที่เริ่ม เติมญาติบ่ขาดหาย
กระชับสายสัมพันธ์ คือจั่งกันกับคำเว้า
อีสานเฮาเอาคำบ้าน เป็นสะพานถามไถ่
ถามว่า..บ่าวโจ่โล่เอ้ย...เจ้าอยู่ดีแน่บ่ได๋ สำบายสุขทุกค่ำเช้า นาข้าวได้หว่านดำ..อยู่บ่ ฯ
(ถามซ่ำนี้ก่อนเนาะ)

[sompoi]

ขอออนซอนนำแน่ะเด้อพี่น้อง ได่เรียนสำเนียงเสียงอ่านผญาไปนำ เป็นวิทยาทานคักจ้า ม่วนอิหลี เข้ากับเสียงแคนเลยจ้า ขอขอบคุณเด้อค่ะ

[เรวัฒน์]

สาธุนำเด้อ ผุเผิ่นฮู่ซอยเป็นครูไฮ่ลูกหลาน หัวก่อเกิดได่ใหย่นำหลัง หวังเอาฮอยครูไว้ส่งต่อไปไห่เชิดชู

[khemajitta]

แผ่นดินไผ
คนว่าแผ่นดินข้อย อวดฮอยเก่าวาดเงาสี
แผนที่มีเป็นหลัก ปักเขตกันปันแนวไว้
ไผกะไผเจ้าของอ้าง ทางนี้ผิดทางนั้นแม่น
กรรมสิทธิ์เหนือดินแดน แผ่นนี้ปฐพีข้า อย่าหาญกล้าอวดเอา
นี้บ่แม่นของเจ้า ตระกูลเก่าข้อยคราวกก
ยกมาให้ลูกหลาน เพิ่นแบ่งสรรปันมูลไว้
เทิงหมู่นายที่ดินแจ้ง แสดงใบครอบครองก่อน
โฉนดมีที่ดิน เหนือนาดอนบ่อนโคกค้อย แม่นของข้อยตั้งแต่นาน
ต่างคนโสโตผู้ปั้น เลยห้ำหั่นประหารตี
รุกราวีอ้างมีสิทธิ์ ขีดเส้นครองเจ้าของอ้าง
จักไผวางคำนี้ไว้ มีสิทธิ์กายเหนือพื้นแผ่น
อำนาจครองเจ้าจองแดน แผ่นดินได๋ไผผู้ได้ ไผหาพ้อหากบ่มี
ดินคือดินอยู่จั่งซี้ บ่มีผู้อยู่คงโดน
ไผผู้คนเจ้าของดิน ซอกจนวินบ่ผินพ้อ
เกิดมาขออาศัยซ้น วนเกิดตายหลายร้อยเล่า
คนยุคได๋สมัยเก่า ฮอดยุคเฮาสุมื้อนี้ บ่มีแท้ผู้เจ้าของ
สมมติโตว่าถืกต้อง อ้างโตป่องโลภถองใจ
แต่สมัยอาศัยดิน ยังอยู่กินนำดินด้าว
บ่เคยเอาปากกาจ้ำ เฮ็ดนำกันปันดินอยู่
สมัยนี้คนคือลู่ อยู่อาศัยดินแท้แท้ สิมาแหย่ฮอดแผ่นดิน
คนเอ๋ยคน....ใจสังมาดีดดิ้น กินสมส่าวบ่พอตัก
ดินคือดินไผสิปัก พรากดินแดนแทนไผได้
แผ่นดินไผถามเบิ่งเจ้า คนจั่งเฮาคือไผอยู่
อยู่นำกันอาศัยหมู่ สัตว์หม่นฮูบ่ห่อนอ้าง คนหากม้างถิ่มบ่อนเขา
ปะฐะพี...บ่มีไผเป็นเจ้า เพียงแต่เช่าบ่ทันตาย
บัดเมื่อกายเขาฝังดิน จั่งแม่นซินบ่สมได้
ดินกินกายไผเป็นเจ้า ไผอยากเอาท่อได๋ไฮ่
ขีดแล้วแบ่งปันจนตาย บ่มีไผได้ท่อก้อย น้ำตาย้อยหยาดสู่ดิน
ความเป็นคนก่อนสูญสิ้น ก่อนดินลบกลบฝังกาย
อย่าโลภหลายกระหายผิด หลอกคิดวนจนโตบ้า
ได้เกิดมาอย่าหลงส้น ดีส่ำคนนั้นเกินซ่า
ชั่วแม่นคนเฮ็ดบาปหนา อาศัยดิน อย่าปีนอ้าง หลงเวรสร้างว่า ?เจ้าของ? หลายเด้อ ฯ
จ.เขมจิตต์
๑๗ มิ.ย. ๕๒

[khemajitta]

ขอฝากผญาบทนี้ สำหรับเป็นวิธีคิดแบบพุทธศาสนา
ทุกสิ่งทุกอย่างในโลกนี้ บ่แม่น ของไผ
ทำความเข้าใจแล้ว กะสิบ่อยากได้ของไผ มาเป็น ของเฮา เนาะ
โดยเฉพาะของที่บ่สามารถมีกรรมสิทธิ์ได้อีหลีจั่งแผ่นดิน ฯ
คนสิยาดแย่งกันไปจั่งได๋กะซ่าง สิบอกว่าเป็นเจ้าของแผ่นดินจักหม่อง จักแปลงกะซ่าง
ที่สุดแล้วแผ่นดินก็กลบหน้าผู้นั้นทั้งเหมิดนั้นแหละ
และดินที่กลบนั้น ก็สลายร่างคนจนบ่เหลืออีหยังจักหน่อย
เพราะฉะนั้น ไผสิเป็นเจ้าของที่ดินแท้ ๆ บ่มีดอกเนาะ ฯ
จ.เขมจิตต์

[ศรีสะท้าน]

อนุโมทนาน้อม จอมใจไขต้านกล่าว
ฟังเสียงหย่าวคักแท้ ผญาแก้กล่าวกลอน
บทออนซอน อ.เขมจิคค์มาตั้งรจจะนังไขป่อง
อันว่าพวกพี่น้อง เห็นแล้วให่จื่อเอา
พอบรรเทาหมองซ้ำ เสียงพระธรรมเพิ่นแจ้งส่อง
จำไว้เด้อพี่น้อง ครรลองเค้า เถ่าเพิ่นสอน นั้นแหลว

[khemajitta]

จาบ่แจ้ง แถลงแจงบ่กระจ่าง
มีบ่อนจาง บ่ให้จ้าง แจ้งมาบ้างสิตื่มจา
ผญาแจวบ่แจ่มจ้า คือปราชญ์จ่าหัวหน้าแจว
คำเพิ่นแจ๋ว แจวซ้ำได้ ความจาให้จ่องจำ...แน่เด้้อ..ฯ
จ.เขมจิตต์

[เเมงสะดิ้ง]

[B]นมัสการค่ะท่านจ.เขมจิตต์
คั่นสิรบกวนให่ท่านแปะคำผญาสอนใจหญิงลงไว่หม่องนี่
สิได้บ่เจ้าค่า อยากเว่าอยากท่องวานำแหม่ะจ้า ม่วนแฮงกินใจคัก
อยากเป็นแฮงน้อยๆ พอได้ซ่อยสืบสานสั่นดอกค่า
สักมื่อหนึ่งสิหาโอกาสไปไหว้ท่านอยู่เด้อค่าได้เว่าได้จากับอาจารย์ทองแหล่วค่ะ
สาธุบุญนำหลายๆ

[khemajitta]

สำหรับผญาทั้งเหมิดที่บันทึกเสียง จำนวน 2 ชุด ได้ส่งให้เวปบ้านมหาเหมิดแล้ว ทางเวปเพิ่นได้ลงไว้ในหมวดนิทานก้อมฉบับผญาหม่องนี้
นิทานก้อมฉบับผญา
ขั่นสิแยกกลอนมาแปะ กะเฮ็ดบ่เป็น ตั้งแต่ไฟล์เสียงกะส่งมาให้เจ้าหน้าที่เพิ่นพิจารณาลงเอง

แต่ว่าสำหรับผญาสอนหญิงบทใหม่ยังบ่ทันมี
ผญาที่ทางเวปได้ลงไว้แล้วนี้ ต้องไปจ้างบันทึกเสียงอยู่ห้องบันทึกเสียงเพิ่น ก็เลยเฮ็ดเทื่อละท่อนสั้น ๆบ่ได้ ถ้าคุณผุ้สาวไทบ้านสนใจถามข่าวจากอ้ายทองกะได้เด้อ
แต่ว่ามีข่าวเพิ่มเติมให้เนาะคือว่า

ตอนนี้กำลังสิบันทึกเสียงผญาเล่มที่ 4 คือผญาบั้นทุกข์ ซึ่งได้ส่งมาให้เจ้าหน้าที่เวปบ้านมหาแล้ว ซึ่งสิบันทึกพร้อมกับผญาเล่่มที่ 5 ชื่อหนังสือว่า ทำวัตรฉบับผญา และฉบับสรภัญญ์ คาดว่าอีกประมาณ 2 - 3 เดือนถึงจะแล้วเสร็จทั้งหนังสือและบันทึกเสียง เพราะว่างานต้องค่อยๆเฮ็ด อีกอย่างต้องใช้ทุนหลายพร้อม ซึ่งทางผุ้เฮ็ดบ่ได้จำหน่าย เฮ็ดใส่ห้องสมุด แล้วก็แจก ก็เลยต้องค่อย ๆ เฮ็ดตามกำลัง ถ้าเสร็จแล้วสิแจกคุณผู้สาวไทบ้านพร้อม จองกับอ้ายทองไว้เด้อ