..อ้ายฮู้บ่ ว่าน้องเหงา..

[บ่าวจ้ำ]

มาเคียดแค้นชิงชังหยังแท้อ้าย
เจ้าหนีไปน้องเหงาเลยเอาผัว
เจ้าเปนหยังจั่งมาหาว่าน้องซั่ว
เว่าไปทั่วว่าบ่ฮักษาสัญญาไว้

กะอ้ายนั้นหายไปตั้งหลายปี
ข่าวเคยมีส่งมาหาน้องไหม
ถามเขาทั่วกะบ่ฮู้ว่าอยู่ไส
เปนหรือตายจั่งได๋บ่ได้ข่าว

คำสัญญาเฮานั่นเคยมั่นแก่น
น้องจำแม่นบ่ลืมไลตั๊วอ้ายบ่าว
ว่าจะฮักอยู่กันดนจนแก่เฒ่า
แปงเฮือนเล้าเฮาโฮมฮักหลักแน่นเหนียว

อ้ายฮู้บ่น้องเหงาเศร้าปานได๋
อ้ายทิ่มให้น้องหดหู่อยู่ผุเดียว
ยามน้องเหงาเขามาหมั้นผูกพันเกี่ยว
น้องผุเดียวสิรับโทษทัณฑ์สัญญาต้อง

อ้ายหนีไปไกลดนเลยบ่เอ่ยลา
บาดกลับมาน้องนี่มีเจ้าของ
อ้ายตรอมใจไข้เจียนตายกะย้อนน้อง
เรื่องเฮาสองเซาซะอย่าคึดหลาย

ว่าน้องนี้กาลีผีแพศยา
ซังน้ำหน้าแค้นเคียดเกลียดโลดอ้าย
แรงแค้นเคียดเกลียดหน้าจะกลับกลาย
สิเฮ็ดให้อ้ายยืนจั้งตั้งแข็งมีแฮงสืบชีวิต.....ตั๊วอ้าย

Eจ้ำ#คนรักของไผ๋
เวอร์ชั่น เพราะใจฉันมันช่างรู้สึก(สงสัยจะมีเวอร์ชั่นเดียว..อิอิ)Vol. 22
๒๑ มิถุนายน พ.ศ. ๒๕๕๒

[สาวเกษตร]

ซั่นละอ้ายเอยไปไสมาไสกะบ่บอกกล่าวส่งข่าวเพิ่น
เพิ่นกะเลยไปทางใหม่สาละ อันแนวนี้บ่ถึกไผกะบ่ฮู้เนาะจ้า ::)

(ชาย) ..... อ้ายนี้อยากถามข่าวน้ำ ถามข่าวถึงปลา อยากถามข่าวนา ถามข่าวถึงเข้า (ข้าว) อ้ายอยากถามข่าวน้อง ว่ามีผัวแล้วหรือบ่ หรือว่ามีแต่ชู้ ผัวสิซ้อนหากบ่มี
(หญิง) ..... น้องนี้ปอดอ้อยซ้อยเสมอดังตองตัด พัดแต่เป็นหญิงมา บ่มีชายสิมาเกี้ยว พัดแต่สอนลอนขึ้น บ่มีเครือสิเกี้ยวพุ่ม พัดแต่เป็นพุ่มไม้เครือสิเกี้ยวกะบ่มี

[ละไมฝน]

ม่วนหลายเด้อ บ่าวจ้ำ

[khonsurin]

นี่แหละน้า ไปแล้วไปเลย บ่บอกบ่กล่าว เขาเลยมีใหม่จ้อย