ในความเห็นของผม โดยบ่มีการอ้างอิงหลักวิชาการ ผมว่าแจ่วกุ้งกินกับผักแว่นเข้ากันที่สุดเลยคับ คือพ่อแม่พากินมาแต่น้อยเนาะ ยามไปส่อนกุ้งอยู่ห้วยขี้หนูส่อนได้กุ้งแล้วบาดสิเมือบ้านกะเก็บผักแว่นที่มันเกิดอยู่ห้วยนั้นหละ ไปกินกับแจ่วกุ้งนำ เมือฮอดบ้านอี่พ่ออี่แม่บ่ทันมาแต่นาเด้ เฮากะจัดการนึ่งข้าว ระหว่างที่รอข้าวสุกกะเลือกกุ้งเลือกขี้เหยี่ยออกเอาแต่กุ้งว่าซั้นเถาะ มีแมงระงำติดมานำกะบ่ผิดกติกาแต่อย่างได๋ เลือกแล้วๆกะหาหยังมาปิดไว้ซะก่อน อย่าให้ข่วมเด้อ ค้านเก็บคืน เพราะว่ากุ้งมันโตน้อยๆหนึ่ง ไปเบิ่งข้าวตั้วบาดหนิ ข้าวสุกแล้วกะปิ้นซะก่อน ให้ข้าวทางเทิงลงไปล่าง ล่างขึ้นเทิง ให้สุกทั่วถึงกันว่าสั่นเถาะ นึ่งต่ออีกหน่อยหนึ่งกะเอามาส่ายได้เลย โบมอยู่บ้านใหญ่หลายยังว่า เป็นเด็กน้อยซั่วสิยกได้ เมื่อยแอ้แล้ โบมไม้เด้ เดียวนี้กะยังใซ้โบมอยู่ นั้นอี่พ่ออี่แม่กลับมาพอดี ถ่าให้อี่แม่มาตำแจ่วกุ้งสู่กินซั้นตั้วบาดเนี้ย พอได้เว้าแล้วอดีตกะเรียงล้ายส้ายออกมา อย่าฟ้าวหมั่นไส้กระผมเด้อคับ เล็กๆน้อยๆ ก่อนนำเสนอแจ่วกุ้งกับผักแว่นสั่นดอก ห่าเทื่อผู้ลังคนเห็นแล้วสิคิดพ้ออั่นได๋อั่นหนึ่งขึ้นมา หรือว่าสิกระตุ้นให้อยากกินอาหารแบบนี้นำกันคับผม
[IMG]
[/IMG]
หน้าตาแบบนี้หละคับ วิธีการเฮ็ดกะบ่ยากดอก ตำพริก กระเทียม บ่แหลกปานได๋ กะเอากุ้งลงตำนำพอกุ้งแหลกจักหน่อย กะปรุงรส น้ำปลา น้ำปลาร้า ผงชูรส บักนาว ผมบ่ได้ใส่ข้าวคั่วเด้ ไผสิใส่กะได้คับผม ตามสะดวก ได้รสชาดที่พอใจแล้วกะใส่ผัก เช่น สะระแหน่, ต้นหอม, แข่วเลื่อย, หอมป้อม เป็นต้น ตามสะดวกทีมี ยั๊วะจักหน่อย กะตักใส่ถ้วยได้เลยคับผม (รสชาดควรสิรสจัดจักหน่อย เพราะว่าต้องกินกับข้าวเหนียว และผักหลายๆ จั่งบ่เปลือง อิอิ)
[IMG]
[/IMG]
ผักที่หาได้ตามสะดวกอีกแล้วคับ แต่ที่แนะนำคือผักแว่น ยามจ้ำแจ่วกุ้งแล้ว แล้วกินผักแว่นตามเข้าไป มันสิมีกลิ่นหอมเฉพาะโตของผักแว่น แซบอี่หลี delicious คับผม แต่ว่ามื้อนี้ผมมีผักหลายแนวอยู่ คือ ผักแว่น, บักเขือ, ยอดกระถิน, แล้วกะหมากแข้งขม แม่ค้าเพิ่นแถมมา ขายบ่ออกว่าซั้น ผมลองกินเบิ่งแล้ว ขมอี่หลี กินได้สี่ห้าหน่วยนี้หละ เพราะว่าขมหลาย เฮ็ดให้กินข้าวบ่แซบคับ แต่ลังคนผัดมักเด้หละ มักไผมักมันเนาะคับ
[IMG]
[/IMG]
[IMG]
[/IMG]
Bookmarks