ต้มเนื้องัวครับ....

03-09-2009, 17:32

กลับเมืองไทย มีเมนูมานำเสนอคือเก่าครับผม....
ครั้งนี้เป็นต้มเนื้อครับผม ต้มธรรมดาบ้านเฮานี่ล่ะครับ....
เนื้อติดกระดูก กับเศษเนื้อ และ เอ็นเหลือจากการเฮ็ดเนื้อแห้ง....
เซียงเหมี่ยงฯ กะเลยคิดว่าต้มนี่ล่ะเหมาะแล้ว....

จัดการเครื่องต้มกะบ่มีหยังครับ ข่า สิงไค ใบบักกูด ลูกบักกูด(ถ้าหาได้) กระเทียม พริกแห้ง เกลือป่น

ใส่น้ำตั้งหม้อครับ...

พอน้ำเดือดใส่ เนื้อลงไป....

ปล่อยให้น้ำเดือดไปเรื่อยครับ กะกินต้มเปื่อย ๆ ต้มต่อไปสักสองชั่วโมง เนื้อกะเริ่มสิเปื่อยแล้ว จัดการตักออกมาเลาะเนื้อจากกระดูก กับ ซอยให้พอดีคำเนาะครับ กินง่าย ๆ และกะเอาลงใส่หม้อชิมรสตามปรารถนาครับ....

เตรียมถ้วย ใส่หอมซอย ผักชี น้ำบักจาว แจ่วเพี้ย(น้องพร ขมแซบ)

มากินนำกันครับ เปื่อย ๆ ขม ๆ โอ้ว ไคแหน่อยู่ครับ สมกับอยากกินมาโดน หน้างานบ่มีแบบนี้กินครับผม ฮ่า ๆ ...

เทนิคการต้มเนื้อให้เปื่อยง่าย ใส่ช้อน สแตนเลส ลงไปนำครับ เผิ่นว่าสิเฮ็ดให้เนื้อเปื่อยไว แต่ว่าเพราะหยังเซียงเหมี่ยงฯ กะบ่ฮู้ครับ แต่กะสังเกตระหว่างใส่กับ บ่ใส่ รู้สึกว่าต่างกันครับผม บ่ใส่จะใช้เวลาโดนกว่าในการต้มให้เนื้อเปื่อย....
ขอได้รับความขอบคุณจาก "ครัวเซียงเหมี่ยงฯ" ครับ
ติดตาม เมนูหน้า ตั้งใจสิเฮ็ด ซุปหางงัว มาฝากครับผม กลับเมืองไทยเที่ยวหน้าก่อน

**เซียนเมา** · 03-09-2009, 17:38

ผมเคยใด้ยินมาว่า ต้มเนื้อให่เปื่อยเร็ว ปาดบักหุ่งอ่อนใส่ลงไปในหม้อต้มเนื้อ
...เนื้อเปื่อยดีแล้วจั่งตักต่อนบักหุ่งออก (เท็จจริงประการใดบ่แน่ใจครับ)

**คนตระการ...** · 03-09-2009, 17:45

บ๊ะ..จักถ้วยแน่น๊าครับ ซดฮ้อนๆเบิ่งเด้.. เหรือว่า ฮ็ดกับแกล้มกะดี

**เขมราฐ** · 03-09-2009, 17:48

เป็นตาแซ่บแท้น้อ...กินต้มเนื้องอก โอ๊ะเนื้องัวยามได๋น้องเขมซงปวดแข่วทุกเทื่อเลยค่ะ ได้แต่ซดน้ำกับจ้ำแจ่วขม อิโตนเจ้าของคัก

**ตรี ศรีเมืองใหม่** · 03-09-2009, 18:12

บ่าวเซียงเมี่ยงฯ สิให้ครบสูตรเจ้าต้องเอาเพี้ยะอ่อน หรือไม่ก็ดีวัวใส่ลงไปนําจักหน่อยเด้อครับ รับรองขมตายบ่อเอาเรื่อง อิอิๆๆ

**บ่าวน้อยยโส** · 03-09-2009, 20:17

เมนูนี้ถืกใจหลายๆกลิ่นเนื้อต้มกับบักนาวมันกระตุ้นต่อมน้ำลายดีอีหลี..คั้นอยากให้เปื่อยไวผู้เฒ่าเพินว่า
ให้ใส่บักหุ่งดิบลงไปนำย้อนว่ามันมียางเนื้อเลยเปื่อยไว