มาเด้อจ้าไปเก็บเห็ดละโงก

**บักขามป้อม** · 12-09-2009, 11:34

กราบสวัสดีเอื้อยๆ อ้ายๆ บ้านมหาซู่ผู้ซู่คนจ้า อาทิตย์ที่ผ่านมาขามป้อมออกจากเกาะขึ้นฝั่งชั่วคราวจ้า หลังจากที่บ่ได้ขึ้นแผ่นดินใหญ่มาเป็นเวลา 1 ปีเต็มๆ ที่กลับบ้านเทื่อนี้ขามป้อมต้องลางานไว้ตะ 2 เดือนที่แล้วจ้า ลาไว้ดนคักย้านบ่ได้เมือ กิจวัตรประจำวันกะบ่มีหยังหลายจ้า นั่งๆ นอนๆ หากินแนวที่คึดอยากช่วงติดเกาะแล้วบ่ได้กิน กะแนวกินบ้านเฮานี่ล่ะจ้า

เอาล่ะจ้าเว้าหลายหยายห่างเปลืองพื้นที่ ก๊าก มื้อเกิดเหตุกะบ่มีหยังหลาย อาวเขยกับอาเพิ่นโทรศัพท์มาบอกว่า ตอนนี้อยู่ป่าเห็ดแล้วเด้อ ถ้าอยากกินแกงเห็ดกะให้ฟ้าวมา (บุ๊ยย ทันสมัยคักโทรจากป่าเห็ด ก๊าก) ขามป้อมกะฟ้าวนำเพิ่นแฮงจ้า จับได้กล้องกับกะต่ากะฟ้าวขับมอเตอร์ไซค์ฮ้างตามไปติดๆ จ้าหลังจากที่ถามพิกัดป่าเห็ดกันแล้วกะหากันจนพ้อกะเริ่มมุดเข้าป่าเห็ดเลยจ้า ที่ต้องใช้คำว่ามุดกะย้อนว่า หม่องนี้มันเคยเป็นโคกป่าจิกมาก่อน แต่ตอนนี้เพิ่นปลูกต้นยูคาจ้า แล้วกะมีต้นลำฮ้างขึ้นเต็มไปเบิดเลย ต้องมุดเข้าไปท่อนั้นจ้า มุดไปแล้วกะหาทางออกกะบ่ได้ เกือบใจขาด

เอาล่ะจ้า เริ่มเลย เห็ดดอกแรกที่พ้อจ้า กรี๊ดดด

มาเด้อจ้าไปเก็บเห็ดละโงก

และกะดอกที่สอง เทียบกับมือขามป้อมจ้า เห็นเห็ดแล้วกะกรี๊ดดๆๆ อยู่ในป่าหั่นล่ะจ้า สะออนคัก ดนๆ พ้อเห็ดเทื่อ ก๊าก แต่ว่าบรรยากาศบ่อยากบอกเลยจ้า เอ้าคักจ้า

มาเด้อจ้าไปเก็บเห็ดละโงก

กรี๊ดไป ถ่ายรูปไป พร้อมกับเสียงป้อย (ด่า จ่ม ด้วยความห่วงใย) จากอาวเขยกับอาเป็นระยะ ว่าคาตะถ่ายรูปอยู่หั่น บ่ทันกินดอก จักหน่อยคะเจ้ากะมายาดพะนะ

มาเด้อจ้าไปเก็บเห็ดละโงก

หลังจากนั้นกะเริ่มชุลมุนจ้า หยุดถ่ายรูปไว้ซ่ำนี้สาก่อน น้องชายตามมาสมทบ พร้อมกับไทบ้านอีกขบวนหนึ่งแตกแซวๆ มา น้องชายกะฮ้ายอีกว่าคาตะถ่ายรูปอยู่หั่น คะเจ้ามาแล้วฟ้าวแหน่เป็นหยัง ก๊าก

**บักขามป้อม** · 12-09-2009, 11:38

อันนี้ขามป้อมหม่นออกมาจากป่าเห็ดได้แล้วจ้า เริ่มมาสำรวจผลงานตะของถ่าน้องชายอยู่ข้างนอก ออกมาได้กะไคแหน่จ้า ฮ้อนเกือบใจขาดเอาโลด ข้างหลังที่เห็นหั่นคือป่าเห็ดที่ขามป้อมหม่นเข้าไปก่อนหน้านั้นจ้า

กะต่าขามป้อมจ้า และกะข้างล่างเป็นของน้องชาย

ย่างออกมาหม่องรถจอด ป้าด มากันหลายคักเนาะหมู่เจ้ากะหยอนเสียงแตกซ่วดๆ อยู่วางกล้องคุบเห็ดเกือบบ่ทัน ก๊าก

มาฮอดแล้วกะมาจัดการล้างขี้ดินออก ตั้งหม้อต้มน้ำฮ้อนลวกออกก่อนแกงจ้า อันนี้เฒ่าแม่บอกมาว่า มันจั่งบ่ขิวหลายจ้า เห็ดละโงกมันสิมีกลิ่นแหน่จักหน่อย ต้องลวกออกจั่งค่อยแกงแซบจ้า แกงกะบ่ได้ใส่หยังหลายจ้าย้านมันขิว ใส่แต่ยอดผักติ้วกับผักอีตู่จ้า

มาเด้อจ้ากินข้าวกับแกงเห็ดละโงกนำกันจ้า มีตำเมี่ยงข่าใส่มดแดง กินกับยอดบักมี้นำจ้าแก้วินแดด ฮิ้ววว อาหารการกินชนบทๆ เนาะ ก๊าก

**Shadow007** · 12-09-2009, 11:51

โอ๊วววววว ขามป้อมเพื่อน
เป็นตาไปเก็บนำแท่ะ เอาแกงเฮ็ดมาอ้างกันแท้น้อ บาดนี่ คนแฮ่งกะลังหิวๆๆๆยุ
มื้อหลังอย่าเอามาฝากแต่รูปแม่ะ เจิดถ้วยแกงเห็ดมานำเด้อ
สิถ่ารับ บ่เอาหุดังรับคือจานยำเอื้อยหน่อยดอก ก๊ากกกกกกกกก

**pcalibration** · 12-09-2009, 11:53

เห็ดละโงกขาวแกงใส่ยอดผักติ้วเป็นตาแซบคั๊กเนาะ

**cute** · 12-09-2009, 12:04

เห้ดแล้วน้ำลายไหล..อยากินหลาย..คงแซบอีหลีเน๊าะ

Noo noiy · 12-09-2009, 15:16

โอ้ยๆๆๆ หน่ายคนเด้ มาเฮ็ดให้ คึดฮอดบ้านแท้น้อ ของมักเด้ แกงเห็ดนะเสี่ยวเอ้ย พาไปเก็บนำแน่เด้อ ยามไปยามแม่ใหย่สี 555555555 เด๋วมื้อหลังเอาบักพริกแม่ใหย่สอน มาให้ใส่แกงเห็ดเด้อ ก๊ากกกกกกกกก แล่นนำ นิ่ม กะบ่ทันเว่ย ชวด ฉะลู ขาน เถาะ เลย นิ่มยกหม้อแกงแล่นหนีจากละ 5555555555

**ขอบฟ้า** · 12-09-2009, 15:23

ป้าดดดดดดดดด เห็ดขึ้นหลายเนาะจ้า..เป็นตาไปหาเก็บยุจ้า..คือสิม่วนดีเนาะจ้า ไปกันหล๊าย หลาย คน...แกงแล้วกะขอชิมนำจักคำ
แนเด้อจ้า..เป็นตาแช่บบหลายจ้า :l-