ตำเมี่ยงบักขามน้อยกับหมากต่ำยาน
เมือบ้านไปดำนามาคับ ดำนาหล่าๆดอก เบิ่งซงคือสิแล้งเป็นตาได้กินบ่บุข้าวกะดาย ถ้าฝนบ่ถิ่มช่วงคือสิได้เกี่ยวอยู่ดอก เว้าเรื่องเมี่ยงต่อเนาะ ดำนาขึ้นมาเมื่อยๆ อี่แม่เลากะหาหมากต่ำยานกับหมากขามน้อยมาไว้แล้ว ผมกะมีหน้าที่ถ่ายรูป มีนางแบบน้อยเป็นผู้ตำ วิธีการกะบ่ยากคับ ตำพริกตามต้องการเผ็ดหน่อยเผ็ดหลาย ซอยหัวขิงไคลงไปจักสองสามหัว แล้วกะตำพอแหลกจักหน่อย หักหมากขามน้อยลงไปตามต้องการสิตำหน่อยตำหลาย พอหมากขามแหลกแล้วกะปรุงรสเลย ใส่ต่อนปลาร้าลงไปหลายต่อนเติบ ผงชูรส ถ้าต้องการรสเค็มอีกกะใส่น้ำปลาจักหน่อยกะได้ ถืกใจแล้วกะตักใส่ถ้วย เอาหมากต่ำยานมากินกับได้เลยคับ
ลงมือตำๆๆๆๆแล้วกะตำ พร้อมทั้งปรุงรส ทั้งน้ำปลา ผงชูรส ปลาร้า อี่แม่กำลังลงมือจกปลาร้าใส่ครก อิอิ เถียงนากะน้อยๆหนึ่งดอกคับ บ่ได้จัดอี่หยัง ฮกหลาย จั่งซี้หละไปนากะดายเนาะ บ่สะดวกคืออยู่บ้านดอกอี่หยังกะดาย
เรียบร้อยแล้วคับ หน้าตาเป็นแบบนี้หละ
ลักษณะหมากต่ำยานคับ หน่วยเป็นแบบนี้หละ ต้นมันเป็นเครือคือเครือส้มลมนี้หละ ขึ้นอยู่นำโพน หรือว่านำโคก เครือมันสิพันนำต้นโกน้อย ต้นแก้งไปจั่งซั้นหละ บ่ได้ถ่ายรูปเครือมันมาพร้อม รสชาดหน่วยมันกะสิฝาด บ่เคยเห็นเพิ่นเฮ็ดกินแนวอื่นจักเทื่อนอกจากกินเมี่ยง กินคำใหญ่หลายมันกะสิคาคอ คือว่ามันสิแค้นหั่นหนาคับ แต่ว่าแซบอี่หลีคับ พิมพ์ไปนำน้ำลายไหลไปนำเด้เดียวเนี้ย อิอิ
พร้อมแล้วคับผม หมากต่ำยานสิกัดแล้วกะคุ้ยกินเลยกะได้คับถ้าเป็นหน่วยอ่อน แต่ว่าถ้าเป็นหน่วยแก่ต้องใซ้มีดตัดเอา เพราะว่ามันหยาบ เอาไส้ในมันออกนำมันจั่งบ่ฝาดหลาย ลงมือได้เลยคร้าบบบบ
กล้องบ่ดีคือเพิ่น ไปโฟกัสแต่ถ้วย ล้างมือแล้วหละคับ เด็กน้อยบ่กินนำดอก
พุ้นหละเด็กน้อยพากันไปกินข้าวเหมิดแล้ว เล่นหลายเลยหิวข้าวว่าซั้น ไข่อ่องหล่องกะยังว่า เล่นหลายแล้วฮ้อนสั่นแหล่ว แก้เสื้อใส่เลย
อ้างข้อความนี้
Bookmarks