..ห้องสมุดหนอนแก้ว ณ ชายแดน..

[เขมราฐ]

อีกหนึ่งกิจกรรมค่ะพี่น้อง ที่น้อง

เขมราฐเชิญพี่น้องบ้านมหามาร่วมเฮ็ดสิ่งดี ๆ ให้สังคมนำกัน กับการหยิบยื่นโอกาส

ให้กับเด็กน้อยตามแนวตะเข็บชายแดน โดยการร่วมสร้างศูนย์การเรียนรู้เสริม

พัฒนาการให้เด็กน้อย ความเป็นมาของโครงการนี้มาจากความบังเอิญล้วน ๆ ค่ะ คือ

ยามว่างเว้นจากการเฮ็ดไฮ่ใส่นาแล้ว น้องเขมราฐกะนอนเว็นอยู่บ้านซื่อ ๆ ค่ะ แล้วมี

เด็กน้อย แถวละแวกบ้านมาเล่นนำพอดีมีหนังสือนิทานอยู่ 2-3 เล่มเลยชวนเพิ่นมาหัด

อ่านนำกัน แล้วเด็กน้อยกะมักค่ะ ชวนกันมาหลายขึ้น ด้วยความที่อยู่บ้านบ่มีเด็ก

น้อย เฒ่าแม่เลยบ่คุ้นกับการมีเด็กน้อยมาเล่นอยู่เฮือน เพิ่นล่ะว่า “มึงกะพาเขาไปอยู่

หม่องมันบ่มีคนเป็นหยัง” น้องเขมฯกะเลยหัวใสเกิดไอเดียเฮ็ดห้องสมุดขึ้นค่ะ พอคิดได้

แล้วความคิดมันกะบ่หยุดแค่ห้องสมุด อยากให้หม่องนี้เป็นศูนย์รวมเด็กน้อย อยากให้มี

ทั้งหนังสือนิทาน ของเล่นเสริมพัฒนาการ มุมศิลปะ และอื่น ๆ

แล้วเห็นว่า ศาลากลางบ้าน เหมาะที่สุดเพราะว่ามีบริเวณกว้างขวาง มีห้องสำหรับเก็บ

หนังสือ ปล่อยไว้กะฮกเฮื้อ บ่ค่อยได้ใช้ประโยชน์ แต่ต้องปรับปรุงก่อนนิดหนึ่งกะคือ

จะใช้ได้แล้วค่ะ





สภาพศาลากลางบ้านที่บ่ทันได้ปรับปรุงค่ะ งานนี้เด็ก ๆ ห่าวหลายค่ะ

พี่หลินพาเฮ็ดหยังร่วมไปนำทุกเทื่อชื่นใจแฮงค่ะกับความกระตือรือร้นของเพิ่น







น้องเขมฯเลยปรึกษาหารือกับพ่อผู้ใหญ่ พ่อผู้ช่อย

แล้วกะคณะกรรมการหมู่บ้าน ม.12

เพิ่นกะเลยบอกว่าให้นัดประชาคมชาวบ้านว่าเพิ่นเห็นดีเห็นงามนำบ่

แล้วกะยินยอมบ่ถ้าจะใช้ศาลากลางบ้านหม่องนี้เป็นห้องสมุด

ปรากฏว่าใทบ้านเพิ่นเห็นดีนำทุกคน เพื่อลูกหลานของเพิ่น แล้วกเพิ่นกะนัดแนะกันว่า

จะซ่อยกันปรับปรุงมื่อได๋ กะได้ขอสรุปว่าเป็นวันอาทิตย์ที่ 8 มาซ่อยกันปรับปรุงซ่อม

แซมซ่อยกัน พ่อผู้ใหญ่กะประกาศหมากอะโหล..ป่าวประกาศให้เพิ่นมาลงแรงซ่อยกัน



พอเพิ่นนัดแนะกันแล้วฝ่ายแม่ครัวกะนัดแนะเรื่องอาหารการกินพร้อมเลยค่ะ เฒ่าแม่รับหน้าที่แม่ครัวใหญ่เองเลยค่ะ :l-

น้องเขมฯชื่นใจกับความพร้อมเพรียงเฮียงหน้าของใทบ้าน

**เดี๋่ยวมาต่ออีกค่ะ...

ค่ะ

[เต็มใจให้เธอ]

เข้ามาสนับสนุนแนวคิดนี้ครับน้องเขมฯ
อ้ายเต็มฯจำได้ว่า ได้เป็นธุระให้ ผจก.ไปรอบหนึ่งแล้วครับ
คงจะมีรอบสองตามมาแท้ๆละครับ ซั่นดอกว๊า...

[เขมราฐ]

ก่อนที่น้องเขมฯ จะลงมือเฮ็ด

โครงการนี้น้องเขมฯ กะเว้าให้เอื้อยอ้ายบ้านมหาบางคนเพิ่นได้รับทราบเพิ่นกะร่วมด้วย

ช่วยกันมาค่ะ แรกเริ่มน้องเขมฯ ตั้งใจไว้ว่าจะบ่รับเป็นปัจจัย ขอรับเป็นสิ่งของแทน

ค่ะ แต่มีเอื้อยทางญี่ปุ่นว่า สิให้เอื้อยส่งของขึ้นเครื่องบินไปให้ได้จั่งได๋

เพิ่นเลยซ่อยเป็นปัจจัยมาจำนวนหนึ่ง เลยได้เป็นค่ากับข้าว ค่าน้ำ มื่อเฮ็ดเวียกซ่อย

กัน แล้วเอื้อย PJ ขามป้อม ให้หนังสือนิทานอีสปมา 2 เล่ม และมีเอื้อย อ้ายอีก

หลายท่านเพิ่นแจ้งความประสงค์สนับสนุนหนังสือทางหลังไมด์กับน้องเขมฯ นำค่ะ

แล้วมื่อลงเฮ็ดเวียกอีหลีกะมีผู้ใหญ่ใจดีเพิ่นอนุเคราะห์สี และค่าอาหารเพิ่มมาอีกจำนวน

หนึ่ง ในนามหัวหน้าเด็กน้อยขอบคุณหลาย ๆ ค่ะ



เช้าวันอาทิตย์ที่ 8 เวลานัดหมาย พ่อผู้ใหญ่ ผู้ซ่อย สารวัตรกำนัน

ลูกบ้าน กะถือมีพร้า หมากจก หมากเสียมมาซ่อยกัน





น้องตาล กับน้องน๊อต กะมาซ่อยแต่เช้าคือกันค่ะ

พากันขัดถู ล้างออกให้เบิด พากันเขียนจิตรกรรมฝาผนังหยังไว้ จัดการให้เรียบร้อย




ผู้ซ่อยบุญ กำลังเตรียมผสมสีที่ผู้ใหญ่ใจดีเพิ่นอนุเคราะห์มาค่ะ



แม่น้องน๊อต น้าน้อยกะมาซ่อยปัดกวาดนำค่ะ



จัดการใส่เสื้อผ้าใหม่ให้ห้องสมุดของเฮา.. ได้สีชมพูอ่องต่อง เป็นตาแซ่บขนาดค่ะ

[nuzing]

ยายดีใจด้วยกับดินแดนแนวตะเข็บชายแดนที่ยังมีคนดีมีฝีมือ"หัวหลิน"นักพัฒนาชุมชนดีเด่นที่กล้าคิดกล้าทำสิ่งดีๆ ยายยินดีและเต็มใจร่วมด้วยช่วยกันเพื่ออนาคตของบุตรหลานที่จะได้ใช้เวลาว่างให้เกิดประโยชน์ ส่งเสริมให้เด็กรักการอ่าน(แทนที่มันสิไปเล่นบักลี่ +ติดเกม)ขอให้ประสบความสำเร็จในเร็ววันนะคะ หัวหลิน นักพํฒนาตัวน้อยของยาย หลินสู้ๆฝากบอกพี่น้องบ้านมหาที่มีหนังสือดีๆบ่ต้องเอาไปสั่งกิโลขายเด้อขอไปให้เด็กบ้านนอกตาดำๆได้อ่านเพื่อเป็นอาหารสมองแหน่เด้อจ้า ธุจ้า
ปล.ยายเตรียมหนังสือไว้แล้ววันที่ 14 จะเอาไปให้จ้า

[ผู้ก่อการรัก]

วันที่ 14 จะฝากหนังสือไปบางส่วนเด้อจ้า น้องหลิน รวบรวมไว้เรียบร้อยแล้ว จากที่คุยวันนั้นค่ะ

หนังสือการ์ตูน พอดีขนไปบริจาคบ่อยๆ ก็เลยเหลือน้อยแล้วค่ะ แต่มีหนังสือที่เป็นสื่อการสอนที่เป็นประโยชน์สำหรับเด็กอยู่จำนวนหนึ่งค่ะ สนับสนุนค่ะโครงการดีๆ แบบนี้ ถ้ามีโอกาสจะไปเยี่ยมเยียนอีกแน่นอนค่ะ

[บักขามป้อม]

เห็นผู้ปกครอง พ่อแม่พี่น้องเพิ่นมากันซ่อยกันคนละไม้ละมือแล้วกะดีใจนำจ้าน้องหล่า
เด็กน้อยกะซงมีความสุขหลาย พากันห่าวคัก ตอนนี้เอื้อยกะบ่ได้นิ่งนอนใจเด้อจ้า บอกหมู่พวกไปแหน่แล้วล่ะเกี่ยวกับหนังสือ
ถ้ามีอีกกะสิส่งไปอีกเรื่อยๆจ้าน้องหล่า คึดพ้อตอนเจ้าของเป็นเด็กน้อย
มักอ่านหนังสือ แต่กะบ่มีอ่าน ไปหาอ่านนำถุงกล้วยทอด กระดาษหนังสือพิมพ์ที่คะเจ้าห่อของ อิอิ

เป็นกำลังใจให้สาวภูธรแนวตะเข็บชายแดนคนเก่งแล้วกะสนับสนุนโครงการดีๆ แบบนี้เต็มที่เด้อจ้าน้องหล่า:l-

[เขมราฐ]

ผู้ใหญ่เพิ่นลงความเห็นว่าจะทาสี

ใหม่ ซ่อมประตูห้องน้ำ แล้วกะเฮ็ดฮั้วให้เป็นสัดส่วนค่ะ พ่อผู้ใหญ่บ้านอนุเคราะห์ไม้

ไผ่บ้านเฮ็ดฮั้ว หลักลูกตั้งพร้อมด้วยรถยนต์ขนไม้นำค่ะ ส่วนแรงงาน ใทบ้านแม่ป้า

พ่อลุงกะมาซ่อยกันด้วยความเต็มใจค่ะมาเบิ่งการเฮ็ดงานซ่อยกันของใทบ้าน ม. 8 ของ

น้องเขมฯค่ะ



ช่างสีจำเป็น ฝีมือพอใช้ได้ค่ะ



ฝ่ายผู้ใหญ่ กำลังเตรียมโตไปตัดไม้ไผ่อยู่นาพ่อผู้ใหญ่ค่ะ



พ่อสารวัตรกำนัน ขึ้นกอไม้ไผ่เองเลยค่ะ เยี่ยมจริง ๆ





พ่อน้องแฮม พ่อน้องน๊อต กะมาซ่อยด้วยความเต็มใจค่ะ



ตัดไม้มากะขนลงซ่อยกันคนละไม้ละมือ ตอนนี้ฝ่ายทาสีกะทางเกือบแล้วล่ะค่ะ

เฒ่าพ่อน้องเขมฯ สีข้าวแล้วกะลงมาซ่อยอีกแรงค่ะ

บ้านน้องแฮม มาซ่อยเทิง พ่อ เทิงแม่ เทิงยาย ค่ะ

***ด้วยความเคารพค่ะคุณยาย หลินขอแก้ข่าวแหน่ค่ะ หลินบ่ได้เป็นนักพัฒนาชุมชนดอกค่ะ
หลินเป็นคนเฮ็ดรายรับรายจ่ายให้เพิ่นซื่อ ๆ ค่ะ บ่ได้เป็นนักพัฒนาชุมชนดอกค่ะ :l-

[ฮักณ.ทุ่งใหญ่]

ซวดๆให่กิจกรรมดีๆจังซี่ครับ เป็นกิจกรรมที่ดีเห็นแล้วชื่นใจนำครับ ถ้ามีโอกาสสิช่วยเรื่องหนังสือดอกเด้อครับน้องหลิน

[เขมราฐ]

เบิ่งการเฮ็ดงานอยู่หน้างานแล้วมาเบิ่งการทำงานของฝ่ายเสบียงนำค่ะ



เฒ่าแม่ กับน้าเต้ากำลังเตรียมกับข้าวอย่างขมักเขม่น ครัว



ป้าลา อ.หวิน และเฒ่าแม่ อนุเคราะห์หน่อไม้มาคนละเล็กละน้อย
จนได้หน่อไม้หม้อนี่ค่ะ



เบิ่งปาเกียวชกแล้ว พักกินข้าวเที่ยงกันก่อนเด้อค่ะ จั่งมาต่ออีกรอบบ่าย

อาหารการกิน มีแกงหน่อไม้ ต้มไก่ ข้าวปุ้น แล้วที่ขาดบ่ได้คือตำหมากหุ่งค่ะ



เด็กน้อยบ้านนอก ผู้ใหญ่กินหยังได้ เด็กน้อยกะต้องกินได้นำค่ะ

แกงหน่อไม้ ตำหมากหุ่ง บ่มีคำว่าเผ็ดให้ได้ยินเลยค่ะ







แต่สำหรับสองคนนี้ กินหยังนำหมู่บ่ทันได้กินข้าวปุ้นเปล่าไปก่อน

การแบ่งปัน ความเอื้อเฟื้อ เป็นสิ่งที่ปลูกฝังให้เด็กน้อยได้แต่ยังน้อย ๆ ค่ะ

[เชษ แฟมมิลี่แมน]

จั่งซี่แหน่แหม๋ ขอปรบมือให้ ครับ น้องหลิน เยี่ยมจริงๆ เด่วสิพาจุ้มสวนอ้อย ไปสมทบทีหลังเด้อ น้องหลิน