ชมรมคนฮักหมอลำ ขอฮ่วมแสดงความยินดีในโอกาสขึ้นปีที่ 5
ครูบาอาจารย์เพิ่นแต่งกลอนลำล่องให้ ....พิเศษ...สำหรับเวปไซด์บ้านมหา
ท่อนั้นเด้อ....ครับ

ตัวอย่าง.....ลำล่องบ้านมหา
หละเว็ปเอ้ย...เว็ปข้าวเหนียวปั้น บ้านมหาเฮือนหลังใหญ่ ต้อนฮับจิตผูกมิตรใจ สายสัมพันธ์ฟั่นแอ่วอ้อน ออนไลน์พ้อม่วนใส่กัน ส่วนสำราญ...
หละเว็บไซต์เปรียบดั่งบ้าน ชานใหญ่หลายห้องหับ มีแขกไปไทยฮับ ประทับใจเอิ้นขึ้นบ้าน มาเฮือนชานแล้วมีน้ำ เจ้ามายามข้อยปูเสื่อ อย่าฟ้าวด่วนกลับเมือ เหลือแต่แนวมอบให้ หลายล้นต้อนผู้มา อยู่เมืองได๋ในโลกหล้า บ่ต้องว่าแต่เมืองกรุง หลังคามุงบ้านมหา ยังว่าคอยให้เงาซ้น ถือเป็นคนอีสานบ้าน สร้างเฮือนชานไว้ถ้านั่ง พี่น้องเปรียบปลาห่างวัง อยู่คนทางห่างเค้า เอิ้นกินข้าวฮ่วมภาชน์ ออนไลน์ได้พ้อหน้า แม่นเห็นท่าเพียงเงาฉาย แสงรูปกายส่งมา กะว่าดีผู้มาเยี่ยม ข้อมูลเตรียมถ้าต้อน ป้อนเข้ามาซ่อยกันใส่ ปานอยู่บ้านแม่นอยู่ไกล ได้เห็นนั้นเบิ่งอันนี้ กะดีล้วนส่วนใจ
อันหนึ่งเปรียบลำไม้ หลายท่อนมาฮวมจัด เป็นมัดเกลียวเหนียวชาน คือสืบสานฮีตคองไว้ บ่มีไผสิมาป้ำ บ่แม่นลำเดียวโดดเดี่ยว บ้านมหาครัวเฮือนเดียว เกี่ยวสมัครฮักหมั่น หนึ่งหลังบ้านห้องส่วนหลาย พี่น้องเฮาเอื้อยอ้าย ตระกูลใหญ่ใจอีสาน มาเฮ็ดงานอยู่คนมุม หมั่นประชุมสุวันมื้อ ถือเครื่องคอมพ์อยู่คนบ้าน พิมพ์หากันแต่แนวค่อง ป่อนข้อมูลผู้ละห้อง มากองไว้ใส่หลัง บ่ได้วานบ่ได้จ้าง น้ำใจหลั่งรินไหล คือนิสัยอารีย์....อารีย์ นี้แม่นเฮาอีสานแท้...(บ่ทันจบ)

ผู้ได๋อยากอ่านอีก/ อยากลำอีก กะลองว่ามาเบิ่งแหน่ครับ เป็นจั่งได๋ คือบ่น้อ....