ทาร์ตแอปเปิ้ลกับลูกพรุน

[ติ๋ม เปอร์โย]

เมนูนี่เป็นเมนูกำจัดของเหลือจากคริสต์มาสกับปีใหม่จ้า...
ลูกพรุน+แอปเปิ้ลเหลือจากซื้อมายัดท้องเป็ดอบมื้อคริสต์มาส
แป้งครัวซอง+วิปปิ้งครีม+เหล้ารัมเหลือจากเฮ็ดอาหารมื้อปีใหม่ มาเบิ่งสูตรเลยจ้า
ทาร์ตแอ๊บเปิ้ลกับลูกพรุน
ลูกพรุนแห้ง300กรัม เทใส่ถ้วยหมักกับเหล้ารัม1ถ้วยกาแฟไว้1คืน
แป้งที่เฮ็ดทาร์ต
แป้งเอนกประสงค์ 200กรัม
เนยสด 100กรัม
น้ำตาลทราย 60กรัม
น้ำเย็นจัด
แอปเปิ้ล 4ลูกไว้เฮ็ดไส้ขนม
ผงวนิลา 2ช้อนชา
แป้งครัวซองไว้แต่งหน้าขนม นิดหน่อย เพราะใช้ของเหลือ เดี๋ยวบอกสูตรที่บอร์ดอาหารคาวจ้า
ถั่วอันมอลด์หั่น ตามชอบ
น้ำตาลทรายเม็ดใหญ่ ไว้โรยหน้าขนม
ไข่ไก่1 ฟอง ไว้ทาหน้าขนม(เบิดแล้วยังน้อ อิอิอิ แบบนี่หละสูตรมั่วๆ)


ตัดใส่จานโรยน้ำตาลไอซิ่งเสริ์ฟกับวิบปิ้งครีม แล้วกะกาแฟดำๆ1ถ้วยจ้า
มาอ้วนซ่อยกันเด้อ สิถิ่มกะเสียดายของแหม๋...


อันนี่แป้งส่วนผสมจ้า ตวงไว้เลย



เนยหั่นเป็นชิ้นเล็กๆขยำใส่กันกับแป้ง+น้ำตาล ลักษณะสิเป็นผงๆเลยหละ ทีนี่สำคัญมาก
ค่อยๆใส่น้ำเย็นลงไปในแป้ง ใส่ทีละ2ช้อนโต๊ะ ห้ามมือหนัก นวดไปเรื่อยๆเติมน้ำไปเรื่อยๆ
ใจเย็นๆ นวดจนแป้งจับกันเป็นก้อน เนียนและนุ่ม แบบนี่หละจ้า(ในภาพ)
เอากระดาษไขมาห่อแป้ง ใส่ตู้เย็นไว้45นาที



เปิดเตาอบไฟ200องศาC ไว้เลยจ้า
45นาทีผ่านไป กะเอาแป้งออกมารีดเป็นแผ่นกลมๆ บ่ต้องหนามากและกะบ่บางจนเกินไป
นำไปกดลงใส่พิมพ์ขนมกดให้แน่นๆเลยจ้า แล้วเอามีดปาดขอบถิ่มไป ฝรั่งเพิ่นถิ่มอิหลี
แต่ติ๋มมาเสียดายแท้ หาพิมพ์น้อยๆมา2พิมพ์ รีดแป้งกดใส่ได้2พิมพ์น้อยๆพอดีจ้า
เห็นบ่ถิ่มเฮ็ดหยัง อิอิอิ ใช้ส้อมสักๆนำก้นพิมพ์ให้เป็นรู ไล่อากาศยามอบ



ก่อนเข้าอบกะเอากระดาษฟอยด์มาห่อขอบขนมไว้จ้า บ่อยากให้ขอบไหม้ก่อนสุกเนาะ
นำเข้าอบ15นาที ระหว่างถ่าขนม กะเริ่มปอกเปลือกแอปเปิ้ลหั่นเป็นชิ้นบางๆใส่ถ้วย
บีบน้ำหมากนาวลงใส่เคิ่งลูกโลด กันแอปเปิ้ลเปลี่ยนสี แล้วใส่ผงวนิลา คนๆให้เข้ากัน
เอาแป้งครัวซองมารีดให้แบนๆหั่นเป็นเส้นไว้แต่งหน้า


อบแป้ง15นาทีผ่านไป เอากระดาษฟอยด์ออก แล้วใส่แอปเปิ้ลจนหมด ตามด้วยลูกพรุน



เอาแป้งครัวซองมาแต่งหน้าขนม โดยการสาน ทาด้วยไข่ โรยน้ำตาลเม็ดใหญ่นิดหน่อย
แล้วหน้าด้วยถั่วอันมอลด์



นำเข้าเตาอบอีก ลดไฟเหลือ180องศาC ใช้เวลา45นาที หรือเบิ่งสีเอากะได้จ้า คั่นเหลืองงามกะใช้ได้แล้ว
เสริ์ฟกับวิบปิ้งครีม,ไอติมต่างๆตามชอบเลยจ้า