ดอกก่ะยอมหอมยามแล้ง ดอกสะแบงหมุนบักปิ่น ใจถวิลยังบ่แล้ว เสียงแซวแซวแว่วเดือนสี่
ฟังมัทรีเทศน์มะราช มหาชาติบุญคุ้ม พากันหุ่มแห่กัณฑ์หลอน แสนออนซอนแต่คราวกี้ ประเพณีฮีตเก่า
อี่สานเฮาพี่น้อง ฟังเสียงฆ้องหมุ่งไกล ชาวบ้านเหนือบ้านใต้ พากันใฝ่ในธรรม ส่อยกันทำควมดี
ต่อมุนีองศ์เค้า ซุมหมู่ชนคนเฒ่า เฝ่าฟังธรรมล่ำแกน มาลัยหมื่นมาลัยแสนแต่ข่อน ทศพรตั้งแต่บั้น
หิมพานต์เข้ามาจ่อ ทานะขันฑ์หนั่งจ้อก้อ วันนะปะเวศน์ต่อยาวไกล ซูซะกะมาไวไว หย่างไกลยาวเยิ่น
ฟังเพลินเพลินเดินดงด้น จุลพลพวมสิอ่วย สวยพอเพลจวนสิค้อย ทางจั่วน้อยจั่งสิลง สมประสงค์เข้ามาใกล้
ป่าใหญ่มหาพนต์ แสนหลูโตนกุมมาร สองเขือหลานหน่อไท้ มัทรีนางฮ่ำไห้ อาลัยอ่อนวอนหา
สองขวัญตาคำแพง เหมิดแฮงสลบล้ม องศ์ก่ะโจมเอาเจ้า ใส่เพลาเว้าโอนอ่อน เวสสันดรผู่เค้า แสนสิเศร่าอั่งมะโน
ทางพุทโธอยู่ภายหน่า เจตนาบ่มีหย่อน ตัดอาวรณ์ถอนให่สิ้น อัมรินทร์อินทร์ไหวหวั่น สักกะบันแหม่นบ่อนบั้น
สวรรค์คอนฟ้าฮ้อนฮ่น มหาราชจั่งเริ่มต้น คนก่ะหลั่งมาโฮม เทิงคุณโยมครูบา ต่างก่ะมาเตรียมพร้อม
ฉะกษัตราจั่งมาต้อม สาธุกันบั้นบ่อน กัณฑ์นครบาดหล่า ยามฟ้ามืดค่ำลง สุดทางสงฆ์ปงทางบ้าน
สาธุการพร้อมผ่ำ สาระธรรมส่ำนี่ ดีฮ้ายให่หิ่นตรอง... พี่น้องเอ้ย
อ้างข้อความนี้
Bookmarks