คึดฮอดห้อง มหาแห่งเฮือนหอ
เป็นใดนอ อยู่สบายดีบ้าง
ศรีหากจำไกลข่าง เทียวทางหลายฮ่อม
การบ่ฮอม เวียกหยุ่ง พันเกี้ยวเกี่ยวกาย
บ่ได้หายหนีหน่า อำลาป๋าปล่อย
ยังคึดนำคล้อยคล้อย ใจห่อยห่วงคะนิง
งานมหามิตติ้ง บ่อาจฮ่วมไปเห็น
ย้อนจำเป็นกะทันหัน หม่อวันบัดงานเค้า
สุดเสียดายกะเทิงเศร่า เหงาในปานไก่พาก
เหมิดความปาก อั่นสิเว้านอเจ้าท่านทุกคน
อีกบ่ดนนอปีหน่า จั่งมาหาพ้อกันใหม่
พ่อใหญ่ศรีบ่ไปไส ยังอยู่นำพี่น้อง ถะผองเท่าขาดใจ
เป็นสันใด๋ นองานเลี้ยง พาแลงคือสิม่วน
มีผู้ใดแหน่หละม้วน นอนกลิ้งบ่ซ่วงเมา
เป็นจั่งใดแหน่หละเจ้า อ้ายบ่าวคนเดิม
เก้าอี้เสริมหลายบ่นอ หรือส่ำพอกับปีแล้ว
เว้าพื้นแอวเจ้าเซาซ้ง หรือเป็นซงกว่าปีก่อน
หรือแม่นฮ่อนซอดแจ้ง จนกาฮ้องไก่ขัน
ถามไถ่กันพอฮู้ หอมหูสมควรปาก ก่อนหนอ
ยามเซายากเวียกหน่อย สิมาต้อยต่อเติม
ขอกะเสิมสำราญซ้วน มหามวลน้องพี่
ขอความสุขสวัสดี จงเกิดมีแก่ท่าน ทั้งหลายล้วนทุกประการ
...จำเป็นหลายพี่น้อง ช่วงงานพาแลงผู้ข้ามีภารกิจด่วน ออกฝึกนอกที่ตั้ง ๕ มื้อกลับมากะไปบ่ทันงาน เสียดายยังว่า กราบอภัยที่ได้ตกปากรับคำกับสมาชิก พี่น้องหลายๆท่าน...
Bookmarks