มาส่งกำลังใจ..ไปหลังฮ้าน

[พลายแก้ว]

พี่น้องเอย....
บาดนี้ขอกล่าวต้าน แถลงการณ์จักกะหน่อย
เชิญมวลมิตรใหญ่น้อย ซ่อยแซ่ซร้องสาธุนำ
"กำลังใจ"คำๆนี้ มีบ่หลายพยางค์ซ้ำ เป็นคำแนบแจบดวงจิต
ส่งให้มวลผองมิตร สถิตย์เนาว์มหาบ้าน
ผู้ทำงานจนเมื่อยล้า เพื่อให้เวปบ้านมหานี้คงอยู่
ผู้ที่ค่อยค้ำซู กะเทิงยู้อยู่หลังฮ้าน มหาบ้านให้อยู่คง
บางเทื่อเหงื่อเม็ดโป้งๆ ไหลลงฮาดหน้าผาก
ทนลำบากมากล้วน เทิ่งหนามข่วนกะพ่องกัน
ศูนย์ความรู้ทุกด้าน ข่าวสารวรรณศิลป์
ศิลปินถิ่นสยาม วัฒนธรรมตามไปค้น
มหาชนได้เฮียนฮู้ เป็นหมวดหมู่แหล่งศึกษา
จักได้มาตะทางได๋ ให้ว่าหลายแนวคิดพ้อ..
สมควรบ่..บ่ฮู้แหล่ว แนวว่าเป็นเพียงความคิด
เชิญหมู่มิตรที่อ่านพ้อ ถามข่าวข้อต่อกระบวน..เบิ่งดู้..ขอรับ

จากหัวใจ ด้วยความเคารพครับ กระผม

[พลายแก้ว]

ส่งกำลังใจไปหลังฮ้าน ห้องแห่งเฮือนมหา
อยากบอกว่าขอบคุณ พร้อมกับหนุนส่งยู้ ซ่อยซูค้ำด้วยน้ำใจ
ขอให้สุขีหมั่น ผ่านวันที่รันทด
ขอให้หมดเหตุฮ้อน ที่โฮมท้อนอั่งมโน
คนบนโลกานี้ มีมากมายหลายชนิด
ต่างนานาจิตตัง ที่อยู่ยังภายพื้น
บางคนบืนออกข้าง บ่ไปย่างทางเทียว
อย่าห่อเหี่ยวเด้อใจ ให้ยืนยงคงหมั่น
ผ่านคืนวันอันเมื่อยล้า สาเด้อ...ครับน้องพี่
ด้วยหัวใจที่มี ยังฮักพี่และน้อง ผู้เนาว์ห้องแห่งเฮือน...คือเก่า..ขอรับ..

ด้วยเจตนาที่จะให้กำลังใจคนทำงานทุกคน ด้วยสำนึก "ขอบคุณ" จากหัวใจขอรับกระผม

[pcalibration]

c06:
หนึ่งแฮงใจสิไขต้านฝากผ่านควมประสงค์
เจตจำนงคือกันเป็นจั่งฝันเอาไว้
แนวได๋ได๋ก่ะดีล้วนสมควรตามบทบาท
สมใจปารถฯหมู่เจ้าเครือเหง่าแก่นอี่สาน
รวมทีมงานเหลือล้นหลายคนที่มีอยู่
พากันดู๋ก่นไง่รวมไว้แหละส่งเสริม
บ่าวคนเดิมฯคือผู่ต้นคนตำอิฐตำก่อ
วอ.มอ.ตอ.คิดค้นในส่นเหงื่อนงำ
เป็นคนทำการสร่างวางฐานบ้านส่อง
สืบสนองต่อเนื่องเรืองรุ่งได้ฮุ่งมา
วันเวลาผ่านพ้นชุมชนแหน่นอั่ง
รวมพลังพี่น้องในท้องถิ่นไทย
อิสานเหนือใต้ตกไกลตะวันออก
อยู่เมืองนอกอีกล้นได้มาซ่นฮ่มเซา
:1-:1-:1-

[toyota1001]

จากใจดวงน้อยๆ สิคอยส่งคนิงหา ฝากไปถึงครูบา บ้านมหาที่เชายั้ง
ขอให้จิตใจตั้งดำรงมั่นเที่ยง อย่าได้เอียงเอนคล้อย ไปก้ำดอกฝ่ายได๋
ให้สู้ไปบ่มียั้งสร้างผลงานให้เป็นชื่อ ฝากให้คนส่าลือว่าอีสานพี่น้องยังดังก้องทุกสถาน
ฝากทุกขวางเขตบ้าน สถานถิ่นดินอีสาน ช่อยสืบสานประเพณีอันดีงามแต่คราวกี้
ฝากวาทีเอาไว้ สู่อ้อมใจบ่มีเบื่อ ฝากให้ชุมชาวเชื้อพี่น้องบ้านมหา..สาแล้วพี่น้องเอย

[จำปา]

...ขอส่งแฮงซอยญาอ้าย บ่าวพีชายผู้รูปหล่อ
วอ มอ ตอ มหาท่าน ให้สำราญสำเริญม่วน
ที่ได้ชวนมวลพีน้อง มาฮวมห้องแห่งมหา
ฮ่วมเฮฮาภาษาบ้าน อิสานเฮาเว้ากันม่วน
ตามกระบวนอิสานเค้า ได้มาเว้าสู่กันฟัง
...ขอเป็นแฮงมาฮวมสร้าง ขอฮ่วมทางได้เทียมหยาง
จากคนไกลได้ฮวมบ้าง ขอเทียมข่างหยางนำคลอง
ทางหอห้องมหาแห่งเฮือนใหญ่ แม่นอยู่ไกลสุดล้าได้มาพ้อดอกฮวมเฮือน..ท่านเอ้ย


c06:อ้ายพี ข่อยบ่หม่นนำเจ้าเด้อ ข่อยขอฮ่วมชายคาบ้านมหาซือๆ:l-(บ่แม่นกุดจี่ อิอิอิ)

[pcalibration]

บ่หม่นสิให่เฮ็ดจั่งได๋น้อหล่า
หม่นสายไฟมาซุมื้อจั่งสิได้คุยกัน
อยากเห็นหน้าหม่นเข้าบ้านก่ะเห็นแต่ดอกจำปา
โอ๊ยเนาะ(อยากสิทะลุมิติได้เบิ่งเด๊สิไปจาดคนให่เบิ่ง)
c06: