ช่วงนี้มีโอกาส ได้เข้างานกะกลางคืนเบิ่งสภาพการทำงานของทีมงานว่าเป็นแนวได๋ เลยได้กินข้าวเพิ่มอีกคาบคือเที่ยงคืน เลยคิดหาเมนูสิเฮ็ดหยังมากินเที่ยงคืนอีกมื่อน๊อ...
คิดไปคิดมาเลยไปลงที่ต้มพะโล้ บ่ได้กินโดนแล้ว ซื้อเผิ่นกินรสชาดจะออกไปทางหวานมากกว่า เลยอยากเฮ็ดกินรสชาดนัว ๆ แบบที่เจ้าของชอบ ออกงานตีห้า ตรงดิ่งไปตลาดหาวัตถุดิบ ตอนแรกคิดว่าสิเอาขาหมู แต่ว่าบ่มี เลยได้สามชั้นแทน...
ตามมาครับ เซียงเหมี่ยงฯ สิพาเฮ็ดกับข้าว อย่าไปจริงจังกับเซียงเหมี่ยงฯ เรื่องสูตรเด้อ ปรับเอาตามลิ้นเจ้าของมักและกะขึ้นอยู่กับวัตถุดิบที่หาได้ และที่มีในตู้ครับผม...
ได้สามชั้นมาแล้วกะขึ้นเขียงครับ แล้วจัดการให้เป็นชิ้นพอดี ๆ เฮ็ดเทิงต่อนใหญ่ ๆ กินยากครับฮ่า...
ส่วนไข่เซียงเหมี่ยงฯ ใช้ไข่ไก่ พี่น้องจะใช้ไข่เป็ดกะได้ครับ แต่บ่แนะนำไข่นกกระทาเด้อครับ น้อยโพด ไข่ห่าน หรือว่า ไข่นกกระจอกเทศ กะคือสิใหญ่โพดเนาะครับ ฮ่า ๆ ...
เสร็จแล้วกะต้มครับ บ่แนะนำให้ปิ้งครับเพราะว่าใช้เวลานานเกินไป ฮ่า ๆ ต้มไข่ 12 นาที กะสิได้ไข่ที่สุกพอดีครับ มื่อนี่ได้ไข่เปลือกบาง ช่วงที่ขับมอไซค์มาจากตลาดไข่ร้าว กะเลยมีไข่ขาวแพกแลด ออกมานิดหน่อย บ่เป็นหยังครับ บ่เสียหาย...
ทีนี้มาฮอดส่วนผสมที่เป็นเครื่องเทศ บ่แม่นเครื่องถวายกัณฑ์เทศน์ เด้อครับ ฮ่า ๆ ...
อบเชย(เพราะว่าอบบ่ทันสมัย เลยเชย ฮ่า ๆ ) กับ โป๊ยกั๊ก
ผงพาโล โอ๊ย บ่แม่นครับ ผงพะโล้
เครื่องหอมสำหรับผัดหมู ผัดไข่ครับ กระเทียม รากผักชี ต้นมันเอาไว้โรยหน้าครับ ฮ่า ๆ ...
มาเริ่มกันเลยนะครับ โขลก กระเทียม รากผักชี ใส่เกลือนิด ๆ เพื่อให้โขลกแหลกง่ายขึ้นหลังจากนั้นตั้งกระทะ น้ำมันไฟอ่อน ๆ เอาลงผัดกับผงพะโล้ ให้หอมครับ
หลังจากนั้นเอาหมูที่หั่นไว้ลงไปผัด แต่งสีสันด้วยซีอิ้วดำเพื่อความเข้มขลังแห่งสีสันพะโล้เนาะครับ เซียงเหมี่ยงฯ บ่เคยเห็นพะโล้น้ำใสเถื่อ...
ไข่กะปอกเปลือกเอาลงผัดคือกันครับ อย่าผัดเทิงเปลือกเด้อครับ เพราะว่าเครื่องมันจะบ่เข้าเนื้อไข่ ฮ่า ๆ ...
เดี๋ยวมาต่อครับ พื้นที่ภาพเต็มแล้ว...
Bookmarks