กำลังใจ..มีให้เสมอ

[พลายแก้ว]

แนมเบิ่งหน้ามาคือเศร้า เป็นเหงาๆ คือเอ้าอั่ง
แม่นเป็นหยังน้อน้องหล่า ขอบตาช้ำก่ำหมอง
เห็นเธอมองตั้งแต่ฟ้า มีปัญหาแนวได๋หน่อ
ผุได๋น้อเฮ็ดให้เศร้า หรือไผเว้าเฮ็ดให้ซึม
ปากพรำพรึมนำลมฟ้า น้ำในตากะโฮ่งหน่วย
ค่อยๆย้วยลงนำแก้ม แนมเห็นแล้วเป็นห่วงหลาย
ทุกข์แนวได๋แน่น้อเจ้า อยากแบ่งเบานำจักหน่อย
ใจสะหวอยแล้วละอ้าย สิตายแล้วย่อนคึดนำ
แนวสิทำกะเพียงได้ กำลังใจส่งไปซ่อย
อ้ายยังคอยอยู่ใกล้ๆ บ่เคยย้ายใจจากเธอ
ฮักเสมออยู่เด้อหล่า ถึงแม่นว่าเป็นคนเก่า
ยังฮักเจ้าห่วงเจ้า และแคร์เจ้าคือเก่าเดิม
แนวสิเติมทางใจอ้าย เป็นห่วงหล๊าย หลาย ยามเธอหม่น
หากแม่นมื้อเจ้าทุกข์ทน มีหนึ่งคนอยู่ตรงนี้ ยินดีร่วม..ฮ่วมทุกข์นำ..เด้อนางเอย..

[สาวพุเตย]

มาขอกำลังใจนำอ้ายจ๊า...ฮือ ๆ

[ทิดจ่อย]

ขอเป็นยาลบรอยแห่งความช้ำ ยามเจ็บแผลสิได้บ่อ
ยามเจ้าทุกข์และท้อ ขอเคียงข้างหย่างนำ
อ้ายบ่อคิดแคร์ซ้ำอดีตเก่าในใจนาง
ให้ปล่อยวางไปสา ไล่น้ำตาให้ลาแก้ม
สิคอยแนมสิคอยถ่าเช็ดน้ำตาทุกเช้าค่ำ
คนคึดนำกะแม่นอ้าย คนฮักจริงกะแม่นอ้าย ถ้ามีเจ้าพี่บ่อแคร์

[สาวมุก]

อ้ายหลอย..อ้ายคือสิมาเว่าให่น้องฮ้องไห่นำแท้บาดนิ..มาคือเจ้าของเอง(น้องสาวมุก)ในตอนนี้แท้จ้า มักเขา เขากะบ่มักเจ้าของ จั๊กแม่นยามใด๋สิลืมได้..ย่านพู้นล่ะจ้า..ตอนไฟไหม่กระดูกพู้นล่ะ..จั๋งสิลืมเขาได้..สงสารเจ้าของเด้อ้ายเอ้ย..