กระทู้นี้ขอฝากไว้ให้คึดฮอดกันแหน่เด้อจ้าพี่น้อง...ติดภาระกิจ บ่รู้ว่าสิโดนปานใด๋สิได้กลับบ้านมหา
อาจสิมื้อ2มื้อ อาทิตย์2อาทิตย์ อาจสิเป้นเดือนกะบ่รู้ แนวแบบนี่ติ๋มเป็นคนกำหนดเองบ่ได้เนาะจ้า
ไปร้านไทยมาอาทิตย์ที่แล้ว ได้หน่อไม้แบบหน่อน้อยๆสั้นๆมา กะเลยเอามาทุบแกง
แกงแบบนี่ติ่มหละคึดฮอดเฒ่าแม่ เลาเคยไปหาหน่อไม้ไฟมาทุบแกงเลี้ยงมาจังใหญ่ แกงบ่หลายแต่แซบบ่เคยลืม...
อีกอย่างต้มไข่พอเป็นยางมะตูม ปอกเปลือกใส่ถ้วย ซิดน้ำปลากาแมวดำใส่ ข้าวเหนียวฮ้อนๆจ้ำ แซบอีกหละแม่เอ้ยยย...อิอิ
ทุกมื้อนี่ติ๋มกะยังเฮ็ดกินอยู่...แต่ใส่น้ำปลากาปลาหมึก พะนะ...5555++
วิธีแกงกะคือแกงหน่อไม้ทั่วๆไปหละจ้า ใส่อันนั่น ขาดอันนี่ ย่อนไกลบ้านคือเก่าหั่นหละ
หน่อไม้ต้มให้จืด เอามาผ่าเป็นชิ้นทุบพอแตก
ผักที่หาได้มี ต้นหอมหั่น เห็ดต่างๆ ฟักทองญี่ปุ่นหั่นชิ้น ผักขาเด็ดเอาแต่อ่อนๆ
ตะไคร้ทุบๆ ใบมะกรูดฉีก ข่าอ่อนๆ ผู้แกงมักกินข่ากะเลยหามาใส่ พริกดิบ
เครื่องแกง
ตำข้าวเบือ ใส่พริกแห้ง หอมแดง กระเทียม เกลือ
น้ำในยานาง หน่อยหลายตามชอบจ้า
ปลาแดกปรุงรส
เอาหน่อไม้ เห็ด ฟักทอง พริกดิบ ข่า ใบมะกรูก ตะไคร้ น้ำยานางใส่หม้อตั้งไฟ พอเดือดตักต่อนปลาแดกใส่กระชอน หย่อนลงไปในหม้อ
คนๆให้เหลือแต่ก้างแล้วยกกระซอนออก...แล้วใส่เครื่องแกงที่ตำไว้ หมั่นคนเด้อบาดทีหนี่ ลดไฟนำแหน่ไหม้ก้นหม้อใด๋ ข้าวเบือหั่น
พอสุกกะชิมเบิ่ง...ใส่ต้นหอม ผักขาปิดไฟ....เสียดายบ่มีผักอิตู่ใส่เนาะ...ครบทุกอย่างหลายกะบ่แม่นไกลบ้านหละจ้า...
กับแกล้ม สำหรับผู้มักดื่ม ติ๋มกินเป็นกับข้าวหนี่หละ พอแล้วแลงอยู่
กระดูกหมูสับเป็นชิ้น ล้างน้ำถิ่มไว้ให้สะเด็ดน้ำ
เอาหมูใส่ชาม ใส่เกลือ ข้าว กระเทียมตำ...นวดจนเข้ากัน ใส่ถุงมัดปากแน่นๆถิ่มไว้2-3มื้อ
แกะออกจากถุง พยายามขูดข้าวออก ยามทอดซังข้าวไหม้จนดำ หมูยังบ่สุก เอางาขาว งาดำใส่ลงไปแทน
นำไปทอดน้ำมันฮ้อนๆ ไฟปานกลาง คั่นใกล้สุก จังเปิดไฟให้ฮ้อนๆ แล้วตักหมูออกซับน้ำมัน
จัดใส่จาน...ไสหละสปายแดง อิอิอิ บ่ดอกกินกับข้าวเหนียวจ้า
เชิญแซบจ้าพี่น้อง....อีกบ่โดนคึดว่า จังพ้อกันใหม่....
Bookmarks