เฮาบ่สมกัน..พะนะว่า

[พลายแก้ว]

จากหัวใจที่เคยแกร่ง เคยเข้มแข็งมาแต่เก่า
อุปสัคหนักเบา ทุกเรื่องราวใหญ่น้อย มาเป็นร้อยกะบ่แคร์
ชีวิตนี้บ่ยอมแพ้ ความอ่อนแอบ่เคยเจอ
สู้เสมอบ่เคยกลัว เพราะหัวใจบ่เคยท้อ
เป็นหยังน้อ..เทื่อนี้ อยู่ดี ดี ผัดล้าหล่อย
บ่เคยถอยกะได้ถอย บ่เคยคอยกะได้ถ่า บ่เคยล้าผัดเมื่อยลง
ยืนโตตรงยังบ่ได้ ย่อนทางใจอ้ายมันเจ็บ
ความช้ำเหน็บเข้าทิ่มแทง ให้เหมิดแฮงจนเซล้ม
เจ็บระบมจมกับเศร้า ย่อนว่าเฮาบ่สมเพิ่น
สาวผุแก้มเปิ่นเวิ่น เพิ่นผัดมีคู่ซ้อน นอนเนาว์ห้องป่องมโน
ห้ามใจโตบ่ทันจ้อย จักหลอยมักตะยามได๋
มืนตาได้กะคิดถึง ฮ่ำคนึงอยู่เหมิดมื้อ
คนขี้ดื้อมาซึมเศร้า ยอมให้เขานั้นทุกอย่าง
อ้ายขอยอมหลีกทาง บ่ขัดขวางแล้วล่ะหล่า ไปสาน้องไปฮักเขา
คำอวยพรก่อนจากเจ้า ให้ฮักเขาหลาย หลายเด้อ
อย่าสุเจอความผิดหวัง รักอย่าพังคือจั่งอ้าย
สิจากไปให้มันพ้น ไกลคำคนปนคำด่า
หงส์บ่อาจคู่กา หมาสิมาคิดโน้ม ชมกิ่งฟ้าว่าบ่คือ..พะนะ

[สาวมุก]

These should be laughter after pain.
ย่อมมีเสียงหัวเราะ หลังจากความรวดร้าว.
There should be sunshine after rain.
ย่อมต้องมีแสงตะวันหลังจากม่านฝน.
These things have always been the same.
สิ่งเหล่านี้จักต้องเหมือนเดิม..เสมอมา..
So why worry now.Why worry now.
ดังนั้นจะคิดมากทำไม ใยต้องกังวลในตอนนี้.

:l-..อ้ายเอ้ย..อย่าหัวซาเถาะนำคนเพิ่นบ่มัก..ยังมีคนอีกหลายคนที่เพิ่นคู่ควรกับเฮา...หรือถ้าฟ้าสิปั้นมาคี่..บ่มีคู่อิหลี..กะอยู่ผุเดียวโลดอ้าย..:l-

[วัฒนชัย หาริโร]

มาคือเป็นหลูโตนแท้ละอ้ายข่อย
เขาบ่สมเฮาพะนะอ้าย
อย่าว่าเฮาบ่สมกันแหมะ

[หญ้านาง]

ดินสังสิบ่สมฟ้า
นาบ่สมกล้าสิหน่าย
ซายบ่สมนางน้อง
หรือว่าฆ้องบ่สมกลอง
หรือว่าทองบ่สมสร้อย
กลอยบ่สมน้ำสิแช่
หรือว่าแข้บ่สมหนองน้ำ
บักขามส้มบ่สมเกลือ......ล่ะน้อบ่าวเอ๊ย