คึดฮอดพี่ๆน้องๆบ้านมหาทุกคนเด้อจ้า...ช่วงนี่ติ๋มอาจสิห่างหายไปแหน่ บางทีกะ2-3มื้อ ยากงานคักจ้า...
ทำงานหาเงินพอได้ซื้อหมากซื้อพลูต้อนเฒ่าแม่ก่อน...เทือมีบุญได้กลับบ้าน....อิอิ
ยามทำงานยากๆอยู่ ติ๋มกะบ่ได้เข้าครัวเฮ็ดกับข้าวเลย กินอาหาร+ขนมนำฝรั่งหนี่หละ ง่ายๆ
มื้อนี่มีเวลาว่างได้พัก ตื่นขึ้นมาคึดอยากกินอาหารไทย ที่เฮ็ดง่ายๆ แบบจานเดียว...นั่งคึดอยู่ว่าสิกินอิหยังดี...
ออกไปหย่างเบิ่งสวนครัว ป้าดดดดด ผักแป้น(ใบกุ่ยช่าย) เกิดแต่มื้อใด๋หละหนี่ มางามแท้ เฮ็ดจังใด๋สิกินไหว กอใหญ่กว่าปีที่แล้วอีก....
ได้การหละ ผัดไทยเลยบาดทีหนี่
เครื่องปรุง เส้นก๋วยเตี๋ยวจันทร์อบแห้ง แช่น้ำให้นิ่ม เคิ่งห่อ พอกะเอาแค่จานเดียว
ใบกุ่ยช่ายตัดมากำมือหนึ่ง ล่างน้ำ แล้วหั่นถ่อน
ถั่งงอกเด็ดฮากถิ่มแหน่ จักหยุบใหญ่ๆหละจ้า
ไข่ไก่2ฟอง
กุ้งสดปอกเปลือกผ่าหลัง4-5โตกะพอจ้า
น้ำปรุงสำหรับผัดไทย
น้ำหมากขามเปียกประมาณ4-5ช้อนโต๊ะ กะๆเอาจ้า
หอมแดงแขกหั่นบางๆ1หัว
น้ำตาลมะพร้าวเคิ่งก้อน
ซีอิ๊วดำนิดหนึ่ง...บ่มักปานใด๋ ใส่หลายๆกะขิว
ซีอิ๊วขาวปรุงรส
น้ำเปล่าเคิ่งแก้ว
เอาเครื่องเฮ็ดน้ำปรุงใส่กระทะ เคี่ยวจนหอมแดงสุก น้ำตาลละลาย ชิมเบิ่งตามใจมัก เมื่อรสดีแล้ว
ให้ใส่พริกป่นลงไป ตามด้วยเส้น ผัดให้เส้นสุก กันไปไว้ข้างกระทะ ทีนี่ใส่น้ำมันพืชนิดหนึ่ง
ตอกไข่ใส่ลงไป กวนๆให้กระจาย ใส่กุ้งสด ผัดๆพอกุ้งสุก กวาดเส้นลงมาผัดรวมกัน ถ้าแห้งกะเติมน้ำได้
สุดท้ายกะใส่ถั่วงอก ใบกุ่ยช่าย ถั่วลิสงคั่วบุบพอแตก ผัดพอผักสลด ตักใส่จาน เชิญแซบจ้า
แบบไกลบ้านอิหลี เครื่องกะมีบ่ครบ แต่ขอบอกว่าแซบอิหลี...หรือว่าข่อยหิวหว่า....
Bookmarks