เลาะเลียบซ่ง เขาวงยางตลาด ขอบังอาจเด้อท่าน มาจาต้านจีบสาว
จากใจบ่าวอุบลก้ำ อีสานต่ำลูกแม่มูล อยากมาซูนคิงบาง หม่อมพระนางทางพี้
หนองกรุงศรีเคยมาผ่าย กุฉินารายณ์เคยมาผ่าน คราวสงกรานต์เที่ยวเหล่น
เป็นเพื่อนเขื่อนลำปาว สาวนามนคนโก้ ท่าคันโทยังคึดต่อ ตั๋วอ้ายรอจนเฒ่า น้อเจ้ามะส่างเป็น
อยากสิเห็นคักแท้ แลสาวชาวคำม่วง เจ้าผุ่ดวงดอกซ้อน ไปนอนลี้อยู่ใส
สาวภูไทเสียงเหน่อ เป็นพิเหลอเป็นพิเหล่อ หลงมักเธอตั้งแต่ผุ้น บุญอ้ายหากบ่สม
กลมลาไสยใจซ้ำ คิดฮ่ำแต่นำนาง หลงมักนวลคิงบาง จนหลงทางคืนบ้าน
กิ่งดอนจานบ่หาญกล้า สาวส่าเคียมร้อยเอ้ด ติดกับเขตโพธิ์ชัย ในหัวใจเจ้าว่างบ่
ตั้งแต่พานพบพ้อ ปางนั่นได้แต่เขิน เที่ยวตามนางหย่างตามเอิ้น
ฟังลำเพลินยามค่ำค่ำ สาวร่องคำหย่างเลาะล่าย งามหลายแถ่ะเด๊อุ่น
เพียงได้ซูนท่ก้อย พอได้ต้อยกะ้แต่มือ อย่าถือสาเด้อน้อง ขอจับจองไว้ก่อน คันบุญมีคงได้ซ้อน
เป็นชู้คู่กัน สาวสหัสขันธ์อ้าย งามหลายจนใจอ่อน เบิ่งพระนอนภูค่าว ไดโนเสาร์ภูกุ้มฯ
หัวหยุ้มได้แต่แนม ยิ้มแล้วแย้มแถมต่อน้อสมเด็จ เฮ็ดให้ชายงงงวย
สาวห่วยผึ้งดึงจ่อง สาวฆ้องชัยเผิ่นแฮ่งกล้า นาคูเจ้าสาวแฮ่งแจ่ม นำไปแนมฮอดบ้าน สาวภูพานท้องถิ่น
สนามบินแต่เค้า คราวผุ้นเผิ่นรบเล็ว น้ำตกเหวไหลย้อย ผานางคอยพวมเย็นซื่น
น้ำใสใสไหลวื่น ครืนครืนก้องทั่วไพร สาวสามชัยใจอ้ายฝ่อ โอ่ยเด๊น้อได้ฟังข่าว
บ่าวสามหมอเผิ่นอยู่ใกล้ อ้ายคนไกลขอลาก่อน อนุสรณ์ในตอนท้าย น้ำตาชายสิไหลหลั่ง
หมดควมหวังฮักพังพ่าย โบกมือบายลาอ่วย สาวห่วยเม็กคนสุดท้าย ควมฮักอ้ายสิสั่งลา นั่นล่ะน๊านั่นล่ะหน่า
...............................................
ปล.ตามธรรมเนียมการไปจีบสาวบ้านเผิ่นทางอื่นทางไกลต้องทำควมคุ้นเคยบอกกล่าวเจ้าถิ่น
จั๊กหน่อยจั่งบ่มีเรื่องมีราวหว่าซั่น ขออนุญาตเด๊อคะรับ"ท่านศรีสะท้าน"
ถือเป็นผู้อาวุโสทางกาสินเนื่องจากว่าสาวทางก้ำกาฬสินธุ์ย้านขาดดุลสาวทางเมืองอุบลฯ
ก่ะเลยขอคืนพื้นที่เพื่อเป็นการบ่ได้เปรียบเสียเปรียบ 55555
ผิดตกบกพร่องหม่องได๋ก่ะบอกกล่าวกันมาครับพี่น้องทางกาสิน
(สาวอุดรใจเย็นๆเด๊อหล่า)
อ้างข้อความนี้
Bookmarks