อาหารอีสาน...ของคนไกลบ้านจ้า

[ติ๋ม เปอร์โย]

เฮ็ดกินแต่อาทิตย์ที่ผ่านมาพุ้นหละจ้า แต่บ่มีเวลาลงกระทู้ ยากนำเคลียร์งานอยู่จ้า
แม่นลงกะลงสุมๆกันไว้กระทู้เดียวนี่หละเนาะจ้า...ตั้ง2-3กระทู้บ่ไหวดอก ยากคัก บางมื้อกะหายหัว อิอิอิ
แนวกินนี่เฮ็ดกินหลายมื้อเด้อจ้า...บางอย่างเฮ็ดหลายๆกินอยู่3มื้อกะบ่เบิด...กินจนเบื่อ
ยามเบื่อๆมากะคึดว่า อีก3เดือนกะคือสิบ่เฮ็ดกินอีก...แต่กะเฮ็ดกินคือเก่า ยามว่างจากงาน..อิอิ



เมนูแรกนึ่งปลาทับทิมจ้า...กินปลา เทือฉลาดนำบ้านเพิ่นเนาะ อิอิ นึ่งใส่ผัก
ได้ปลามากะทำความสะอาดจ้า บั้งข้างโตปลา หมักเกลือ ซิอิ๊วขาว นำไปนึ่ง
ใกล้สุกกะใส่ผัก เท่าที่หาได้หละจ้า...




กินกับแจ่วปลาแดกบอง(คั่วสุกแล้วจ้า) หุงข้าวซ้อมมือพร้อม สุขภาพคัก อิอิ
แจ่วบองกะง่ายๆ หั่นตะไคร้ หอมแดง กระเทียม พริกแห้ง คั่วเครื่องให้หอมๆ
โขลกให้ละเอียด ปลาแดกล้างๆความเค็มออกแหน่ ปลาแดกกระปุก ซื้อเอา เค็มคัก
แล้วกะสับๆ ใส่หมากขามเปียกนิดหน่อย สับให้ละเอียด ใสครกโขลกรวมกันกับเครื่องน้ำพริก
ตักใส่กระทะใส่น้ำลงไปนิดหน่อย คั่วจนแห้ง ชิมเบิ่ง ปรุงรสได้ตามใจชอบ
ใส่ใบหมากกรูดหั่นฝอย ข้าวคั่วพอหอม ตักใส่ถ้วย
เก็บไว้กินได้หลายมื้อจ้า เพราะว่าคั่วสุกแล้ว.....



ต่อมากะน้ำพริกปลาทูใส่แมงดา
ต้มปลาทูใส่ปลาแดก กะให้นัวโดยที่ว่าบ่ได้ปรุงเพิ่มเลยจ้า ติ๋มใช้ปลาทู2โต
มีหมากเขือเหลืออยู่3หน่วย ถิ่มลงไปต้มนำกันโลด พอสุกกะแยกปลาทู เอาแต่เนื้อ
คั่วพริกสด เผ็ดๆเด้อจ้าจังบ่คาว...คั่วหอมแดง กระเทียม เอาใส่ครกโขลกใส่เนื้อปลา
แมงดากะจี่ไฟเด็ดปีก หัว ขาแข็งๆถิ่มไปจ้า ย่านทิ่มคอ เทือหย่ำบ่แหลก หั่นใสครก
โขลกต่อให้ละเอียด
แล้วใส่หมากเขือ โขลกต่อไปจ้า พอได้ที่กะกรองน้ำต้มปลาแดกใส่นิดหน่อย
บ่ต้องปรุงเพิ่ม รับรองนัวแล้วจ้า
ใส่ต้นหอม ผักชีสับ ตักใส่ถ้วยจ้า...



กินกับผักต้ม ผักสด สำหรับผักสด ผักชี ปลูกเองในสวนจ้า รับรองปลอดสารพิษ


มื้อหนึ่งคุยกับอ้ายหล่อ"กินข้าวแล้วยังอ้าย"
กินแล้ว คั่วไก่ใส่ใบผักบั่ว แซบๆ มาเด้อ เพิ่นว่า คั่วใส่น้ำปลาแดกนัวๆ มาเด้อกินข้าวนำอ้าย เพิ่นว่า
ขะน้อยคึดอยากกะเลยไปตลาด ซื้อไก่มาคั่วใสต้นหอม พริกหยวก
ข้าวเหนียวจ้ำ แซบๆคืออ้ายหล่อว่าอิหลี....มาๆพี่น้อง มากินข้าวนำคนไกลบ้าน....

[เต็มใจให้เธอ]

ป้าดโธ่เพื่อนติ๋ม มาคือเฮ็ดแนวกินเป็นตาแซบแท้ครับ
หยับไปจักหน่อยแหน่ครับ ขอชิมนำจักคำแหน่ครับ

[บักขามป้อม]

ป่นเป็นตาแซบจ้าพี่ติ๋ม อยากกินนำอยู่จ้าแต่ย้านเอื้อยว่าให้ ย้อนว่า น้องจ้ำป่นจ้ำแจ่วบ่เป็นจ้า คุ้ยเอาโลด ผักอันใบสร้อยๆ วางอยู่จาน คือสะบ่แม่นผักกาดฮิ่นดอกเนาะจ้า อยู่สมุยหากินยากคักจ้าเอื้อย ผักกาดฮิ่นนี่

[เขมราฐ]

แนวมักหลินเบิดเลยค่ะ มื่อเช้ากะนึ่งปลาโขงค่ะพี่ติ๋ม แซ่บ ๆ

[บ่าวจัย]

คนผุจบผุงามเฮ็ดแนวกินกะเป็นตะแซบเนาะครับเอื้อย จักคำแน

[sompoi]

เข้ามากลืนน้ำลายแล่ว หนีดอกเด้อบาดเนี้ยะ ... หึยย ซั้งคนคัก..

[สาวเมืองกะสิน]

ขอจ้ำป่นนำแนเด้อจ้า เป็นตาแซ่บคักแท้ๆๆ กินแล้วขอห่อกลับบ้านนำได้บ่คะ แบบว่าท้องอิ่มแต่ว่าปากยังอยากกินต่ออีกน่ะจ้า อิอิ

[maxwell007]

มีแต่ของเป็นตาแซบหนอครับ เห็นแล้วกะเริ่มหิวแล้วเด้อบาดนิ

[ไก่น้อย]

ป้าดดดด แนวกินเพิ่นแมะ ..ได้ข้าวเหนียวจักกะติ๊บนิ ดึงหูกะบ่ออกเด้อพี่ติ๋ม สุดยอดเลยจ้า

[สาวทองแพง]

ตะแซบแฮงพี่ติ๋ม ให้แพงกินนำแนะเด้อจ้า
แต่แพงบ่มักจ้ำเด้จ้า มักแต่คุ้ยกับบ่ายจังถึงเนื้อถึงต่อน :l-