ซุบหน่อไม้ส้ม (แนวมัก)

[บักขามป้อม]

สวัสดีจ้า พี่น้องบ้านมหาทุกๆ ท่าน มื้อนี้ขามป้อมเอาแนวกินมาสู่พี่น้องบ้านเฮากินจ้า ช่วงนี้กินตะหน่อไม้ส้มจ้า ย้อนว่า โทรไปจ่มกับเฒ่าแม่ว่า "อยากกินซุบหน่อไม้ส้มเฮ็ดใหม่ๆ บ้านเฮาแมะยาย อยู่นี่บ่แซบคะเจ้าดองเอา ต่อนกะใหญ่ๆ ซะล่ะ บ่แซบคือเฒ่าพ่อเฮ็ด" ผ่านไปบ่ฮอดสามเดือนดอกจ้า เฒ่าแม่กะฝากหน่อไม้ส้มกับปลาแดกแม่ไข่เฮ็ดใหม่มาให้จ้า ว่าให้เอามาปิ้งพะนะ แต่เผอิญว่าคนฮับฝากคายาก นานเอามาส่งหลาย ปลาแดกกะเลยเป็นก่อนจ้อย ทอดกะบ่ได้เปื่อยเบิด :l- งึดหลาย 5555555

เอาล่ะจ้าๆ เว้าหลายญายห่างเนาะ มาเข้าเรื่องโลด ขามป้อมกะสมใจหลายจ้า ซุบกินซะให้สมอยากจ้า หลายเทื่อพร้อม คึดหยังบ่ออกกะต้มหน่อไม้ส้มซุบโลด 5555 ขั้นตอนกะบ่มีหยังยากดอกจ้า ต้มหน่อไม้ส้มให้สุก ลดความเฝื่อน ความฮืน ความเค็ม ความส้มออกจักหน่อย ปั้นเอาตะต่อน ตำพริกดิบที่คั่วแล้ว (บ่ได้ใส่งาคั่วจ้า บ่มีในครัว) ใส่ต้นหอมบั่ว หอมเป หอมป้อม แล้วแต่ผู้มักจ้า ใส่ผงชูรส อะฟ้าวใส่น้ำปลาเด้อจ้า
ซิมหน่อไม้ส้มก่อน อันนี้เฒ่าพ่อเฮ็ดมาพอดีแล้วจ้า เลยได้ใส่ตะชูรสหน่อยหนึ่ง แล้วๆ กะตักออกจากครก ใส่ถ้วยใส่จาน กินโลดจ้าบาดนี่
คึดฮอดยอดขิงอ่อนอยู่บ้านเด้เนาะ ยอดบักกะเสดอ่อนพร้อม แต่มื้อนี้ได้กินยอดผักกระเฉดต้นแทนจ้า








มื้อนี้ซุบสู่หมู่กินจ้า หลังจากซุบกินผู้เดียวมาหลายเทื่อล่ะ หมู่กะเลยซื้อส้มไข่ปลา(คั่วแล้ว) กับส้มหมู + หมูแดดเดียวมาพร้อม คาบนี้แซบหลายจ้า ได้กินข้าวซุมหมู่ กินข้าวสองคนข้าวเบิดเป็นติบ(น้อย):l-





มื้อนี้กินผู้เดียวอีกแล้วจ้า หลังจากโตนฮ้านแล้วๆ มีไส้กรอก(ฝรั่ง)อยู่กะเอามาลวกกินกับจ้า มีหยังกะกินอันนั้นล่ะ อย่าสู่กินยากอยู่ยากหลาย 555 ลงทุนนึ่งข้าวกินพุ่นเด้ ข้าวติบนี้สะได้อุ่นกินอยู่ 3 มื้อพุ่นล่ะจั่งค่อยเบิด :l-



ปิดท้ายด้วย แตงโม+แคนตาลูปแก้เผ็ด จากรถพ่วงเจ้าประจำจ้า กินดู๋หลายจนบ่ต้องสั่งยาก ฮอดยามเพิ่นกะจอดรถ หั่นๆ เอามาส่งในออฟฟิศโลด :l-
ขออภัยหลายๆ เด้อจ้าถ้ารูปบ่ชัดปานได๋ ใช้กล้องมือถือถ่ายจ้า

ขอจบกระทู้นี้ไว้ซ่ำนี้เนาะจ้า ขอบคุณพื้นที่โพสกระทู้จากเว็บบ้านมหาดอทคอมของเฮาจ้า