โทรทัศน์เครื่องแรกของหมู่บ้านข่อยเป็นโทรทัศน์ขาวดำ 14 นิ้ว ลุงดำเลาเป็นทหารเกณฑ์พอปลดเลาซื้อโทรทัศน์กลับบ้าน ซุมข่อยเป็นเด็กน้อยพากันมาหุ่มเบิ่งวาสั่น ว่าโทรทัศน์มันหน้าตาจั่งใด๋
ขอบคุณเจ้าของภาพครับ
แต่ก่อนบ่มีไฟฟ้า เพิ่นใช้เครื่องปั่นไฟเอา เสาร์-อาทิตย์ มีหมอลำเรื่องต่อกลอนถ่ายทอดจากช่อง 4 ขอนแก่น ผุเถ่าผุแก่พากันหิ้วกะต่าหมากมาเบิ่งหมอลำเต็มเฮียน เจ้าของบ้านทำหน้าที่ต้อนรับแขก ปานงานดองเอาโลด
บ้านกะเป็นสังกะสีซาแหล่ว ยามกังเว็นฮ้อนปานหยังกะพากันเบิ่งจนว่าจบ พัดลมกะบ่มีพากันหาแนววีวาบ ๆ อยู่ เหลียวเบิ่งหน้าไผยางตายไหลออกเหลี่ยมมาบ ๆ หมอลำกะม่วนคัก พากันไห้วาสั่นผุเถ่ากะดาย
ยามมื่อแลงซุมข่อยเลิกเรียนแล้วกะไปอวนอัว ๆ บ้านเพิ่นนั่นล่ะ เพิ่นบอกเจียหมูกะเจีย เพิ่นบอกไปสีข้าวกะไป แลกกับการเบิ่งโทรทัศน์ ช่วงนั้นติดไอ้มดแดง กับหน้ากากเสือ พอเบิ่งแล้วกะพากันมากระโดดฮั้วถีบกัน กูเป็นไอ้มดแดงเด้อ มึงเป็นสัตว์ประหลาดพะนะ โดดถีบกันล้มหัวแตก ปากแตกกะมี ฮ่า ๆ ๆ
ยามมื่อแลงตอนหัวค่ำวันพฤหัสบดี แมนบ่ล่ะหือจำบ่ได้ กะสิมีมวยทางช่อง 4 ขอนแก่น รายการทีวีบ๊อกซิ่ง เจ้าของเพิ่นยกโทรทัศน์มาไว้หม่องหัวคันได คนเบิ่งนั่งอยู่เดิ่นบ้าน เสียงเฮมวยดังไปทั่วหมู่บ้าน หมู่บ้านละแวกนั้นพากันถีบจักรยานมาเบิ่งมวยปานงานวัดกะบ่ปาน
โทรทัศน์ 14 นิ้ว จอเดียว คนเบิ่งวาแมนเกือบสองร้อยพุ่นล่ะเบิ่งซงกะดาย พอฮอดมื่อกะพากันมา บรรยากาศอบอุ่นคัก ต่อมาพ่อใหญ่ชิดเลากะมีโทรทัศน์ขาวดำ 20 นิ้ว คนกะแบ่งมาทางบ้านพ่อใหญ่ชิดส่วนหลาย เพราะจอใหญ่กว่า
ต่อมาเครื่องที่ 3 พ่อใหญ่วันทา เครื่องที่ 4 ที่ 5 กะตามมา แต่ส่วนหลายสิเป็นโทรทัศน์ขาวดำ โทรทัศน์สีเริ่มมีในเวลาต่อมา ตอนไฟฟ้าเข้าหมู่บ้านแล้ว หลังจากนั้นกะมีตู้เย็น และอื่น ๆ ตามมา ความเจริญกะย่างกรายเข้ามาสู่แผ่นดินอีสานบ้านเฮา
ส่วนโทรทัศน์เครื่องแรกของบ้านข่อย อีแม่เลาอยากได้ เห็นผู้นั้นกะมี ผู้นี้กะมี พวกข่อยกะพากันไปเบิ่งแต่บ้านเพิ่น เลากะเลยหลูโตนลูก กะเลยซื้อ เป็นโทรทัศน์สี 20 นิ้ว โตชิบ้า ซื้อมาหมื่นห้าพันกว่าบาท สมัยนั้นแพงคัก
Bookmarks