สูรยะแสงแลงแล้ว นกกาแส่วกลับคืนถิ่น
โบกโบยบินผาดผ่าย ผ่านไพรกว้างล่วงภู
เสียงนกเขาชวาตู้ ขันคูคอยคู่
เสียงจุ๊กกรู๊เกาะกิ่งไม้ เมินเข้าแค่เขา
เอี้ยงอ่าวเอื้อยามค่ำเขาคำ จอแจเสียงหม่ายซูซมซู้
สาลิกาแก้วจาสานเสียงซ่าน ผสานเป้าป่าไม้ดงคล้อยหล่ำคอย
เสียงวอยๆคือสาวเอิ้น ใจเวินๆเหวิ่นวี่เวิ่น
ฟังจนเพลินสติตั้ง จั่งหัวห่อมหื่นหอม
ซอมซมเสียงจิ๊บจาบท้วง ตามเหล่าดอนเลา
กดกระทาเทียวขัน กล่อมพนอมแนวไม้
สะออนใจปักษีซ้อน ซมคอนซ้อนคู่
ออระอินอิ่นอ้อย ออยซู้ซ่างซม
ละลิ่วลมบินผาดผ่าย เกี้ยวก่ายเล่นลมบน
สาละวนทวยหางเหิน หม่ายคอนคอยซู้
บ้างเข้าคู่ออแอเว้า ซมขวัญขันอ่อน
พอปานนอนแนบน้อง ในหอห้องส่วงกะใจ...แท้แหล่ว
Bookmarks