มีคนมาจ่มให้ข่อยฟังว่า ซูมื่อนี่มันเป็นจั่งใด๋บุ เข้ามาในบ้านมหา บางมื่อกะม่วน บางมื่อกะบ่ม่วน ฮ่วย คือขายของล่ะเนาะ ถ้าขายได้ซูมื่อกะรวยตายซันล่ะบ่มีหม่องเมี่ยนดอกเงิน หาเว่า บางคนกะบอกว่าบ่มีเวลา บางคนกะบอกว่าคนที่บ้านห้ามเล่นพะนะ บ่แมนเจ้ามีพฤติกรรมที่บ่น่าไว้วางใจ หรือว่ามีกิ๊กตี๊ ฮ่า ๆ ๆ
เคล็ดลับของการเล่นเว็บบ้านมหาให้สนุกคือ ก่อนที่สิเข้ามาเล่นให้เข้ามาในเวลาว่าง ๆ เข้ามาในอารมณ์ที่อยากสิเล่น อย่าเข้ามาขณะที่จิตใจบ่พร้อม หรือมีความขุ่นเคือง เพราะสิเห็นหยังกะสิขวางหูขวางตาไปเบิ๊ด บางคนสุนหลายเตะฮอดหมา ซางบ่เตะพ้อหมาบ้าแนเนาะ
บางคนเข้ามาเล่นเฮ็ดให้ไปเฮ็ดงานสวย และในขณะเฮ็ดงาน เสียการเสียงานเบิ๊ด โดนเจ้านายด่า เจ้านายห้ามเล่นพะนะ อันนี้ช่วยบ่ได้เด้อ โปรดใช้วิจารณญาณเอาเองโลด
มีคนจ่มว่าเข้ามาเล่นแชตหม้อนึ่งไหม้ไปหลายอันแล้วพะนะ อันนี้คือสิแมนอยู่ดอก อยู่บ้านข่อยกะไหม้ไปหลายอันอยู่ สิด่าคนอยู่บ้านกะบ่ถนัดปาก เพราะเจ้าของกะเล่นคือกัน ฮ่า ๆ ๆ บางเทือยาดคอมกัน งอนกันบ่เว่ากันสามสี่มื่อกะมี
แต่ก่อนเวลาข่อยออกจากบ้าน เลาเป็นห่วงเป็นใย โทรถามวาซ่าน ตอนนี้สิมีไผมาซวนข่อยออกจากบ้านน้อพะนะเลาว่า เลาสิได้แชตได้จกเอ็มกับกิ๊กเลา ฮ่า ๆ ๆ
เว่าเรื่องกิ๊กเรื่องกั๊ก เรื่องปลื้ม เรื่องประทับใจนี้ เป็นธรรมชาติของมนุษย์ ปล่อยให้มันเป็นไปตามธรรมชาติ สักพักกะสิมีคนใหม่มาให้ปลื้มแทนดอก อย่าถึงขนาดบ่กินข้าวกินน้ำ หรือกินเหล้ากินเบียร์เบิ๊ดเป็นลัง ๆ หลาย อิอิ
ส่วนเรื่องอื่น ๆ นั้น เช่นเรื่องการยืมเงินยืมทองกัน หรือบางคนนิสัยเสียนิสัยบ่ดี กะแล้วแต่บุคคล บ่มีไผดีไปเบิ๊ดซูอย่างดอก เลือกคบเลือกเบิ่งเอาใหญ่แล้วล่ะ ตัวเจ้าของเองกะจะคึดว่าเจ้าของสิเพอเฟค (บุ๋ย ๆ) จักลับหลังเขาสิป้อยสิด่าจั่งใด๋กะบ่ฮู้ เป็นเรื่องธรรมดาของคน
ตราบใด๋ที่ยังเป็นมนุษย์ บ่สิ้นคนนินทาดอก ฉะนั้น เล่นให้สนุกเด้อ อย่าเคียดอย่าขมให้กัน อย่าหวังสิเอาชนะกัน อย่าอิจฉาริษยากัน เพราะที่เข้ามาเล่นนี้ บ่มีไผได้เงินจักบาทดอก ถึงแม้สิชนะกะบ่มีไผได้ถ้วยกาไก่จักคน
ซอยกันเบิ่งกันแยงเด้อ หนักนิดเบาหน่อยกะให้อภัยกัน มีแต่คนบ้านเฮาดอก ฮักกันไว้คือข้าวเหนียวหนึ่งใหม่ อย่าสิไลลาม้างคือน้ำถึกข้าวเหนียวเด้อพี่น้อง ไสล่ะแนวแก้เมื่อย คือนานหยิ่นมาแถะ
ข่อยอยู่มาสองปีกว่า ๆ ข่อยกะว่าม่วนอยู่เว็บเดียวนี่เด้ล่ะ ไปหม่องอื่นเป็นสีเงียบ ๆ จั่งใด๋บุ ข่อยย่านบ่ดังแมะ ที่บ่ม่วนบ่แมนเจ้าคิดไปเองบ่ มา ๆ ถ้าบ่ม่วน หรือกรณีเป็นที่สงสัยให้มาทางคุ้มสามเสนพี้เด้อ สิจัดให้
Bookmarks